Lebhiticus 11 - Am Bìoball Iomraidh Gàidhlig 1880 1992

1 Mu bheathaichean glan, 4 agus mu bheathaichean neòghlan.

¹ Agus labhair an Tighearna ri Maois, agus ri Aaron, ag ràdh riu,

² Labhraibh ri cloinn Israeil, ag ràdh, Is iad seo na beathaichean a dh’itheas sibh de na h‑uile ainmhidhean a tha air an talamh.

³ Gach aon a roinneas an ionga, agus a sgoilteas an ladhar, agus a chnàmhas a’ chìr, am measg nan ainmhidh, sin ithidh sibh.

⁴ Ach iad seo chan ith sibh, dhiùbhsan a chnàmhas a’ chìr, no dhiùbhsan a roinneas an ionga: mar an càmhal, a chionn ged chnàmh e a’ chìr, nach roinn e an ionga; neòghlan tha e dhuibh.

⁵ Agus an coinean, a chionn ged chnàmh e a’ chìr, nach roinn e an ionga; neòghlan tha e dhuibh.

⁶ Agus a’ mhaigheach, a chionn ged chnàmh i a’ chìr, nach roinn i an ionga; neòghlan tha i dhuibh.

⁷ Agus a’ mhuc, a chionn ged roinn i an ionga, agus ged sgoilt i an ladhar, gidheadh nach cnàmh i a’ chìr; neòghlan tha i dhuibh.

⁸ Dem feòil chan ith sibh, agus rin cairbh cha bhean sibh; neòghlan tha iad dhuibh.

⁹ Iad seo ithidh sibh, dhiùbhsan uile a tha anns na h‑uisgeachan: gach nì air a bheil itean agus lannan anns na h‑uisgeachan, anns na cuantan, agus anns na h‑aibhnichean, iad sin ithidh sibh.

¹⁰ Agus gach nì air nach eil itean no lannan anns na cuantan, agus anns na h‑aibhnichean, de gach nì a ghluaiseas anns na h‑uisgeachan, agus de gach nì beò, a tha anns na h‑uisgeachan; nan gràinealachd bidh iad dhuibh:

¹¹ Eadhon nan gràinealachd bidh iad dhuibh: dem feòil chan ith sibh, agus den cairbhean gabhaidh sibh gràin.

¹² Gach nì air nach eil itean no lannan anns na h‑uisgeachan, na ghràinealachd bidh sin dhuibh.

¹³ Agus dhiubh seo gabhaidh sibh gràin am measg nan eun; chan ithear iad, nan gràinealachd tha iad: an iolair, agus an cnàimh‐bhristeach, agus an iolair‐uisge,

¹⁴ Agus am fang, agus an clamhan a rèir a ghnè;

¹⁵ Gach fitheach a rèir a ghnè;

¹⁶ Agus a’ chailleach‐oidhche, agus an t‑seabhag‐oidhche, agus a’ chuach, agus an t‑seabhag a rèir a ghnè,

¹⁷ Agus a’ chailleach‐oidhche bheag, agus an sgarbh, agus a’ chailleach‐oidhche mhòr,

¹⁸ Agus an eala, agus am pelican, agus an iolair‐fhionn.

¹⁹ Agus a’ chorra‑bhàn, agus a’ chorra‑ghlas a rèir a gnè, agus an t‑adharcan‐luachrach, agus an ialtag.

²⁰ Bidh gach nì snàigeach a dh’itealaicheas, agus a dh’imicheas air ceithir chasan, na ghràinealachd dhuibh.

²¹ Ach iad seo faodaidh sibh ithe, de gach nì snàigeach a dh’itealaicheas, agus a dh’imicheas air ceithir chasan, aig a bheil luirgnean os cionn a throighean, gu leum leo air an talamh.

²² Eadhon iad seo dhiubh faodaidh sibh ithe: an lòcast a rèir a ghnè, agus an lòcast maol a rèir a ghnè, agus an daol a rèir a ghnè, agus an leumnach uaine a rèir a ghnè.

²³ Ach bidh gach nì eile snàigeach a dh’itealaicheas, aig a bheil ceithir chasan, na ghràinealachd dhuibh.

²⁴ Agus air an son sin bidh sibh neòghlan: gach neach a bheanas rin cairbh, bidh e neòghlan gu feasgar.

²⁵ Agus ge bè air bith a ghiùlaineas a’ bheag den cairbh, nighidh e a aodach, agus bidh e neòghlan gu feasgar.

²⁶ Bidh cairbhean gach ainmhidh a roinneas an ionga, agus nach sgoilt an ladhar, agus nach cnàmh a’ chìr, neòghlan dhuibh: gach neach a bheanas riu, bidh e neòghlan.

²⁷ Agus ge bè air bith a dh’imicheas air a mhàgan, am measg nan uile bheathaichean a dh’imicheas air ceithir chasan, bidh e neòghlan dhuibh; gach neach a bheanas rin cairbh, bidh e neòghlan gu feasgar.

²⁸ Agus esan a ghiùlaineas an cairbh, nighidh e a aodach, agus bidh e neòghlan gu feasgar; neòghlan tha iad dhuibh.

²⁹ Agus bidh iad seo neòghlan dhuibh am measg nan nithean snàigeach a shnàigeas air an talamh: an neas, agus an luch, agus an crocodail a rèir a ghnè.

³⁰ Agus am firead, agus an cameleon, agus an dearc‐luachrach, agus an t‑seilcheag, agus am famh.

³¹ Tha iad sin neòghlan dhuibh nam measg‐san uile a shnàigeas: gach neach a bheanas riu, nuair a bhios iad marbh, bidh e neòghlan gu feasgar.

³² Agus gach nì air an tuit a h‑aon dhiubh, nuair a bhios e marbh, bidh e neòghlan; co‑dhiù as soitheach fiodha sam bith e, no aodach, no craiceann, no sac: feumaidh gach soitheach anns an dèanar obair sam bith a bhith air a chur ann an uisge, agus bidh e neòghlan gu feasgar; an sin bidh e glan.

³³ Agus a‑thaobh gach soithich creadha, anns an tuit a h‑aon dhiubh, bidh gach nì a tha ann neòghlan; agus brisidh sibh e.

³⁴ De gach uile bhiadh a dh’ithear, bidh am biadh air an tig an t‑uisge sin neòghlan; agus bidh gach deoch a dh’òlar, ann an soitheach sam bith dhiubh, neòghlan.

³⁵ Agus bidh gach nì air an tuit a’ bheag den cairbh, neòghlan; mas àmhainn e, no coireachan, brisear sìos iad: neòghlan tha iad, agus neòghlan bidh iad dhuibh.

³⁶ Gidheadh bidh fuaran no tobar, anns am bi pailteas uisge, glan: ach bidh an nì sin a bheanas rin cairbh, neòghlan.

³⁷ Agus ma thuiteas a’ bheag den cairbh air sìol‐cuir sam bith, a bhios ri a chur, bidh e glan.

³⁸ Ach ma chuirear uisge sam bith air an t‑sìol, agus gun tuit a’ bheag den cairbh air, neòghlan bidh e dhuibh.

³⁹ Agus ma bhàsaicheas ainmhidh sam bith dem faod sibh ithe, bidh esan a bheanas ra chairbh neòghlan gu feasgar.

⁴⁰ Agus esan a dh’itheas de a chairbh, nighidh e a aodach, agus bidh e neòghlan gu feasgar; esan mar an ceudna a ghiùlaineas a’ chairbh, nighidh e a aodach, agus bidh e neòghlan gu feasgar.

⁴¹ Agus bidh gach nì snàigeach a shnàigeas air an talamh, na ghràinealachd: chan ithear e.

⁴² Gach nì a dh’imicheas air a’ bhroinn, agus gach nì a dh’imicheas air ceithir chasan, no ge bè air bith aig a bheil tuilleadh chasan am measg nan uile nithean snàigeach a shnàigeas air an talamh; chan ith sibh iad oir is gràinealachd iad.

⁴³ Cha dèan sibh sibh fhèin gràineil le nì snàigeach sam bith a shnàigeas, cha mhò a nì sibh sibh fhèin neòghlan leo, air chor is gun truaillear sibh leo.

⁴⁴ Oir is mise an Tighearna ur Dia: naomhaichidh sibh air an adhbhar sin sibh fhèin, agus bidh sibh naomh; oir tha mise naomh: agus cha truaill sibh sibh fhèin le nì snàigeach sam bith a shnàigeas air an talamh.

⁴⁵ Oir is mise an Tighearna a thug sibhse a‑mach à tìr na h‑Eiphit, gu bhith am Dhia agaibh; bidh sibhse uime sin naomh, oir tha mise naomh.

⁴⁶ Is e seo lagh nan ainmhidh, agus na h‑eunlaith, agus gach dùile bheò a ghluaiseas anns na h‑uisgeachan, agus gach dùile a shnàigeas air an talamh:

⁴⁷ A chur dealachaidh eadar an neòghlan agus an glan, agus eadar am beathach a dh’fhaodar ithe, agus am beathach nach faodar ithe.