Iob 18 - Am Bìoball Iomraidh Gàidhlig 1880 1992

1 Thug Bildad achmhasan do Iob a chionn gun robh e dh’easbhaidh foighidinn. 5 Dh’innis e gun cuirear solas an aingidh as, agus gun sgriosar a chuimhne bhàrr aghaidh na talmhainn.

¹ An sin fhreagair Bildad an Suhach, agus thubhairt e,

² Cia fhada gus an cuir sibh crìoch air briathran? Tuigibh, agus na dhèidh sin labhramaid.

³ Carson a mheasar sinne mar ainmhidhean, agus a tha sinn tàireil ad shùilean‐sa?

⁴ Tha e a’ reubadh anama na chorraich: air do shon‐sa an trèigear an talamh? Agus an atharraichear a’ charraig as a h‑àite?

⁵ Seadh, cuirear solas an aingidh as: agus cha dealraich lasair a theine.

⁶ Dorchaichear an solas na phàillean, agus cuirear as a lòchran aige.

⁷ Cumhangaichear ceuman a neirt, agus tilgidh a chomhairle fhèin sìos e:

⁸ Oir cuirear ann an lìon e le a chasan fhèin, agus air ribe imichidh e.

⁹ Glacaidh an còrd air shàil e; buadhaichidh am fear‐reubainn na aghaidh.

¹⁰ Falaichte anns an talamh tha ribe air a shon, agus inneal‐glacaidh air a shon air an t‑slighe.

¹¹ Air gach taobh cuiridh uamhasan eagal air, agus fuadaichidh iad air a chasan e.

¹² Bidh a neart air a chlaoidh le acras, agus lèirsgrios deas aig a thaobh.

¹³ Ithidh e suas neart a chraicinn; ithidh ciad‐ghin a’ bhàis suas a neart.

¹⁴ Spìonar as a phàillean a dhòchas; agus bheir e e gu rìgh nan uamhann.

¹⁵ Gabhaidh e còmhnaidh na phàillean, a chionn nach leis‐san e; crathar pronnasg air a àite‐còmhnaidh.

¹⁶ Shìos tiormaichear a fhreumhan, agus shuas gearrar air falbh a bhàrr.

¹⁷ Sgriosar a chuimhne as an talamh, agus cha bhi ainm aige air an t‑sràid.

¹⁸ Fògrar e o sholas gu dorchadas, agus as an t‑saoghal tilgear e.

¹⁹ Cha bhi mac aige, no mac a mhic am measg a shluaigh, no neach a mhaireas na àitean‐còmhnaidh.

²⁰ Ri a là bidh ioghnadh orrasan a thig na dhèidh, mar a ghlac uamhas iadsan a thàinig roimhe.

²¹ Gu deimhinn is iad sin ionadan‐còmhnaidh an aingidh; agus is e seo a àite‐san, do nach aithne Dia.