Isaiah 21 - Am Bìoball Iomraidh Gàidhlig 1880 1992

1 Ann an sealladh chunnaic am fàidh sgrios Bhàbiloin. 11 Thug e rabhadh do Edom. 13 Aimsir shuidhichte trioblaid Arabia.

¹ Trom‐eallach fàsach na fairge. Mar dhoineannan anns an àird a deas, a’ dol seachad: on fhàsach tha e a’ teachd, o thìr uamhasaich.

² Dh’fhoillsicheadh sealladh eagalach dhomh; tha an cealgair a’ caitheamh foill, agus tha am fear‐creachaidh a’ creachadh. Rach suas, O Elaim; teannaich, O Mhedia; chuir mise crìoch air a h‑uile osnaich.

³ Uime sin lìonadh mo leasraidh le cràdh; ghlac piantan mi, mar phiantan mnà ri saothair‐chloinne. Bha mi air mo chromadh sìos, nuair a chuala mi; dh’fhàs mi air chrith, nuair a chunnaic mi.

⁴ Chlisg mo chridhe; chuir uamhas fiamh orm; feasgar mo shòlais thionndaidh e gu uamhann dhomh.

⁵ Deasaich am bòrd; suidhich an fhaire; ith; òl; èiribh, a cheanna‑feadhna, ungaibh an sgiath.

⁶ Oir mar seo thubhairt an Tighearna rium, Imich, suidhich fear‐faire; an nì a chì e, innseadh e.

⁷ Agus chunnaic e carbad le dà mharcach, carbad le asail, agus carbad le càmhail; agus thug e fa‑near gu dìcheallach le geur aire;

⁸ Agus ghlaodh e, Leòmhainn: mo thighearna, tha mi am sheasamh an còmhnaidh ann am ionad‐faire, air feadh an là; agus tha mi a’ fantainn air mo fhreiceadan rè gach oidhche;

⁹ Agus, feuch, an seo tha carbad de dhaoine a’ teachd, le dà mharcach. Agus fhreagair e agus thubhairt e, Tha Bàbilon air tuiteam, air tuiteam; agus tha uile dhealbhan snaidhte a diathan air am briseadh gu làr.

¹⁰ Och mo bhualadh, agus arbhar m’ùrlair! An nì a chuala mi o Thighearna nan sluagh, Dia Israeil, chuir mi an cèill dhuibhse.

¹¹ Trom‐eallach Dhumah. Dh’èigh e rium o Sheir, Fhir na faire, ciod on oidhche? Fhir na faire, ciod on oidhche?

¹² Thubhairt am fear‐faire, Tha a’ mhadainn a’ teachd, agus fòs an oidhche: ma dh’fhiosraicheas sibhse, fiosraichibh: tillibh, thigibh.

¹³ An fhàistneachd mu thimcheall Aràbia. Anns an fhrìth ann an Aràbia gabhaidh sibh tàmh, a chuideachdan‐siubhail Dhedanim.

¹⁴ Thug luchd‐àiteachaidh tìr Thema uisge a dh’ionnsaigh an tartmhoir; len aran thàinig iad an còmhdhail an fhògarraich.

¹⁵ Oir o na claidheamhan theich iad, on chlaidheamh rùisgte, agus on bhogha lùbte, agus o bhoile a’ chogaidh.

¹⁶ Oir mar seo thubhairt an Tighearna rium, Fhathast bliadhna, mar bhliadhnachan fir‐thuarasdail, agus bidh uile ghlòir Chedair air caitheamh as.

¹⁷ Agus lùghdaichear fuidheall àireamh nam fear‐bogha, fir threuna de mhic Chedair; oir labhair an Tighearna Dia Israeil e.