Iob 13 - Am Bìoball Iomraidh Gàidhlig 1880 1992

1 Chronaich Iob a chàirdean do bhrìgh gun do labhair iad gu h‑aingidh as leth Dhè: 14 ged nach do thuig e adhbhar a thrioblaid cha d’fhàilnich a dhòchas: 20 dh’iarr e fios fhaghail air a pheacaidhean.

¹ Feuch, chunnaic mo shùil seo uile; chuala mo chluas, agus mhothaich i e.

² Mar as aithne dhuibhse, is aithne dhòmhsa mar an ceudna: chan ìsle mise na sibhse.

³ Ach labhrainn‐sa ris an Uile‐chumhachdach, agus b’àill leam tagradh ri Dia.

⁴ Oir is luchd‐cumaidh bhreug sibhse, lèighean nach fiù sibh uile.

⁵ O nach robh sibh gu tur nur tosd! agus b’e sin ur gliocas.

⁶ Cluinnibh a‑nis mo thagradh, agus èisdibh ri deasbaireachd mo bhilean.

⁷ An labhair sibh gu h‑aingidh airson Dhè? Agus air a shon‐san an labhair sibh gu cealgach?

⁸ An gabh sibh ra ghnùis? Airson Dhè an dèan sibh còmhstri?

⁹ A bheil e math gun rannsaicheadh e a‑mach sibh? Mar a nìthear fanaid air duine, an dèan sibh fanaid airsan?

¹⁰ Gu cinnteach cronaichidh e sibh, ma ghabhas sibh ann an uaigneas ri pearsachan.

¹¹ Nach cuir a òirdhearcas‐san eagal oirbh? Agus nach tuit a uamhann‐san oirbh?

¹² Tha ur cuimhne cosmhail ri luaithre, mar chuirp creadha ur cuirp.

¹³ Bithibh nur tosd am thaobh‐sa, agus labhraidh mi, agus thigeadh orm na dh’fhaodas.

¹⁴ Carson a tha mi a’ gabhail m’fheòla am fhiaclan, agus a’ cur mo bheatha ann am làimh?

¹⁵ Ged mharbh e mi, gidheadh earbaidh mi as: ach tagraidh mi mo shlighean na fhianais.

¹⁶ Mar an ceudna bidh e dhòmhsa a‑chum slàinte; oir cha tig cealgair na làthair.

¹⁷ Eisdibh gu furachair rim chainnt, agus rim sgeul le ur cluasan.

¹⁸ Feuch a‑nis, chuir mi mo chùis ann an òrdagh: tha fhios agam gun saorar mi.

¹⁹ Cò esan a thagras rium? Oir a‑nis, ma bhios mi am thosd, bheir mi suas an deò.

²⁰ A‑mhàin dà nì na dèan rium; an sin od ghnùis chan fhalaich mi mi fhèin.

²¹ Tarraing do làmh fada uam agus na cuireadh d’uamhann eagal orm.

²² An sin gairm thusa, agus freagraidh mise: no labhraidh mise, agus freagair thusa mi.

²³ Cia lìonmhor m’euceartan agus mo pheacaidhean? Air m’easaontas agus mo pheacadh thoir fios dhomh.

²⁴ Carson a tha thu a’ falach do ghnùise, agus gam mheas mar nàmhaid dhut?

²⁵ Am bris thu an duilleag a thilgear a‑null agus a‑nall? Agus an ruaig thu an asbhuain thioram?

²⁶ Oir tha thu a’ sgrìobhadh nithean searbha am aghaidh, agus a’ toirt orm euceartan m’òige a shealbhachadh.

²⁷ Agus tha thu a’ cur mo chas anns a’ cheap, agus a’ geur‐amharc air mo shlighean gu lèir, agus a’ cur chomharraidhean air bonnan mo chas.

²⁸ Agus mar nì breun cuirear as dha, mar thrusgan a dh’itheas an leòmann.