Isaiah 17 - Am Bìoball Iomraidh Gàidhlig 1880 1992

1 Tha Siria agus Israel air am bagradh. 6 Trèigidh fuigheall de Israel an iodhal‐adhradh. 9 Sgriosar a’ chuid eile dhiubh a chionn gun do dhìochuimhnich iad Dia an slàinte.

¹ Trom‐eallach Dhamascais. Feuch, tha Damascas air atharrachadh o bhith na bhaile, agus bidh e na thòrr lèirsgrios.

² Tha bailtean Aroeir air an trèigsinn; bidh iad airson threud a laigheas sìos, agus cha bhi neach gam fuadachadh.

³ Agus dealaichidh an daingneach o Ephraim, agus an rìoghachd o Dhamascas; agus fuidheall Shiria, bidh iad mar ghlòir chloinn Israeil, deir Tighearna nan sluagh.

⁴ Agus tàrlaidh anns an là sin, gum bi glòir Iàcoib air a caitheamh as, agus fàsaidh saill a fheòla caol.

⁵ Agus bidh e amhail nuair a chruinnicheas neach fogharadh an arbhair, agus a bhuaineas a ghàirdean na diasan; agus bidh e amhail a thionaileas neach diasan ann an gleann Rephaim.

⁶ Gidheadh fàgar ann fuidheall dhearcan, mar ann an crathadh a’ chroinn‐ola; a dhà no trì de dhearcagan air mullach a’ mheangain as àirde; ceithir no còig air a gheugan iomallach torrach, deir an Tighearna Dia Israeil.

⁷ Air an là sin amhaircidh duine air a Chruithear, agus seallaidh a shùilean air Tì naomh Israeil.

⁸ Agus chan amhairc e air na h‑altairean a rinn a làmhan fhèin, agus air an nì sin a dhealbh a mheòir cha seall e; araon na doireachan agus na dealbhan.

⁹ Anns an là sin bidh a bhailtean daingnichte cosmhail ri meangan a dh’fhàgadh, no ri gèig a dh’fhàg iad, ro chloinn Israeil; agus bidh lèirsgrios ann.

¹⁰ A chionn gun do dhìochuimhnich thu Dia do shlàinte, agus nach robh thu cuimhneachail air carraig do neirt; air an adhbhar sin suidhichidh tu craobhan taitneach, agus suidhichidh tu failleanan coimheach.

¹¹ Anns an là bheir thu air do chraobhan fàs, agus anns an oidhche bheir thu air do shìol cinntinn; ach bidh am fogharadh na dhùn ann an là a’ dhoilgheis agus a’ bhròin gun dòchas.

¹² Is an‑aoibhinn do mhòr‐chuideachd nam fineachan lìonmhor, a tha a’ dèanamh fuaim mar fhuaim nan cuantan; agus do bheucaich nan cinneach, a tha ri beucaich cosmhail ri toirm uisgeachan làidir.

¹³ Beucaidh na cinnich cosmhail ri toirm mòran uisgeachan; ach bheir Dia dhaibh achmhasan, agus teichidh iad fad air falbh; agus fuadaichear iad mar chanach an t‑slèibh ron ghaoith, agus mar chuairteig ron iomaghaoith.

¹⁴ Agus, feuch, ri àm an fheasgair, uamhas; agus mun tig a’ mhadainn, chan eil e ann. Seo cuibhreann na muinntir a tha gar creachadh, agus crannchur na dream a tha gar spùinneadh.