Iob 42 - Am Bìoball Iomraidh Gàidhlig 1880 1992

1 Dh’ùmhlaich Iob e fhèin fo làimh Dhè. 7 Chronaich Dia a thriùir chàirdean a chionn nach do labhair iad an nì a bha ceart dha thaobh. 9 Ghabh an Tighearna ri Iob, agus thug e dha a dhà uiread is a bha aige roimhe. 13 Clann Iob: 16 aois Iob agus a bhàs.

¹ An sin fhreagair Iob an Tighearna, agus thubhairt e,

² Tha fhios agam gur urrainn thusa gach nì a dhèanamh, agus nach ceilear smuain air bith ort.

³ Cò esan a cheileas comhairle gun eòlas? Uime sin chuir mi an cèill nithean nach do thuig mi; nithean tuilleadh is iongantach air mo shon‐sa, nach b’aithne dhomh.

⁴ Eisd, guidheam ort, agus labhraidh mi: feòraichidh mi dhìot, agus foillsich thusa dhomh.

⁵ Le èisdeachd na cluaise chuala mi thu; ach a‑nis chunnaic mo shùil thu.

⁶ Uime sin gabhaidh mi gràin dhìom fhèin, agus nì mi aithreachas ann an duslach agus ann an luaithre.

⁷ Ach an dèidh don Tighearna na briathran sin a labhairt ri Iob, thubhairt an Tighearna ri Eliphas an Temanach, Tha m’fhearg air a lasadh ad aghaidh‐sa, agus an aghaidh do dhithis chàirdean, a chionn nach do labhair sibh am thaobh‐sa an nì a bha ceart, mar a labhair m’òglach Iob.

⁸ Agus uime sin gabhaibh dhuibh fhèin seachd tairbh òga agus seachd reitheachan, agus rachaibh a dh’ionnsaigh m’òglaich Iob, agus ìobraibh ìobairt‐loisgte air ur son fhèin; agus nì m’òglach Iob ùrnaigh air ur son, oir ris‐san gabhaidh mi: a‑chum nach buin mi ribh a rèir ur n‑amaideachd, a chionn nach do labhair sibh am thaobh‐sa an nì a bha ceart, mar a labhair m’òglach Iob.

⁹ Agus chaidh Eliphas an Temanach, agus Bildad an Suhach, agus Sophar an Naamatach, agus rinn iad mar a dh’àithn an Tighearna dhaibh: agus ghabh an Tighearna ri Iob.

¹⁰ Agus thionndaidh an Tighearna braighdeanas Iob, nuair a rinn e ùrnaigh airson a chàirdean: agus thug an Tighearna do Iob a dhà uiread is a bha aige roimhe.

¹¹ Agus thàinig a bhràithrean uile da ionnsaigh, agus a pheathraichean uile, agus iadsan uile dom b’aithne e roimhe, agus dh’ith iad aran maille ris na thaigh; agus bha truas aca dheth, agus thug iad comhfhurtachd dha a‑thaobh an uilc uile a thug an Tighearna air: agus thug iad dha gach aon dhiubh bonn airgid, agus gach aon dhiubh cluas‐fhàinne òir.

¹² Agus bheannaich an Tighearna crìoch Iob nas mò na a thoiseach; agus bha aige ceithir‐mìle‐deug caora, agus sia mìle càmhal, agus mìle cuing dhamh, agus mìle asal bhoireann.

¹³ Agus bha aige seachd mic, agus triùir nighean.

¹⁴ Agus thug e Iemima mar ainm air a’ chiad nighinn, agus Cesiah mar ainm air an dara, agus Ceren‐hapuch mar ainm air an treas nighinn.

¹⁵ Agus cha d’fhuaireadh mnathan cho sgiamhach ri nigheanan Iob anns an tìr uile; agus thug an athair dhaibh oighreachd am measg am bràithrean.

¹⁶ Agus bha Iob beò na dhèidh seo ceud agus dà‑fhichead bliadhna; agus chunnaic e a mhic, agus mic a mhac, ceithir ginealaichean.

¹⁷ Agus fhuair Iob bàs na sheann duine agus làn de làithean.