Lebhiticus 15 - Am Bìoball Iomraidh Gàidhlig 1880 1992

1, 19 Neòghlaine le siltichean: 13, 28 mar a ghlanar iad.

¹ Agus labhair an Tighearna ri Maois, agus ri Aaron, ag ràdh,

² Labhraibh ri cloinn Israeil, agus abraibh riu, Nuair a bhios aig duine sam bith silteach o a fheòil, airson a shiltich bidh e neòghlan.

³ Agus is e seo a neòghlaine na shilteach: ma shileas a fheòil a‑mach a sileadh, no ma dhùinear a fheòil suas o a shilteach, is e seo a neòghlaine.

⁴ Gach leabaidh air an laigh esan air a bheil silteach, bidh i neòghlan: agus gach nì air an suidh e, bidh e neòghlan.

⁵ Agus gach neach a bheanas ra leabaidh, nighidh e a aodach, agus ionnlaididh e e fhèin ann an uisge, agus bidh e neòghlan gu feasgar.

⁶ Agus esan a shuidheas air nì sam bith air an do shuidh neach air a bheil silteach, nighidh e a aodach, agus ionnlaididh e e fhèin ann an uisge, agus bidh e neòghlan gu feasgar.

⁷ Agus esan a bheanas ri feòil neach air a bheil silteach, nighidh e a aodach, agus ionnlaididh e e fhèin ann an uisge, agus bidh e neòghlan gu feasgar.

⁸ Agus ma thilgeas esan air a bheil silteach smugaid airsan a tha glan, an sin nighidh e a aodach, agus ionnlaididh e e fhèin ann an uisge, agus bidh e neòghlan gu feasgar.

⁹ Agus gach dìollaid air am marcaich esan air a bheil silteach, bidh i neòghlan.

¹⁰ Agus gach neach a bheanas ri nì sam bith a bha foidhe, bidh e neòghlan gu feasgar: agus esan a ghiùlaineas aon air bith de na nithean sin, nighidh e a aodach, agus ionnlaididh e e fhèin ann an uisge, agus bidh e neòghlan gu feasgar.

¹¹ Agus gach neach ris am bean esan air a bheil silteach, agus nach d’ionnlaid a làmhan ann an uisge, nighidh e a aodach, agus ionnlaididh e e fhèin ann an uisge, agus bidh e neòghlan gu feasgar.

¹² Agus an soitheach creadha ris am bean esan air a bheil silteach, brisear e: agus gach soitheach fiodha, nighear ann an uisge e.

¹³ Agus nuair a ghlanar esan air a bheil silteach o a shilteach, an sin àirmhidh e dha fhèin seachd làithean airson a ghlanaidh, agus nighidh e a aodach, agus ionnlaididh e a fheòil ann an uisge‐ruith, agus bidh e glan.

¹⁴ Agus air an ochdamh là gabhaidh e dha fhèin dà thurtar, no dà chalaman òg, agus thig e an làthair an Tighearna, gu doras pàillean a’ choitheanail, agus bheir e iad don t‑sagart.

¹⁵ Agus ìobraidh an sagart iad, aon dhiubh mar ìobairt‐pheacaidh, agus an t‑aon eile mar ìobairt‐loisgte; agus nì an sagart rèite air a shon an làthair an Tighearna a‑thaobh a shiltich.

¹⁶ Agus ma dh’fhalbhas a shìol‐gin o dhuine sam bith, an sin nighidh e a fheòil uile ann an uisge, agus bidh e neòghlan gu feasgar.

¹⁷ Agus gach aodach, agus gach craiceann air am bi an sìol‐gin, nighear e ann an uisge, agus bidh e neòghlan gu feasgar.

¹⁸ Mar an ceudna, a’ bhean leis an laigh fear le sìol‐gin, nighidh iad araon iad fhèin ann an uisge, agus bidh iad neòghlan gu feasgar.

¹⁹ Agus nuair a bhios silteach air mnaoi, agus gur fuil a bhios na silteach na feòil, seachd làithean cuirear air leth i; agus gach neach a bheanas rithe, bidh e neòghlan gu feasgar.

²⁰ Agus gach nì air an laigh i nuair a chuirear air leth i, bidh e neòghlan: gach nì mar an ceudna air an suidh i, bidh e neòghlan.

²¹ Agus gach neach a bheanas ra leabaidh nighidh e a aodach, agus ionnlaididh e e fhèin ann an uisge, agus bidh e neòghlan gu feasgar.

²² Agus gach neach a bheanas ri nì sam bith air an do shuidh i, nighidh e a aodach, agus ionnlaididh e e fhèin ann an uisge, agus bidh e neòghlan gu feasgar.

²³ Agus ma bhios e air a leabaidh, no air nì sam bith air an suidh i, nuair a bheanas e ris, bidh e neòghlan gu feasgar.

²⁴ Agus ma laigheas fear sam bith maille rithe, agus gum bi a fuil‐mìos air, bidh e neòghlan seachd làithean, agus bidh gach leabaidh air an laigh e neòghlan.

²⁵ Agus nuair a bhios a silteach fala air mnaoi mòran de làithean, chan ann an àm a dealachaidh, no ma shileas e an dèidh àm a dealachaidh, bidh uile làithean sileadh a neòghlaine mar làithean a dealachaidh: bidh i neòghlan.

²⁶ Gach leabaidh air an laigh i rè uile làithean a siltich, bidh i dhi mar leabaidh a dealachaidh: agus gach nì air an suidh i, bidh e neòghlan, a rèir neòghlaine a dealachaidh.

²⁷ Agus gach neach a bheanas ris na nithean sin, bidh e neòghlan; agus nighidh e a aodach, agus ionnlaididh e e fhèin ann an uisge, agus bidh e neòghlan gu feasgar.

²⁸ Ach ma ghlanar i o a silteach, an sin àirmhidh i dhi fhèin seachd làithean, agus an dèidh sin bidh i glan:

²⁹ Agus air an ochdamh là gabhaidh i dhi fhèin dà thurtar, no dà chalaman òg, agus bheir i iad a dh’ionnsaigh an t‑sagairt, gu doras pàillean a’ choitheanail;

³⁰ Agus ìobraidh an sagart aon dhiubh mar ìobairt‐pheacaidh, agus an t‑aon eile mar ìobairt‐loisgte; agus nì an sagart rèite air a son an làthair an Tighearna, airson silteach a neòghlaine.

³¹ Mar seo dealaichidh sibh clann Israeil on neòghlaine, a‑chum is nach bàsaich iad nan neòghlaine, nuair a thruailleas iad mo phàillean‐sa a tha nam measg.

³² Is e seo lagh an fhir air a bheil silteach, agus an fhir sin aig an tèid a shìol uaithe, agus a shalaichear leis;

³³ Agus na mnà a bhios gu tinn ann an àm a dealachaidh, agus an neach sin air am bi silteach, an fhir, agus na mnà, agus an duine sin a laigheas leathase a tha neòghlan.