Iosua 21 - Am Bìoball Iomraidh Gàidhlig 1880 1992

1 Thugadh ochd bailtean agus dà fhichead le crannchur as na treubhan eile do na Lèbhithich. 43 Thug an Tighearna fois do chloinn Israeil.

¹ An sin thàinig cinn athraichean nan Lèbhitheach am fagas do Eleàsar an sagart, agus do Iosua mac Nuin, agus do chinn athraichean treubhan chloinn Israeil;

² Agus labhair iad riu aig Siloh ann an tìr Chanàain, ag ràdh, Dh’àithn an Tighearna le làimh Mhaois bailtean a thoirt dhuinn gu còmhnaidh a ghabhail annta, lem fearann co‑roinn dar sprèidh.

³ Agus thug clann Israeil do na Lèbhithich, as an oighreachd, air àithne an Tighearna, na bailtean seo agus am fearann co‑roinn.

⁴ Agus thàinig an crannchur a‑mach airson teaghlaichean nan Cohatach; agus bha aig cloinn Aaroin, an sagart, a bha de na Lèbhitich, le crannchur à treubh Iùdah, agus à treubh Shimeoin, agus à treubh Bheniàmin, trì‐bailtean‐deug.

⁵ Agus bha aig a’ chuid eile de chloinn Chohait le crannchur à teaghlaichean treubh Ephraim, agus à treubh Dhain, agus à leth‐threubh Mhanaseh, deich bailtean.

⁶ Agus bha aig cloinn Ghersoin le crannchur, à teaghlaichean treubh Isachair, agus à treubh Aseir, agus à treubh Naphtali, agus à leth‐threubh Mhanaseh ann am Basan, trì‐bailtean‐deug.

⁷ Bha aig cloinn Mherari, a rèir an teaghlaichean, à treubh Reubein, agus à treubh Ghad, agus à treubh Shebuluin, dà‑bhaile‐dheug.

⁸ Agus thug clann Israeil le crannchur do na Lèbhitich na bailtean sin lem fearann co‑roinn, mar a dh’àithn an Tighearna le làimh Mhaois.

⁹ Agus thug iad a‑mach à treubh chloinn Iùdah, agus à treubh chloinn Shimeoin, na bailtean seo a tha air an ainmeachadh,

¹⁰ A bha aig cloinn Aaroin de theaghlaichean nan Cohatach, muinntir a bha de chloinn Lèbhi: (oir bu leòsan an ciad chrannchur).

¹¹ Agus thug iad dhaibh mòr‐bhaile Arba, athair Anaic (eadhon Hebron) ann an sliabh Iùdah, maille ra fhearann co‑roinn mun cuairt air.

¹² Ach fearann a’ mhòr‐bhaile, agus a bhailtean beaga, thug iad do Chàleb mac Iephuneh mar a sheilbh.

¹³ Mar seo thug iad do chloinn Aaroin, an sagart, Hebron maille ra fhearann co‑roinn, gu bhith na bhaile dìdein don mharbhaiche, agus Libnah le a fhearann co‑roinn.

¹⁴ Agus Iatir le a fhearann co‑roinn, agus Estemoah le a fhearann co‑roinn,

¹⁵ Agus Holon le a fhearann co‑roinn, agus Debir le a fhearann co‑roinn,

¹⁶ Agus Ain le a fhearann co‑roinn, agus Iutah le a fhearann co‑roinn, agus Bet‐semes le a fhearann co‑roinn: naoi bailtean as an dà threubh sin.

¹⁷ Agus à treubh Bheniàmin, Gibeon le a fhearann co‑roinn, Gebah le a fhearann co‑roinn,

¹⁸ Anatot le a fhearann co‑roinn, agus Almon le a fhearann co‑roinn: ceithir bailtean.

¹⁹ B’iad uile bhailtean chloinn Aaroin, na sagartan, trì‐bailtean‐deug lem fearann co‑roinn.

²⁰ Agus bha aig teaghlaichean chloinn Chohait, na Lèbhithich, a mhair de chloinn Chohait, eadhon acasan, bailtean an crannchuir à treubh Ephraim.

²¹ Oir thug iad dhaibh Sechem le a fhearann co‑roinn ann an sliabh Ephraim, gu bhith na bhaile dìdein don mharbhaiche; agus Gèser le a fhearann co‑roinn.

²² Agus Cibsaim le a fhearann co‑roinn, agus Bet‐horon le a fhearann co‑roinn: ceithir bailtean.

²³ Agus à treubh Dhain, Elteceh le a fhearann co‑roinn, Gibeton le a fhearann co‑roinn,

²⁴ Aialon le a fhearann co‑roinn: Gat‐rimon le a fhearann co‑roinn, ceithir bailtean.

²⁵ Agus à leth‐threubh Mhanaseh, Taanach le a fhearann co‑roinn, agus Gat‐rimon le a fhearann co‑roinn: dà bhaile.

²⁶ B’iad na bailtean uile lem fearann co‑roinn deich, airson teaghlaichean chloinn Chohait a mhair gun an oighreachd fhaghail.

²⁷ Agus do chloinn Ghersoin de theaghlaichean nan Lèbhitheach, à leth eile treubh Mhanaseh, thug iad Golan ann am Basan le a fhearann co‑roinn, gu bhith na bhaile dìdein don mharbhaiche, agus Bees‐tèrah, le a fhearann co‑roinn: dà bhaile.

²⁸ Agus à treubh Isachair, Cison le a fhearann co‑roinn, Dabareh le a fhearann co‑roinn,

²⁹ Iarmut le a fhearann co‑roinn, En‑ganim le a fhearann co‑roinn: ceithir bailtean.

³⁰ Agus à treubh Aseir, Misal le a fhearann co‑roinn, Abdon le a fhearann co‑roinn,

³¹ Helcat le a fhearann co‑roinn, agus Rehob le a fhearann co‑roinn: ceithir bailtean.

³² Agus à treubh Naphtali, Cedes ann an Galilee le a fhearann co‑roinn, gu bhith na bhaile dìdein don mharbhaiche; agus Hamot‐dor le a fhearann co‑roinn, agus Cartan le a fhearann co‑roinn: trì bailtean.

³³ B’iad uile bhailtean nan Gersonach a rèir an teaghlaichean, trì‐bailtean‐deug lem fearann co‑roinn.

³⁴ Agus do theaghlaichean chloinn Mherari, a’ chuid eile de na Lèbhithich, à treubh Shebuluin, Iocneam le a fhearann co‑roinn, agus Cartah le a fhearann co‑roinn,

³⁵ Dimnah le a fhearann co‑roinn, Nahalal le a fhearann co‑roinn: ceithir bailtean.

³⁶ Agus à treubh Reubein, Beser le a fhearann co‑roinn, agus Iahasah le a fhearann co‑roinn,

³⁷ Cedemot le a fhearann co‑roinn, agus Mephaat le a fhearann co‑roinn: ceithir bailtean.

³⁸ Agus à treubh Ghad, Ramot ann an Gilead le a fhearann co‑roinn, gu bhith na bhaile dìdein don mharbhaiche; agus Mahanaim le a fhearann co‑roinn,

³⁹ Hesbon le a fhearann co‑roinn, Iaser le a fhearann co‑roinn: ceithir bailtean anns an iomlan.

⁴⁰ Mar sin b’iad na bailtean uile airson chloinn Mherari, a rèir an teaghlaichean, a mhair de theaghlaichean nan Lèbhitheach, a rèir an crannchuir, dà‑bhaile‐dheug.

⁴¹ B’iad uile bhailtean nan Lèbhitheach, an taobh a‑staigh de sheilbh chloinn Israeil, ochd bailtean agus dà‑fhichead lem fearann co‑roinn.

⁴² Bha na bailtean sin gach aon lem fearann co‑roinn man timcheall: mar seo bha na bailtean sin uile.

⁴³ Agus thug an Tighearna do Israel am fearann uile a mhionnaich e a thoirt dan athraichean; agus shealbhaich iad e, agus ghabh iad còmhnaidh ann.

⁴⁴ Agus thug an Tighearna dhaibh fois mun cuairt, a rèir nan uile nithean a mhionnaich e dan athraichean; agus cha do sheas duine den naimhdean uile romhpa; thug an Tighearna thairis an naimhdean uile dan làimh.

⁴⁵ Cha d’fhàilnich a’ bheag de gach nì math a labhair an Tighearna ri taigh Israeil: thàinig an t‑iomlan gu crìch.