Isaiah 27 - Am Bìoball Iomraidh Gàidhlig 1880 1992

1 Cùram Dhè da fhìon‐lios. 7 Smachdaichidh Dia a shluagh ann an tròcair agus ann an tomhas ceart; 13 agus tionailidh e iad o gach tìr dan tugadh iad ann am braighdeanas.

¹ Anns an là sin smachdaichidh an Tighearna le a chlaidheamh cruaidh, agus mòr agus làidir, Lebhiatan, an nathair dhìreach, agus Lebhiatan, an nathair lùbach; agus marbhaidh e an dràgon a tha anns an fhairge.

² Anns an là sin, canaibh‐se do fhìonlios an fhìona dheirg:

³ Tha mise, an Tighearna, ga choimhead, uisgichidh mi e gach tiota; a‑chum is nach dochainn aon neach e, coimheadaidh mi e a là agus a dh’oidhche.

⁴ Annamsa chan eil dian‐chorraich. Cò a chuireadh an droigheann agus an dris am aghaidh anns a’ chath? Rachainn tromhpa, loisginn iad le chèile.

⁵ No dèanadh e greim air mo neart; dèanadh e sìth rium; sìth nì e rium.

⁶ Bheir e orrasan a thig o Iàcob freumhachadh; brisidh Israel a‑mach, agus thig e fo bhlàth; agus lìonaidh e aghaidh an t‑saoghail le toradh.

⁷ An do bhuail e e a rèir bualadh an tì a bhuail esan? A bheil e air a mharbhadh a rèir àr na muinntir a mharbhadh leis?

⁸ Ann an tomhas ceart nuair a bhriseas e a‑mach, nì thu tagradh ris. Choisg e a ghaoth gharbh ann an là na gaoithe an ear.

⁹ Uime sin, le seo glanar aingidheachd Iàcoib air falbh; agus is e seo an toradh uile a thabhairt air falbh a pheacaidh; nuair a nì e uile chlachan na h‑altarach mar chlachan aoil a tha air am pronnadh as a chèile, cha seas na doireachan no na dealbhan suas nas mò.

¹⁰ Ach bidh a’ chathair dhaingnichte fàs, agus an t‑àite‐còmhnaidh air a thrèigsinn, agus air fhàgail mar fhàsach; an sin ionaltraidh an laogh, agus an sin laighidh e sìos, agus ithidh e a geugan.

¹¹ Nuair a sheargas a meangain, brisear iad; thig mnathan agus cuiridh iad ri theine iad; oir is sluagh gun tuigse iad; uime sin cha ghabh an tì a rinn iad truas dhiubh; agus cha nochd esan a dhealbh iad coibhneas dhaibh.

¹² Agus tàrlaidh anns an là sin, gun dèan an Tighearna bualadh o chlais na h‑aibhne gu sruth na h‑Eiphit, agus tionailear sibhse suas, aon agus aon, O chlann Israeil.

¹³ Agus tàrlaidh anns an là sin gun sèidear a’ ghall‐tromp mhòr: agus thig iadsan a bha a’ bàsachadh ann an tìr Asiria, agus iadsan a bha air an sgapadh ann an tìr na h‑Eiphit; agus sleuchdaidh iad sìos don Tighearna, anns an t‑sliabh naomh ann an Ierusalem.