Iosua 8 - Am Bìoball Iomraidh Gàidhlig 1880 1992

1 Thug an Tighearna misneach do Iosua. 3 An dòigh air an do ghlacadh baile Ai. 29 Chrochadh a rìgh. 30 Thog Iosua altair do Dhia. 32 Sgrìobh e an lagh air clachan, agus leugh e a bhriathran uile.

¹ Agus thubhairt an Tighearna ri Iosua, Na gabh eagal, agus na bi fo gheilt; gabh an sluagh‐cogaidh uile maille riut, agus èirich, imich suas gu Ai: feuch, thug mi thairis dod làimh rìgh Ai, agus a shluagh, agus a bhaile, agus a fhearann.

² Agus nì thu ri Ai agus ra rìgh mar a rinn thu ri Iericho agus ra rìgh: a‑mhàin a chreach, agus a sprèidh, gabhaidh sibh mar chobhartach dhuibh fhèin. Cuir daoine ann am feall‐fhalach an aghaidh a’ bhaile air a chùlaibh.

³ Agus dh’èirich Iosua agus an sluagh‐cogaidh uile, a dhol suas an aghaidh Ai: agus thagh Iosua a‑mach deich‐mìle‐fichead fear treun ann an neart, agus chuir e air falbh iad anns an oidhche.

⁴ Agus dh’àithn e dhaibh, ag ràdh, Feuch, nì sibh feall‐fhalach an aghaidh a’ bhaile, eadhon air cùl a’ bhaile: na rachaibh ro‑fhada on bhaile, ach bithibh uile deas:

⁵ Agus thèid mise, agus an sluagh uile a tha maille rium, dlùth don bhaile: agus nuair a thig iad a‑mach nar coinneamh, mar air tùs, teichidh sinne romhpa.

⁶ (Oir thig iad a‑mach nar dèidh) gus an tarraing sinn iad on bhaile: oir their iad, Tha iad a’ teicheadh romhainn, mar air tùs: uime sin teichidh sinne romhpa.

⁷ An sin èiridh sibhse on fheall‐fhalach, agus glacaidh sibh am baile: oir bheir an Tighearna ur Dia nur làimh e.

⁸ Agus nuair a ghlacas sibh am baile, cuiridh sibh am baile ri theine: a rèir àithne an Tighearna nì sibh. Feuch, dh’àithn mise dhuibh.

⁹ Uime sin chuir Iosua a‑mach iad; agus dh’fhalbh iad a dhèanamh feall‐fhalaich, agus dh’fhan iad eadar Betel agus Ai, air an taobh an iar de Ai: ach dh’fhan Iosua an oidhche sin am measg an t‑sluaigh.

¹⁰ Agus dh’èirich Iosua gu moch anns a’ mhadainn, agus dh’àireamh e an sluagh, agus chaidh e suas, e fhèin agus seanairean Israeil, ron t‑sluagh gu Ai.

¹¹ Agus chaidh an sluagh‐cogaidh uile suas, a bha maille ris, agus chaidh iad am fagas, agus thàinig iad fa chomhair a’ bhaile, agus champaich iad air an taobh mu thuath de Ai: a‑nis bha gleann eadar iad agus Ai.

¹² Agus ghabh e mu thimcheall còig mìle fear agus chuir e iad a dhèanamh feall‐fhalaich eadar Betel agus Ai, air an taobh an iar den bhaile.

¹³ Agus nuair a shuidhich iad an sluagh, eadhon am feachd uile a bha air an taobh mu thuath den bhaile, agus an luchd feall‐fhalaich air an taobh an iar den bhaile, chaidh Iosua anns an oidhche sin do mheadhon a’ ghlinne.

¹⁴ Agus nuair a chunnaic rìgh Ai sin, rinn iad cabhag agus dh’èirich iad gu moch; agus chaidh fir a’ bhaile a‑mach gu cath an aghaidh Israeil, e fhèin agus a shluagh uile, ann an àm suidhichte, fa chomhair a’ chòmhnaird: ach cha robh fhios aige gu robh luchd feall‐fhalaich na aghaidh air cùl a’ bhaile.

¹⁵ Agus rinn Iosua agus Israel uile mar gum buailte iad romhpa, agus theich iad rathad an fhàsaich.

¹⁶ Agus ghairmeadh an sluagh uile a bha ann an Ai an ceann a chèile gu dol air an tòir, agus chaidh iad air tòir Iosua, agus thàirngeadh on bhaile iad.

¹⁷ Agus cha d’fhàgadh duine ann an Ai, no ann am Betel, nach deachaidh a‑mach an dèidh Israeil: agus dh’fhàg iad am baile fosgailte, agus chaidh iad air tòir Israeil.

¹⁸ Agus thubhairt an Tighearna ri Iosua, Sìn a‑mach an t‑sleagh a tha ad làimh rathad Ai; oir bheir mise ad làimh e. Agus shìn Iosua a‑mach an t‑sleagh a bha aige na làimh, a dh’ionnsaigh a’ bhaile.

¹⁹ Agus dh’èirich na daoine a bha ris an fheall‐fhalach gu grad as an àite, agus ruith iad cho luath is a shìn e a‑mach a làmh: agus chaidh iad a‑steach don bhaile, agus ghlac iad e, agus rinn iad cabhag, agus chuir iad am baile ri theine.

²⁰ Agus nuair a sheall fir Ai nan dèidh, chunnaic iad, agus, feuch, chaidh deatach a’ bhaile suas gu nèamh, agus cha robh comas aca teicheadh an taobh seo no an taobh ud: agus thionndaidh an sluagh a theich don fhàsach air an ais air an luchd‐tòrachd.

²¹ Agus nuair a chunnaic Iosua agus Israel uile gun do ghlac luchd na feall‐fhalaich am baile, agus gun deachaidh deatach a’ bhaile suas, an sin thill iad, agus bhuail iad fir Ai.

²² Agus chaidh iadsan a‑mach as a’ bhaile nan aghaidh; mar sin bha iad ann am meadhon Israeil, cuid air an taobh seo, agus cuid air an taobh ud: agus bhuail iad iad, gus nach d’fhàgadh aon dhiubh beò, no aon gu dol as.

²³ Agus ghlac iad rìgh Ai beò, agus thug iad e gu Iosua.

²⁴ Agus nuair a chuir Israel crìoch air uile luchd‐àiteachaidh Ai a mharbhadh, anns a’ mhachair, anns an fhàsach don do chuir iad an ruaig orra, agus nuair a thuit iad uile le faobhar a’ chlaidheimh, gus an do chuireadh as dhaibh, an sin thill na h‑Israelich uile gu Ai, agus bhuail iad e le faobhar a’ chlaidheimh.

²⁵ Agus bha ann dhiùbhsan uile a thuit air an là sin, eadar fhir agus mhnathan, dà‑mhìle‐dheug, eadhon muinntir Ai uile:

²⁶ Oir cha do tharraing Iosua a làmh air a h‑ais, a shìn e a‑mach leis an t‑sleagh, gus an do lèirsgrios e luchd‐àiteachaidh Ai uile.

²⁷ A‑mhàin sprèidh agus creach a’ bhaile sin ghabh Israel mar chobhartach dhaibh fhèin, a rèir facal an Tighearna a dh’àithn e do Iosua.

²⁸ Agus loisg Iosua Ai, agus rinn e na chàrn e gu bràth, na fhàsach gus an là‑an‑diugh.

²⁹ Agus rìgh Ai chroch e air crann gu àm an fheasgair: agus mu dhol fodha na grèine dh’àithn Iosua, agus thug iad a‑nuas a chorp on chrann, agus thilg iad e aig dol a‑steach geata a’ bhaile, agus thog iad air càrn mòr chlach, a tha an làthair gus an là‑an‑diugh.

³⁰ An sin thog Iosua altair don Tighearna, Dia Israeil, air sliabh Ebail,

³¹ Mar a dh’àithn Maois, òglach an Tighearna, do chloinn Israeil, a rèir mar a tha e sgrìobhte ann an leabhar‐lagha Mhaois, altair de chlachan slàna, air nach do thog duine sam bith suas iarann; agus thug iad suas oirre ìobairtean‐loisgte don Tighearna, agus dh’ìobair iad tabhartasan‐sìth.

³² Agus sgrìobh e an sin air na clachan dùblachadh lagh Mhaois, a sgrìobh e an làthair chloinn Israeil.

³³ Agus sheas Israel uile, agus an seanairean, agus an luchd‐riaghlaidh, agus am britheamhan, air an taobh seo den àirc, agus air an taobh ud, an làthair nan sagart, na Lèbhithich, a ghiùlain àirc coicheangal an Tighearna, an coigreach cho math ris‐san a rugadh nam measg; leth dhiubh thall fa chomhair sliabh Gheridsim, agus leth dhiubh thall fa chomhair sliabh Ebail: mar a dh’àithn Maois, òglach an Tighearna, a‑chum sluagh Israeil a bheannachadh air tùs.

³⁴ Agus an dèidh sin leugh e uile bhriathran an lagha, na beannachdan agus na mallachdan, a rèir nan uile nithean a tha sgrìobhte ann an leabhar an lagha.

³⁵ Cha robh facal de na h‑uile nithean a dh’àithn Maois, nach do leugh Iosua an làthair co‑chruinneachadh Israeil uile, agus nam ban, agus na cloinne bige, agus nan coigreach a bha a’ fantainn nam measg.