Isaiah 16 - Am Bìoball Iomraidh Gàidhlig 1880 1992

1 Chomhairlicheadh do Mhoab a bhith ùmhal dhàsan a shuidheas air rìgh‐chathair Dhaibhidh. 6 Chaidh Moab a bhagradh le sgrios airson ardain‐san, uaill‐san, agus fheirge‐san.

¹ Cuiribhse uan a dh’ionnsaigh na tìre, o Shela an fhàsaich, gu sliabh nighean Shioin.

² Oir mar eunlaith sheachranach, air am fògradh on nead, mar sin bidh nigheanan Mhòaib aig àthan Arnoin.

³ Tabhair comhairle, cuir an gnìomh breitheanas; dèan do sgàil mar an oidhche ann an àird a’ mheadhon‐là; falaich na dìobaraich; na brath am fògarrach.

⁴ Gabhadh mo dhìobaraich tàmh maille riut, O Mhòaib; bi ad ionad‐falaich dhaibh on mhilltear; oir thàinig crìoch air an fhear‐shàrachaidh, sguir am fear‐millidh; tha an luchd‐saltairt air an caitheamh as an tìr.

⁵ Agus daingnichear an rìgh‐chathair ann an tròcair, agus suidhidh e oirre ann am fìrinn, ann am pàillean Dhaibhidh, a’ tabhairt breith, agus a’ rannsachadh na còrach, agus a’ luathachadh ceartais.

⁶ Chuala sinn uabhar Mhòaib; tha e ro‑uaibhreach; a àrdan, agus a uaill, agus a fhearg; ach chan eil a spionnadh da rèir.

⁷ Air an adhbhar sin caoinidh Mòab; airson Mhòaib caoinidh gach aon; airson bunait Chir‐hareseit nì sibh tuireadh: gu cinnteach tha iad air am bualadh.

⁸ Oir tha machraichean Hesboin air fàilneachadh, agus fìonain Shibmah; bhris maithean nan cinneach sìos a fìon‐chroinn ghasda; ràinig iad gu Iaser; sgaoil iad air feadh an fhàsaich; shìn a geugan iad fhèin a‑mach, chaidh iad thar fairge.

⁹ Air an adhbhar sin guilidh mi le gul Iaseir airson fìonain Shibmah; uisgichidh mi thu lem dheòir, O Hesboin agus Elealeh; oir dh’fhalbh a’ cho‐ghàir airson do mheas‐samhraidh, agus airson d’fhogharaidh.

¹⁰ Agus tha aoibhneas agus gàirdeachas air an toirt air falbh on mhachair thorraich; agus anns na fìonliosan cha dèan iad ceòl, cha tog iad iolach; anns na h‑amaran cha bhrùth am fear‐bruthaidh fìon; thug mise air an iolach sgur.

¹¹ Uime sin nì mo chom fuaim mar chlàrsaich airson Mhòaib; agus mo thaobh a‑staigh airson Chir‐hareis.

¹² Agus tàrlaidh, nuair a chìthear gun do sgìthich Mòab e fhèin air an ionad àrd, gun tèid e a‑steach da ionad naomh a dhèanamh ùrnaigh; ach cha soirbhich leis.

¹³ Seo am facal a labhair an Tighearna mu thimcheall Mhòaib on àm sin.

¹⁴ Ach a‑nis labhair an Tighearna ag ràdh, An ceann trì bliadhna, mar bhliadhnachan fir‐thuarasdail, nìthear glòir Mhòaib tàireil, le a mhòr‐shluagh uile; agus bidh am fuidheall ro‑bheag agus anfhann.