Isaiah 36 - Am Bìoball Iomraidh Gàidhlig 1880 1992

1 Ghlac Senacherib rìgh Asiria uile bhailtean daingnichte Iùdah. 2 Chuir e Rab‐saceh a dh’ionnsaidh Ierusaleim a thoirt maslaidh do Heseciah. 13 Briathran Rab‐saceh a labhair e ann an èisdeachd an t‑sluaigh. 22 Dh’innseadh iad do Heseciah.

¹ Agus thàrladh ann an ceathramh‐bliadhna‑deug rìgh Heseciah gun tàinig Senacherib rìgh Asiria a‑nìos an aghaidh uile bhailtean daingnichte Iùdah, agus ghlac e iad.

² Agus chuir rìgh Asiria Rab‐saceh o Lachis do Ierusalem a dh’ionnsaigh rìgh Heseciah, le armailt mhòir; agus sheas e aig sruth‐chlais na linne uachdaraich air rathad mòr achadh an luadhadair.

³ An sin thàinig a‑mach da ionnsaigh Eliacim mac Hilciah, a bha os cionn an taighe, agus Sebnah an sgrìobhaiche, agus Ioah mac Asaiph an seanchaidh.

⁴ Agus thubhairt Rab‐saceh riu, Abraibh a‑nis ri Heseciah, Mar seo deir an rìgh mòr, rìgh Asiria, Ciod e am bun‐dòchais seo as a bheil thu ag earbsa?

⁵ Tha thu ag ràdh (ach is briathran faoine iad), Tha comhairle agus neart agam airson a’ chogaidh; a‑nis cò as a bheil thu ag earbsa, gun dèanadh tu ceannairc am aghaidh‐sa?

⁶ Feuch, tha thu ag earbsa as an luirg bhriste chuilce sin, as an Eiphit; nì, ma leigeas duine a chudthrom air, a thèid a‑steach na làimh, agus a thollas troimhe i: mar seo tha Phàraoh, rìgh na h‑Eiphit, dhaibhsan uile a dh’earbas as.

⁷ Ach ma their thu rium, As an Tighearna ar Dia tha ar n‑earbsa; nach e sin esan a chuir Heseciah air falbh a ionadan àrda agus a altairean; agus thubhairt e ri Iùdah agus ri Ierusalem, Fa chomhair na h‑altarach seo sleuchdaidh sibh?

⁸ A‑nis uime sin, guidheam ort, thoir gèill dom thighearna, rìgh Asiria; agus bheir mise dhut dà mhìle each, mas urrainn thu, air do thaobh‐sa, marcaichean a chur orra.

⁹ Cionnas, matà, a thilleas tu air ais aon cheann‐feadhna de na seirbhisich as lugha tha aig mo thighearna, agus a dh’earbas tu as an Eiphit airson charbadan agus mharc‐shluaigh?

¹⁰ Agus a‑nis, an ann as eugmhais an Tighearna a thàinig mise a‑nìos an aghaidh na tìre seo, ga sgrios? Is e an Tighearna a thubhairt rium, Rach suas an aghaidh na tìre seo, agus sgrios i.

¹¹ An sin thubhairt Eliacim, agus Sebnah agus Iaoh ri Rab‐saceh, Labhair, guidheamaid ort, rid sheirbhisich anns a’ chainnt Shirianaich, oir tuigidh sinn i; agus na labhair rinn anns a’ chainnt Iùdhaich, ann an cluasan an t‑sluaigh a tha air a’ bhalla.

¹² Agus thubhairt Rab‐saceh, An ann a dh’ionnsaigh do thighearna‑sa, agus ad ionnsaigh‐sa, a chuir mo thighearna mise, a labhairt nam briathran seo? Nach ann a dh’ionnsaigh nan daoine a tha nan suidhe air a’ bhalla, a‑chum gun ith iad an salchar fhèin, agus gun òl iad an uisge fhèin, maille ribhse?

¹³ An sin sheas Rab‐saceh, agus ghlaodh e le guth àrd anns a’ chainnt Iùdhaich, agus thubhairt e, Cluinnibh briathran an rìgh mhòir, rìgh Asiria:

¹⁴ Mar seo deir an rìgh, Na mealladh Heseciah sibh, oir cha bhi e comasach air ur tèarnadh:

¹⁵ Agus na tugadh Heseciah oirbh ur dòchas a chur anns an Tighearna, ag ràdh, Gu cinnteach tèarnaidh an Tighearna sinn, cha toirear thairis am baile seo ann an làimh rìgh Asiria:

¹⁶ Na èisdibh ri Heseciah; oir mar seo deir rìgh Asiria, Dèanaibh coicheangal riumsa le tìodhlac, agus thigibh am ionnsaigh; agus itheadh gach fear de a chrann‐fìona, agus gach fear de a chrann‐fìge fhèin; agus òladh gach fear uisge a thobair fhèin;

¹⁷ Gus an tig mise agus gun toir mi sibh gu tìr cosmhail ri ur tìr fhèin; tìr arbhair agus fìona, tìr arain agus fhìonliosan.

¹⁸ Thugaibh an aire nach cuir Heseciah impidh oirbh, ag ràdh, Tèarnaidh an Tighearna sinn. An do theasairg diathan nan cinneach, gach aon a thìr fhèin, à làimh rìgh Asiria?

¹⁹ Càit a bheil diathan Hamait agus Arphaid? Càit a bheil diathan Shepharbhaim? An do theasairg iad Samaria as mo làimh‐sa?

²⁰ Cò am measg uile dhiathan nan dùthchannan seo a theasairg an tìr fhèin as mo làimh‐sa, gun teasairgeadh an Tighearna Ierusalem as mo làimh?

²¹ Ach dh’fhan iad nan tosd, agus cha tug iad facal freagraidh air; oir b’i àithne an rìgh, Na tugaibh freagradh air.

²² An sin thàinig Eliacim mac Hilciah, a bha os cionn an taighe, agus Sebnah an sgrìobhaiche, agus Ioah mac Asaiph an seanachaidh, gu Heseciah len aodach reubte, agus dh’innis iad dha briathran Rab‐saceh.