Iosua 13 - Am Bìoball Iomraidh Gàidhlig 1880 1992

1 Crìochan an fhearainn air nach tugadh fhathast buaidh. 14, 33 Is iad ìobairtean an Tighearna oighreachd nan Lèbhitheach. 22 Mharbhadh Balàam.

¹ A‑nis bha Iosua sean agus air teachd air aghaidh ann am bliadhnachan; agus thubhairt an Tighearna ris, Tha thusa sean agus air teachd air d’aghaidh ann am bliadhnachan, agus tha fhathast ro‑mhòran fearainn ra shealbhachadh.

² Is e seo am fearann a tha fhathast an làthair; uile chrìochan nam Philisteach agus Gesuri uile,

³ O Shihor, a tha fa chomhair na h‑Eiphit, eadhon gu crìch Ecroin mu thuath, a mheasar don Chanàanach: còig tighearnan nam Philisteach; na Gàsataich, agus na h‑Asdodaich, na h‑Escalonaich, na Gitich, agus na h‑Ecronaich, agus na h‑Abhaich:

⁴ On taobh mu dheas, uile fhearann nan Canàanach, agus Mearah, a tha làimh ris na Sìdonaich, gu Aphec, gu crìch nan Amorach;

⁵ Agus fearann nan Gibleach, agus Lebanon uile leth ri èirigh na grèine, o Bhàal‐gad fo shliabh Hermoin, gu ruig an dol a‑steach do Hamat:

⁶ Uile luchd‐àiteachaidh nam beann o Lebanon gu Misrephot‐maim, agus na Sìdonaich uile, iadsan fògraidh mi a‑mach ro chloinn Israeil; a‑mhàin roinn e le crannchur do na h‑Israelich mar oighreachd, mar a dh’àithn mise dhut.

⁷ A‑nis uime sin, roinn am fearann seo mar oighreachd do na naoi treubhan, agus do leth‐threubh Mhanaseh;

⁸ Maille ris an leth‐threubh eile fhuair na Reubenich agus na Gadaich an oighreachd‐san a thug Maois dhaibh an taobh thall de Iòrdan a làimh na h‑àird an ear, eadhon mar a thug Maois, òglach an Tighearna, dhaibh;

⁹ O Aroer, a tha air bruaich sruth Arnoin, agus am baile a tha ann am meadhon an t‑srutha, agus còmhnard Mhedebah uile gu Dibon;

¹⁰ Agus uile bhailtean Shihoin, rìgh nan Amorach, a rìghich ann an Hesbon, gu crìch chloinn Amoin;

¹¹ Agus Gilead, agus crìoch nan Gesurach, agus nam Maachatach, agus sliabh Hermoin uile, agus Basan uile gu Salcah;

¹² Uile rìoghachd Og ann am Basan, a rìghich ann an Astarot agus ann an Edrei, a mhair de iarmad nam famhairean: oir iad sin bhuail Maois, agus dh’fhògair e a‑mach iad.

¹³ Gidheadh, cha d’fhògair clann Israeil a‑mach na Gesuraich, no na Maachataich; ach tha na Gesuraich agus na Maachataich nan còmhnaidh am measg nan Israelach gus an là‑an‑diugh.

¹⁴ A‑mhàin do threubh Lèbhi cha tug e oighreachd sam bith; is iad ìobairtean an Tighearna Dia Israeil, a bheirear suas le teine, an oighreachd‐san, mar a thubhairt e riu.

¹⁵ Agus thug Maois do threubh chloinn Reubein oighreachd a rèir an teaghlaichean:

¹⁶ Agus bha an crìoch o Aroer a tha air bruaich sruth Arnoin, agus am baile a tha ann am meadhon an t‑srutha, agus an còmhnard uile gu Medebah;

¹⁷ Hesbon, agus a bhailtean uile a tha anns a’ chòmhnard; Dibon, agus Bamot‐bàal, agus Bet‐ball‐meon,

¹⁸ Agus Iahasa, agus Cedemot, agus Mephaat,

¹⁹ Agus Ciriataim, agus Sibmah, agus Saret‐sahar ann an sliabh a’ ghlinne,

²⁰ Agus Bet‐peor, agus Asdod‐pisgah, agus Bet‐iesimot,

²¹ Agus uile bhailtean a’ chòmhnaird, agus uile rìoghachd Shihoin, rìgh nan Amorach, a rìghich ann an Hesbon, a bhuail Maois maille ri ceannardan Mhidiain, Ebhi, agus Recem, agus Sur, agus Hur, agus Rebah, cinn‐fheadhna Shihoin, a bha a chòmhnaidh anns an tìr.

²² Balàam mar an ceudna, mac Bheoir, am fiosaiche, mharbh clann Israeil leis a’ chlaidheamh nam measg‐san a mharbhadh leo.

²³ Agus b’i crìoch chloinn Reubein, Iòrdan agus a crìoch‐se. B’i sin oighreachd chloinn Reubein a rèir an teaghlaichean, na bailtean mòra agus am bailtean beaga.

²⁴ Agus thug Maois oighreachd do threubh Ghad, eadhon do chloinn Ghad a rèir an teaghlaichean.

²⁵ Agus b’i an crìoch Iaser, agus uile bhailtean Ghilead, agus leth fearann chloinn Amoin, gu Aroer a tha fa chomhair Rabah:

²⁶ Agus o Hesbon gu Ramat‐mhispeh, agus Betonim; agus o Mhahanaim gu crìch Dhebir;

²⁷ Agus anns a’ ghleann, Betaram, agus Bet‐nimrah, agus Sucot, agus Saphon, a’ chuid eile de rìoghachd Shihoin rìgh Hesboin, Iòrdan agus a crìoch, eadhon gu oir fairge Chineret, air taobh eile Iòrdain a làimh na h‑àird an ear.

²⁸ B’i sin oighreachd chloinn Ghad, a rèir an teaghlaichean, na bailtean mòra agus am bailtean beaga.

²⁹ Agus thug Maois oighreachd do leth‐threubh Mhanaseh: agus b’i seo sealbh leth‐threubh chloinn Mhanaseh, a rèir an teaghlaichean.

³⁰ Agus bha an crìoch o Mhahanaim, Basan uile, uile rìoghachd Og rìgh Bhasain, agus uile bhailtean Iair, a tha ann am Basan, trì‐fichead baile mòr:

³¹ Agus leth Ghilead, agus Astarot, agus Edrei, bailtean rìoghachd Og ann am Basan, bhuin iad do chloinn Mhachir mhic Mhanaseh, eadhon do leth chloinn Mhachir, a rèir an teaghlaichean.

³² Is iad sin na dùthchannan a roinn Maois mar oighreachd ann an còmhnardan Mhòaib, air an taobh eile de Iòrdan làimh ri Iericho, air an taobh an ear.

³³ Ach do threubh Lèbhi cha tug Maois oighreachd: b’e an Tighearna Dia Israeil e fhèin an oighreachd‐san, mar a thubhairt e riu.