Ionah 3 - Am Bìoball Iomraidh Gàidhlig 1880 1992

1 Chuireadh Ionah a‑rìs a dh’ionnsaidh Ninebheh, agus labhair e riu anns na briathran a dh’àithn Dia dha. 5 Ghabh muinntir Ninebheh aithreachas, 10 agus thill Dia o a dhian‐chorraich nan aghaidh.

¹ Agus thàinig facal an Tighearna gu Ionah an dara uair, ag ràdh,

² Eirich, imich gu Ninebheh, am baile mòr sin, agus labhair ris anns na briathran a dh’àithneas mise dhut.

³ Agus dh’èirich Ionah, agus chaidh e gu Ninebheh, a rèir facal an Tighearna. (A‑nis bu bhaile ro‑mhòr Ninebheh, astar trì làithean.)

⁴ Agus thòisich Ionah air dol tron bhaile, astar aon là; agus ghlaodh e, agus thubhairt e, Fhathast dà‑fhichead là, agus sgriosar Ninebheh.

⁵ Agus chreid muinntir Ninebheh Dia, agus dh’èigh iad trasg, agus chuir iad umpa aodach‐saic, on aon bu mhò dhiubh gus an aon a bu lugha.

⁶ Oir thàinig an sgeul gu rìgh Ninebheh; agus dh’èirich e o a rìgh‐chathair, agus chuir e a fhallaing uaithe, agus chòmhdaich e e fhèin le aodach‐saic, agus shuidh e ann an luaithre.

⁷ Agus thug e fa‑near a èigheach agus a chur an cèill air feadh Ninebheh (le òrdagh an rìgh agus uaislean), ag ràdh, Na blaiseadh duine no beathach, buar no treud, aon nì; na ionaltradh iad, agus na òladh iad uisge.

⁸ Ach biodh duine agus ainmhidh air an còmhdachadh le aodach‐saic, agus glaodhadh iad gu treun ri Dia: seadh, tilleadh iad gach aon o dhroch shlighe, agus on fhòirneart a tha nan làmhan.

⁹ Cò aig a bheil fhios nach till Dia, agus nach gabh e aithreachas, agus nach till e o a dhian‐chorraich, air chor is nach bàsaich sinn?

¹⁰ Agus chunnaic Dia an obraichean, gun do thill iad on droch shlighe; agus ghabh Dia aithreachas mun olc a thubhairt e gun dèanadh e orra, agus cha do rinn e e.