Lebhiticus 22 - Am Bìoball Iomraidh Gàidhlig 1880 1992

Feumaidh an sagart air am bi neòghlaine sam bith fantainn o nithean naomha, etc.

¹ Agus labhair an Tighearna ri Maois, ag ràdh,

² Labhair ri Aaron, agus ra mhic, iad gan sgaradh fhèin o nithean naomha chloinn Israeil, agus gun iad a thoirt eas‐onair dom ainm naomh‐sa, anns na nithean sin a naomhaicheas iad dhomh: Is mise an Tighearna.

³ Abair riu, Ge bè air bith e de ur sliochd uile am measg ur ginealaichean, a thèid a dh’ionnsaigh nan nithean naomha, a naomhaicheas clann Israeil don Tighearna, agus a neòghlaine air, gearrar as an t‑anam sin as mo làthair: Is mise an Tighearna.

⁴ Ge bè air bith an duine de shliochd Aaroin a tha na lobhar, no air a bheil silteach, chan ith e de na nithean naomha, gus am bi e glan. Agus ge bè a bheanas ri nì air bith a tha neòghlan leis a’ mharbh, no duine aig a bheil a shìol a’ dol uaithe;

⁵ No ge bè a bheanas ri nì air bith a shnàigeas leis an dèanar neòghlan e, no ri duine om faigh e neòghlaine, ge bè air bith neòghlaine a bhios air;

⁶ An t‑anam a bheanas ri aon air bith den leithidean sin, bidh e neòghlan gu feasgar, agus chan ith e de na nithean naomha, mura nigh e a fheòil le uisge.

⁷ Agus nuair a thèid a’ ghrian sìos, bidh e glan, agus an dèidh sin ithidh e de na nithean naomha, a chionn gur e a bhiadh e.

⁸ An nì sin a bhàsaicheas leis fhèin, no a reubar le fiadh‐bheathaichean, chan ith e, ga shalachadh fhèin leis: Is mise an Tighearna.

⁹ Gleidhidh iad uime sin m’òrdagh, air eagal gun giùlain iad peacadh air a shon, agus uime sin gum faigh iad bàs, ma thruailleas iad e: tha mise an Tighearna gan naomhachadh.

¹⁰ Chan ith coigreach sam bith den nì naomh: chan ith fear‐cuairt an t‑sagairt, no seirbhiseach tuarasdail den nì naomh.

¹¹ Ach ma cheannaicheas an sagart duine le a airgead, ithidh e dheth, agus esan a rugadh na thaigh; ithidh iad de a bhiadh.

¹² Agus ma bhios nighean an t‑sagairt pòsda ri coigreach, chan fhaod i ithe de thabhartas nan nithean naomha.

¹³ Ach ma bhios nighean an t‑sagairt na bantraich, no dealaichte ra fear, agus gun sliochd aice, agus i air tilleadh gu taigh a h‑athar, mar na h‑òige, ithidh i de bhiadh a h‑athar; ach chan ith coigreach sam bith dheth.

¹⁴ Agus ma dh’itheas duine den nì naomh gun fhios dha, an sin cuiridh e an còigeamh cuid dheth ris, agus bheir e don t‑sagart e, maille ris an nì naomh.

¹⁵ Agus cha truaill iad nithean naomha chloinn Israeil, a bheir iad suas don Tighearna;

¹⁶ Cha mhò a leigeas iad leo cionta an easaontais a ghiùlan nuair a dh’itheas iad an nithean naomha: oir tha mise an Tighearna gan naomhachadh.

¹⁷ Agus labhair an Tighearna ri Maois, ag ràdh,

¹⁸ Labhair ri Aaron agus ra mhic, agus ri cloinn Israeil uile, agus abair riu, Ge bè air bith e de thaigh Israeil, no de na coigrich ann an Israel, a bheir seachad a thabhartas airson a bhòidean uile, no airson a shaor‐thabhartas uile, a bheir iad seachad don Tighearna a‑chum ìobairt‐loisgte;

¹⁹ Bheir sibh seachad de ur toil fhèin beathach fireann gun ghaoid den bhuar, de na caoraich, no de na gobhair.

²⁰ Ach ge bè air bith nì anns am bi gaoid, sin cha toir sibh seachad: oir cha ghabhar air ur son e.

²¹ Agus ge bè air bith e a bheir seachad ìobairt thabhartas‐sìthe don Tighearna, a choileanadh a bhòide, mar thabhartas saor‐thoile, den bhuar, no de na caoraich, bidh e iomlan, a‑chum is gun gabhar ris: cha bhi gaoid sam bith ann.

²² Dall, no briste, no ciurramach, no air am bi fliodh, no càrr, no cloimh, cha toir sibh seachad iad sin don Tighearna, cha mhò a bheir sibh tabhartas dhiubh a bheirear suas le teine air an altair don Tighearna.

²³ Aon chuid tarbh no uan aig am bi nì sam bith thar a’ chòir, no a dh’uireasbhaidh na bhuill, sin faodaidh tu a thoirt seachad mar shaor‐thabhartas; ach airson bòide cha ghabhar ris.

²⁴ Nì sam bith a tha brùite, no pronnte, no reubte, no geàrrte, cha toir sibh seachad don Tighearna; agus chan ìobair sibh e nur tìr.

²⁵ Agus o làimh coigrich cha toir sibh seachad aran ur Dè de aon dhiubh sin; a chionn gu bheil an truaillidheachd annta, agus gu bheil gaoidean annta: cha ghabhar riu air ur son.

²⁶ Agus labhair an Tighearna ri Maois, ag ràdh,

²⁷ Nuair a bheirear tarbh, no caora, no gobhar, an sin bidh e seachd làithean fo a mhàthair; agus on ochdamh là agus à sin suas, gabhar ris mar thabhartas a bheirear suas le teine don Tighearna.

²⁸ Agus mas bò no caora a bhios ann, cha mharbh sibh i fhèin agus a h‑àl anns an aon là.

²⁹ Agus nuair a dh’ìobras sibh ìobairt‐bhuidheachais don Tighearna, ìobraidh sibh i de ur toil fhèin.

³⁰ Air an là sin fhèin ithear suas i, chan fhàg sibh a’ bheag dhith gu madainn: Is mise an Tighearna.

³¹ Air an adhbhar sin, gleidhidh sibh m’àitheantan, agus nì sibh iad: Is mise an Tighearna.

³² Agus cha truaill sibh m’ainm naomh‐sa, agus bidh mi air mo naomhachadh am measg chloinn Israeil: Is mise an Tighearna a tha gur naomhachadh,

³³ A thug a‑mach sibh à tìr na h‑Eiphit gu bhith am Dhia agaibh: Is mise an Tighearna.