Isaiah 40 - Am Bìoball Iomraidh Gàidhlig 1880 1992

1 Thug Dia comhfhurtachd da shluagh. 3 Searmonachadh Eòin Bhaistidh. 9 Deagh sgeul an t‑soisgeil. 12 Mòrachd agus cumhachd an Tighearna.

¹ Thugaibh comhfhurtachd, thugaibh comhfhurtachd dom shluagh‐sa, deir ur Dia.

² Labhraibh gu sòlasach ri Ierusalem; agus glaodhaibh rithe gun do choileanadh a cogadh, gun do ghlanadh a h‑aingidheachd; oir fhuair i o làimh an Tighearna a dhà uiread ra h‑uile pheacaidhean.

³ Guth an tì a ghlaodhas anns an fhàsach, Ullaichibh slighe an Tighearna; rèitichibh anns an dìthreabh slighe àrd dar Dia‑ne.

⁴ Bidh gach gleann air àrdachadh, agus gach sliabh agus cnoc air ìsleachadh; agus nìthear an cam dìreach, agus na h‑ionadan garbha nan còmhnard rèidh.

⁵ Agus foillsichear glòir an Tighearna, agus chì gach uile fheòil i le chèile; oir is e beul an Tighearna a labhair.

⁶ Tha guth ag ràdh, Eigh; agus thubhairt mise, Ciod a dh’èigheas mi? Is feur gach uile fheòil, agus tha a h‑òirdheirceas uile mar bhlàth na machrach:

⁷ Tha am feur a’ seargadh, am blàth a’ crìonadh, nuair a shèideas gaoth an Tighearna air; gu cinnteach is feur an sluagh.

⁸ Tha am feur a’ seargadh, am blàth a’ crìonadh; ach seasaidh facal ar Dè‑ne gu sìorraidh.

⁹ O thusa a tha a’ tabhairt deagh sgeòil do Shion, gabh suas gu sliabh àrd; O thusa a tha a’ tabhairt deagh sgeòil do Ierusalem, tog do ghuth le neart; tog e, na biodh eagal ort; abair ri bailtean Iùdah, Feuch, ur Dia!

¹⁰ Feuch, thig an Tighearna Iehòbhah le làimh làidir, agus bheir a ghàirdean buaidh a‑mach dha; feuch, tha a dhuais maille ris, agus a obair na fhianais.

¹¹ Mar bhuachaille beathaichidh e a threud; le a ghàirdean cuartaichidh e na h‑uain, agus giùlainidh e iad na uchd; iomainidh e gu sèimh an sprèidh a tha trom le àl.

¹² Cò a thomhais na h‑uisgeachan ann an glaic a làimhe; agus a shìn a‑mach na nèamhan le rèis; agus a chruinnich duslach na talmhainn ann an soitheach‐tomhais; agus a chothromaich na slèibhtean ann an slighean, agus na cnuic ann am meidh‐chothroim?

¹³ Cò a sheòl Spiorad an Tighearna, no mar aon de a chomhairle, a theagaisg e?

¹⁴ Cò ris a chuir e a chomhairle, agus cò a theagaisg e, agus a sheòl dha ceum a’ bhreitheanais, agus a dh’ionnsaich dha eòlas, agus a sheòl dha slighe na tuigse?

¹⁵ Feuch, tha na cinnich mar bhoinne an t‑soithich‐uisge; agus measar iad mar dhus mìn na slige‐tomhais: feuch, togaidh e suas na h‑eileanan mar smùirnean:

¹⁶ Agus cha leòr Lebanon gu a losgadh, agus cha leòr a bheathaichean airson ìobairt‐loisgte.

¹⁷ Tha na cinnich uile mar neoni na làthair‐san; tha iad air am meas leis mar fhìor neoni agus dìomhanas.

¹⁸ Cò ris, mas eadh, a shamhlaicheas sibh Dia? Agus ciod an coslas a nì sibh dha?

¹⁹ Tilgidh am fear‐ceàirde dealbh snaidhte, agus cuiridh an t‑òr‑cheàrd thairis e le òr; agus nì e slabhraidhean airgid air a shon.

²⁰ Am fear aig nach eil fiù tabhartais, taghaidh e mìr fiodha nach grod; iarraidh e a‑mach dha fhèin fear‐obrach seòlta, a chuireas an uidheam dealbh snaidhte nach tèid a ghluasad.

²¹ Nach d’fhuair sibh fios? Nach cuala sibh sgeul? Nach do chuireadh an cèill dhuibh o thùs? Nach do thuig sibh o leagadh bunaitean na talmhainn?

²² Is esan a tha na shuidhe air cuairt na talmhainn, agus tha a luchd‐àiteachaidh mar fhionnain‐fheòir; a tha a’ sìneadh a‑mach nan nèamhan mar sgàil thana, agus gan sgaoileadh mar bhùth anns an gabhar còmhnaidh;

²³ A tha a’ tabhairt phrionnsachan gu neoni, agus a’ dèanamh bhritheamhan nan dìomhanas.

²⁴ Seadh, cha suidhichear iad, cha mhò a chuirear iad, cha mhò a fhreumhaicheas am bun anns an talamh; nuair a shèideas e orra, seargaidh iad; agus bheir a’ chuairt‐ghaoth air falbh iad mar asbhuain.

²⁵ Cò ris, ma ta, a shamhlaicheas sibh mise, no a choimeasar mi? deir an Tì naomh.

²⁶ Togaibh ur sùilean an àird, agus feuchaibh, cò a chruthaich iad seo: Esan a bheir a‑mach an armailtean air àireamh; a ghairmeas orra uile air an ainm; tro mheud a neirt agus treise a chumhachd, cha bhi aon air chall.

²⁷ Cia uime a their thusa, O Iàcoib, agus a labhras tu, O Israeil, Tha mo shlighean falaichte on Tighearna, tha mo chòir air a leigeadh air dearmad lem Dhia?

²⁸ Nach aithne dhut, nach cuala tu? An Dia bithbhuan, an Tighearna, Cruithear crìochan na talmhainn, chan fhannaich agus cha sgìthich e; chan fhaodar a thuigse a rannsachadh.

²⁹ Bheir esan neart don anfhann, agus dhaibhsan a tha gun lùth meudaichidh e treise.

³⁰ Fàsaidh na h‑òigfhir lag agus sgìth, agus tuitidh an òigridh thaghte gu làr;

³¹ Ach iadsan a dh’fheitheas air an Tighearna, gheibh iad spionnadh nuadh; èiridh iad suas mar iolair air a sgiathan; ruithidh iad agus cha bhi iad sgìth, siùbhlaidh iad agus chan fhàs iad fann.