Isaiah 37 - Am Bìoball Iomraidh Gàidhlig 1880 1992

1 Na theanntachd chuir Heseciah fios a dh’ionnsaidh Isaiah gu ùrnaigh a dhèanamh air a shon. 8 Litir Shenacherib. 14 Ùrnaigh Heseciah. 21 Ro‑innis Isaiah sgrios Shenacherib. 36 Bhuail aingeal an Tighearna camp nan Asirianach.

¹ Agus nuair a chuala Heseciah an rìgh e, reub e aodach, agus chòmhdaich e e fhèin le aodach‐saic, agus chaidh e a‑steach do thaigh an Tighearna.

² Agus chuir e Eliacim a bha os cionn an taighe, agus Sebnah an sgrìobhaiche, agus seanairean nan sagart, còmhdaichte le aodach‐saic, gu Isaiah mac Amois, am fàidh.

³ Agus thubhairt iad ris, Mar seo deir Heseciah, Is là teinn agus achmhasain agus maslaidh an là seo; oir tha clann air teachd gu inbhe breith, agus neart gu breith chan eil ann.

⁴ Theagamh gun tabhair an Tighearna do Dhia fa‑near briathran Rab‐saceh, a chuir a thighearna rìgh Asiria a mhaslachadh an Dè bheò; agus gun cronaich e na briathran a chuala an Tighearna do Dhia: cuir thusa, matà, suas ùrnaigh airson an iarmaid a dh’fhàgadh.

⁵ Mar sin thàinig òglaich rìgh Heseciah gu Isaiah.

⁶ Agus thubhairt Isaiah riu, Mar seo their sibh ri ur tighearna, Mar seo tha an Tighearna ag ràdh, Na biodh eagal ort airson nam briathran a chuala tu, leis an tug òglaich rìgh Asiria masladh dhòmhsa.

⁷ Feuch cuiridh mi osag air, agus cluinnidh e tuairisgeal, agus tillidh e da thìr fhèin, agus bheir mi air tuiteam leis a’ chlaidheamh na thìr fhèin.

⁸ Mar sin thill Rab‐saceh, agus fhuair e rìgh Asiria a’ cogadh an aghaidh Libnah; oir chuala e gun d’fhalbh e o Lachis.

⁹ Agus nuair a chuala e mu thimcheall Thirhacah rìgh Etiopia, ag ràdh, Thàinig e a‑mach a chogadh riut: chuir e teachdairean gu Heseciah, ag ràdh,

¹⁰ Mar seo their sibh ri Heseciah rìgh Iùdah, Na mealladh do Dhia thu, as a bheil thu ag earbsa, ag ràdh, Cha toirear Ierusalem thairis do làimh rìgh Asiria.

¹¹ Feuch, chuala tu ciod a rinn rìghrean Asiria ris na dùthchannan uile, gan sgrios gu tur; agus am bi thusa air do thèarnadh?

¹² An do theasairg diathan nan cinneach iadsan a sgrios m’athraichean‐sa, eadhon Gosan, agus Hàran, agus Reseph, agus mic Edein a bha ann an Telasar?

¹³ Càit a bheil rìgh Hamait, agus rìgh Arphaid, agus rìgh mòr‐bhaile Shepharbhaim, Hena, agus Ibhah?

¹⁴ Agus ghabh Heseciah an litir o làimh nan teachdairean, agus leugh e i; agus chaidh Heseciah suas do thaigh an Tighearna, agus sgaoil e i am fianais an Tighearna.

¹⁵ Agus rinn Heseciah ùrnaigh ris an Tighearna, ag ràdh,

¹⁶ O Thighearna nan sluagh, a Dhia Israeil, a tha ad chòmhnaidh eadar na ceruban; is tusa fhèin ad aonar Dia uile rìoghachdan na talmhainn; is tu a rinn na nèamhan agus an talamh.

¹⁷ Crom, O Thighearna, do chluas, agus cluinn; fosgail, O Thighearna, do shùilean, agus faic; agus cluinn uile bhriathran Shenacherib, a chuir e a mhaslachadh an Dè bheò.

¹⁸ Gu deimhinn, O Thighearna, sgrios rìghrean Asiria na cinnich uile, agus am fearann.

¹⁹ Agus thilg iad an diathan anns an teine; oir cha bu diathan iad, ach obair làmhan duine, fiodh agus clach; uime sin sgrios iadsan iad.

²⁰ Ach a‑nis, O Thighearna ar Dia, teasairg sinn o a làimh; a‑chum gum bi fhios aig uile rìoghachdan na talmhainn gur tusa, a Thighearna, an t‑aon Dia.

²¹ An sin chuir Isaiah mac Amois fios gu Heseciah, ag ràdh, Mar seo deir an Tighearna, Dia Israeil, A‑thaobh na h‑ùrnaigh a rinn thu rium mu thimcheall Shenacherib rìgh Asiria;

²² Seo am facal a labhair an Tighearna ma thimcheall‐san: Rinn òigh‐nighean Shioin tàir ort, rinn i gàire fanaid riut; chrath nighean Ierusaleim a ceann air do chùlaibh.

²³ Cò don tug thu masladh agus toibheum? Agus cò a thog thu do ghuth na aghaidh, agus a thog thu suas do shùilean gu h‑àrd? An ann an aghaidh Tì naomh Israeil?

²⁴ Led luchd‐muinntir mhaslaich thu an Tighearna, agus thubhairt thu, Le lìonmhorachd mo charbad dhìrich mi àirde nam beann, sliosan Lebanoin; agus gearraidh mi sìos a’ chuid as àirde de a chraobhan seudair, rogha a chraobhan giuthais; agus thèid mi a‑steach do ionad àrd a chrìche, frìth a Charmeil.

²⁵ Chladhaich mi agus dh’òl mi uisgeachan; agus le bonn mo chas thiormaich mi uile shruthan nan ionad daingnichte.

²⁶ Nach cuala tu o shean gun do rinn mi e, agus o aimsirean cèin gun do dhealbh mi e? A‑nis thug mi gu crìch e, gum biodh tusa a‑chum bailtean daingnichte a chur fàs nan cùirn sgrios.

²⁷ Uime sin bha an luchd‐àiteachaidh air bheag neart; bha iad fo gheilt‐chrith agus amhluadh; bha iad mar fheur na machrach, agus mar an luibh uaine; mar fheur mullach an taighe, agus mar an t‑arbhar a sheargas mum fàs e suas.

²⁸ Ach is aithne dhomh do shuidhe sìos, agus do dhol a‑mach, agus do theachd a‑steach, agus do bhoile am aghaidh.

²⁹ A chionn gun tàinig do bhoile am aghaidh, agus d’àrdan a‑nìos gum chluasan; air an adhbhar sin cuiridh mi mo dhubhan ann ad shròin, agus mo shrian ann ad bheul; agus tillidh mi air d’ais thu air an t‑slighe air an tàinig thu.

³⁰ Agus bidh seo na chomharradh dhut: Ithibh air a’ bhliadhna seo an nì sin a dh’fhàsas leis fhèin, agus an dara bliadhna an nì a chinneas as a sin; agus an treas bliadhna cuiribh agus buainibh; agus suidhichibh fìon‐liosan, agus ithibh an toradh.

³¹ Agus gabhaidh am fuidheall a thèid as de thaigh Iùdah fhathast freumh sìos, agus giùlainidh e toradh suas.

³² Oir o Ierusalem thèid fuidheall a‑mach, agus iadsan a thèid as o shliabh Shioin: nì eud Tighearna nan sluagh seo a choileanadh.

³³ Air an adhbhar sin, mar seo deir an Tighearna mu thimcheall rìgh Asiria, Cha tig e a‑steach don chathair seo, agus cha tilg e saighead innte, agus cha tog e sgiath fa comhair, agus cha chuir e suas tòrr na h‑aghaidh.

³⁴ Air an t‑slighe air an tàinig e, mar sin tillidh e; agus don chathair seo cha tig e a‑steach, deir an Tighearna.

³⁵ Agus dìonaidh mise a’ chathair seo a‑chum a tèarnadh, air mo sgàth fhèin, agus air sgàth Dhaibhidh m’òglach.

³⁶ Agus chaidh aingeal an Tighearna a‑mach, agus bhuail e ann an camp nan Asirianach ceud agus ceithir‐fichead agus còig mìle; agus nuair a dh’èirich daoine anns a’ mhadainn, bha iad sin uile nan cuirp mharbha.

³⁷ Agus thog Senacherib rìgh Asiria air, agus dh’fhalbh e, agus thill e, agus ghabh e còmhnaidh ann an Ninebheh.

³⁸ Agus thàrladh, nuair a bha e ri adhradh ann an taigh Nisroch, a dhia, gun do bhuail Adramelec agus Sareser, a mhic, e leis a’ chlaidheamh, agus theich iad do thìr Armenia; agus rìghich Esarhadan a mhac na àite.