Isaiah 56 - Am Bìoball Iomraidh Gàidhlig 1880 1992

1 Earail gu breitheanas a choimhead. 3 Tha Dia a’ gealltainn gun gabh e ris gach neach a ghluaiseas gu taitneach na làthair. 9 Tha trioblaidean na h‑eaglais ag èirigh o luchd‐faire dall agus aineolach.

¹ Mar seo deir an Tighearna, Coimheadaibh breitheanas, agus dèanaibh ceartas; oir tha mo shlàinte dlùth a‑chum teachd, agus m’fhìreantachd a‑chum a bhith air a foillseachadh.

² Is beannaichte an duine a nì seo, agus mac an duine a nì greim air; a choimheadas an t‑sàbaid gun a mì‑naomhachadh, agus a choimheadas a làmh o aon olc a dhèanamh.

³ Agus na labhradh mac a’ choigrich, a tha a’ dlùth‐leantainn ris an Tighearna, ag ràdh, Sgar an Tighearna mise gu tur o a shluagh; agus na h‑abradh an caillteanach, Feuch, tha mise am chrann tioram.

⁴ Oir mar seo deir an Tighearna, Do na caillteanaich a choimheadas mo shàbaidean, agus a roghnaicheas an nì a thaitneas rium, agus a nì greim air mo choicheangal;

⁵ Dhaibh sin bheir mi ann am thaigh, agus an taobh a‑staigh dem bhallachan, àite agus ainm nas fheàrr na ainm mhac agus nighean; ainm sìorraidh bheir mi dhaibh, nach gearrar as.

⁶ Agus mic a’ choigrich a tha a’ dlùth‐leantainn ris an Tighearna, gu frithealadh dha, agus gràdh a thoirt do ainm an Tighearna, agus gu bhith nan òglaich dha; gach aon a ghleidheas an t‑sàbaid gun a mì‑naomhachadh, agus a nì greim air mo choicheangal;

⁷ Iad sin bheir mi a‑chum mo shlèibh naoimh; agus nì mi aoibhneach iad ann am thaigh‐ùrnaigh; bidh an tabhartasan‐loisgte agus an ìobairtean air an gabhail gu taitneach air m’altair; oir goirear rim thaigh‐sa, Taigh‐ùrnaigh airson nan uile shlògh.

⁸ Mar seo deir an Tighearna Iehòbhah, a tha a’ cruinneachadh ri chèile dìobarraich Israeil: Fhathast cruinnichidh mi muinntir eile da ionnsaigh, os bàrr orrasan a tha air an cruinneachadh.

⁹ O! uile bheathaichean na machrach thigibh a‑chum ithe; O! uile bheathaichean na frìthe!

¹⁰ Tha a luchd‐faire dall, gach aon dhiubh; tha iad aineolach, gach aon dhiubh; is coin bhalbh iad nach urrainn tabhannaich; a’ tuiteam nan cadal, gan sìneadh fhèin sìos, leis an ionmhainn cadal.

¹¹ Seadh, is coin chìocrach iad nach urrainn a bhith toilichte; agus is buachaillean iad nach urrainn tuigsinn; tha iad a’ sealltainn, gach aon dhiubh, air a shlighe fhèin; gach fear air a bhuannachd o a chrìch fhèin.

¹² Thigibh, deir iad, gabhamaid fìon, agus òlamaid deoch làidir; agus mar an là‑an‑diugh bidh a‑màireach, agus nas ro‑phailte gu mòr.