Lùcas 3 - Am Bìoball Iomraidh Gàidhlig 1880 1992

1 Searmonachadh Eòin Baistidh. 15 Fhianais‐san mu thimcheall Chrìosd. 20 Chuir Herod Eòin dhan phrìosan. 21 Bhaisteadh Crìosd, agus fhuair e fianais o nèamh. 23 Aois agus sinnsireachd Chrìosd.

¹ A‑nis anns a’ chòigeamh‐bliadhna‐deug de ìmpireachd Thiberiuis Chèasair, air bhith do Phontias Pilat na uachdaran air Iudèa, agus Herod na thetrarc air Galile, agus Philip a bhràthair na thetrarc air Iturèa agus dùthaich Thrachonitis, agus Lisanias na thetrarc air Abilene,

² Nuair a bha Annas agus Caiaphas nan àrd‐shagartan, thàinig facal Dhè a‑chum Eòin, mac Shachariais, anns an fhàsach.

³ Agus thàinig e don dùthaich mu thimcheall Iòrdain, a’ searmonachadh baisteadh an aithreachais, a‑chum maitheanas pheacaidhean;

⁴ Mar a tha e sgrìobhte ann an leabhar briathran an fhàidh Esaiais, ag ràdh, Guth an tì a dh’èigheas anns an fhàsach, Ullaichibh slighe an Tighearna, dèanaibh a cheuman dìreach.

⁵ Bidh gach gleann air a lìonadh, agus gach beinn agus cnoc air an ìsleachadh; agus bidh na nithean cama air an dèanamh dìreach, agus na slighean garbha air an dèanamh rèidh;

⁶ Agus chì gach uile fheòil slàinte Dhè.

⁷ Uime sin thubhairt e ris an t‑sluagh a thàinig a‑mach a‑chum a bhith air am baisteadh leis, A shìol nan nathraichean nimhe, cò a thug rabhadh dhuibhse teicheadh on fheirg a tha ri teachd?

⁸ Air an adhbhar sin thugaibh a‑mach toradh iomchaidh an aithreachais, agus na tòisichibh air a ràdh annaibh fhèin, Tha Abrahàm na athair againn: oir tha mi ag ràdh ribh gur comasach Dia air clann a thogail suas do Abrahàm de na clachan seo.

⁹ Agus a‑nis fhèin tha an tuagh air a cur ri bun nan craobh: air an adhbhar sin gach craobh nach toir a‑mach toradh math, gearrar sìos i, agus tilgear anns an teine i.

¹⁰ Agus dh’fhiosraich an sluagh dheth, ag ràdh, Ciod uime sin a nì sinne?

¹¹ Agus fhreagair esan agus thubhairt e riu, An tì aig a bheil dà chòta, roinneadh e ris an tì aig nach eil; agus an tì aig a bheil biadh, dèanadh e mar an ceudna.

¹² Agus thàinig mar an ceudna cìs‐mhaoir gu bhith air am baisteadh, agus thubhairt iad ris, A Mhaighistir, ciod a nì sinne?

¹³ Agus thubhairt esan riu, Na dèanaibh nì air bith os cionn na dh’òrdaicheadh dhuibh.

¹⁴ Agus dh’fhiosraich na saighdearan mar an ceudna dheth, ag ràdh, Agus ciod a nì sinne? Agus thubhairt e riu, Na dèanaibh fòirneart air neach sam bith, no casaid‐bhrèige, agus bithibh toilichte le ur tuarasdal.

¹⁵ Agus air a bhith don phoball a’ feitheamh, agus na h‑uile dhaoine a’ reusonachadh nan cridheachan fhèin mu thimcheall Eòin, am b’e Crìosd a bha ann;

¹⁶ Fhreagair Eòin, ag ràdh riu uile, Tha mise gu dearbh gur baisteadh le uisge; ach tha neach a’ teachd as cumhachdaiche na mise, agus chan airidh mise air barr‐iall a bhròg fhuasgladh: baistidh esan sibh leis an Spiorad Naomh agus le teine;

¹⁷ Aig a bheil a ghuit na làimh, agus ro‑ghlanaidh e a ùrlar, agus cruinnichidh e an cruithneachd da thaigh‐tasgaidh: ach loisgidh e am moll le teine nach fhaodar a mhùchadh.

¹⁸ Agus ag earalachadh mòran de nithean eile, shearmonaich e don t‑sluagh.

¹⁹ Ach air do Herod an tetrarc a bhith air a chronachadh leis airson Heròdiais, bean a bhràthar Philip, agus airson gach olc a rinn Herod,

²⁰ Chuir e seo ris gach olc eile, gun do dhruid e Eòin ann am prìosan.

²¹ Agus thàrladh, nuair a bha an sluagh uile air am baisteadh, air do Iosa mar an ceudna a bhith air a bhaisteadh, agus e ri ùrnaigh, gun d’fhosgladh nèamh,

²² Agus gun tàinig an Spiorad Naomh a‑nuas air ann an coslas corporra mar chalaman, agus gun tàinig guth o nèamh, ag ràdh, Is tusa mo Mhac gràdhach, anns a bheil mo mhòr‐thlachd.

²³ Agus thòisich Iosa fhèin air a bhith mu thimcheall deich‐bliadhna‐fichead a dh’aois, air dha a bhith (a rèir barail dhaoine) na mhac do Iòseph, mac Heli,

²⁴ Mhic Mhatait, mhic Lèbhi, mhic Mhelchì, mhic Ianna, mhic Iòseiph,

²⁵ Mhic Mhatatiais, mhic Amois, mhic Nauim, mhic Esli, mhic Nage,

²⁶ Mhic Mhaait, mhic Mhatatiais, mhic Shemei, mhic Iòseiph, mhic Iùdah,

²⁷ Mhic Ioanna, mhic Rhesa, mhic Shorobabeil, mhic Shalatieil, mhic Neri,

²⁸ Mhic Mhelchì, mhic Adi, mhic Chosaim, mhic Elmodaim, mhic Eir,

²⁹ Mhic Iose, mhic Elieseir, mhic Ioreim, mhic Mhatait, mhic Lèbhi,

³⁰ Mhic Shimeoin, mhic Iùdah, mhic Iòseiph, mhic Ionain, mhic Eliacim,

³¹ Mhic Mhelea, mhic Mhainain, mhic Mhatata, mhic Nàtain, mhic Dhaibhidh,

³² Mhic Iese, mhic Obeid, mhic Bhoos, mhic Shalmoin, mhic Naasoin,

³³ Mhic Aminadaib, mhic Araim, mhic Esroim, mhic Phareis, mhic Iùdah,

³⁴ Mhic Iàcoib, mhic Isaaic, mhic Abrahàim, mhic Thara, mhic Nachoir,

³⁵ Mhic Sharuich, mhic Ragau, mhic Phaleic, mhic Ebeir, mhic Shala,

³⁶ Mhic Chainain, mhic Arphacsaid, mhic Shem, mhic Noe, mhic Lameich,

³⁷ Mhic Mhatùsala, mhic Enoich, mhic Iareid, mhic Mhahelil, mhic Chainain,

³⁸ Mhic Enois, mhic Shet, mhic Adhaimh, mhic Dhè.