Ieremiah 33 - Am Bìoball Iomraidh Gàidhlig 1880 1992

1 Dhaingnich Dia a ghealladh do na h‑Iùdhaich gun tilleadh iad om braighdeanas, 10 agus gun cluinneadh a‑rìs nam fearann guth an aoibhneis agus an t‑subhachais. 15 Tha Crìosd air a ghealltainn. 19 Bithidh an coicheangal a rinn Dia ri Daibhidh seasmhach gu bràth.

¹ Os bàrr, thàinig facal an Tighearna gu Ieremiah an dara uair (an tràth bha e fhathast air a dhruideadh suas ann an cùirt a’ phrìosain), ag ràdh,

² Mar seo deir an Tighearna a rinn e, an Tighearna a dhealbh e, a tha fòs ga dhaingneachadh; is e a ainm Iehòbhah;

³ Glaodh riumsa, agus freagraidh mi thu, agus feuchaidh mi dhut nithean mòra agus cumhachdach, air nach eil thu eòlach.

⁴ Oir mar seo tha an Tighearna, Dia Israeil, ag ràdh, a‑thaobh taighean na cathrach seo, agus a‑thaobh taighean rìghrean Iùdah, a tha air an tilgeadh sìos leis na h‑innealan‐brisidh, agus leis a’ chlaidheamh;

⁵ A tha air teachd gu cogadh air taobh nan Caldèanach, agus gu an lìonadh le cuirp mharbha nan daoine a bhuail mise ann am fheirg, agus ann am chorraich, agus a thug orm, airson an uile aingidheachd, mo ghnùis fhalach on chathair seo:

⁶ Feuch, bheir mi dhi slàinte agus leigheas, agus nì mi an slànachadh; agus nochdaidh mi dhaibh pailteas sìthe agus fìrinn.

⁷ Agus bheir mi air a h‑ais bruid Iùdah, agus bruid Israeil; agus togaidh mi iad, mar air tùs.

⁸ Agus glanaidh mi iad on uile aingidheachd, leis an do chiontaich iad am aghaidh; agus maithidh mi an uile lochdan, leis an do pheacaich iad, agus leis an do rinn iad ceannairc am aghaidh.

⁹ Agus bidh a’ chathair seo dhòmhsa na h‑ainm sòlais, na moladh, agus na maise, am measg uile chinnich na talmhainn, a chluinneas gach uile mhath a nì mise dhaibh: agus bidh eagal agus crith orra, airson an uile mhaitheis, agus airson an uile shoirbheachaidh a dheònaicheas mise dhaibh.

¹⁰ Mar seo deir an Tighearna, A‑rìs cluinnear anns an àite seo (mum bheil sibhse ag ràdh, Tha e fàs gun duine agus gun ainmhidh, eadhon ann an cathraichean Iùdah, agus ann an sràidean Ierusaleim, a tha fàs, gun duine, eadhon gun fhear‐àiteachaidh, agus gun ainmhidh),

¹¹ Guth aoibhneis, agus guth subhachais, guth an fhir nuadh‐phòsda, agus guth na mnà nuadh‐phòsda; guth na muinntir a their, Molaibh‐se Tighearna nan sluagh, oir tha an Tighearna math, oir tha a thròcair buan gu sìorraidh; agus na muinntir a bheir an ìobairt‐mholaidh gu taigh an Tighearna: oir bheir mise air a h‑ais bruid an fhearainn, mar air tùs, deir an Tighearna.

¹² Mar seo deir Tighearna nan sluagh, Fhathast anns an àite seo a tha fàs, gun duine agus gun ainmhidh, agus na uile bhailtean, bidh àite‐còmhnaidh nam buachaillean a’ toirt air an treudan laighe sìos.

¹³ Ann am bailtean nam beann, agus ann am bailtean a’ chòmhnaird, agus ann am bailtean na h‑àird a deas, agus ann am fearann Bheniàmin, agus anns na h‑ionadan timcheall Ierusaleim, agus ann am bailtean Iùdah, siùbhlaidh na treudan a‑rìs fo làimh an tì a ghabhas an àireamh, deir an Tighearna.

¹⁴ Feuch, tha na làithean a’ teachd, deir an Tighearna, anns an coilean mise an nì math sin a gheall mi do thaigh Israeil, agus do thaigh Iùdah.

¹⁵ Anns na làithean sin, agus anns an àm sin, bheir mise air Meanglan fìreantachd fàs suas do Dhaibhidh, agus cuiridh e an gnìomh breitheanas agus ceartas air an talamh.

¹⁶ Anns na làithean sin tèarnar Iùdah, agus gabhaidh Ierusalem còmhnaidh ann an tèarainteachd: agus is e seo esan ris an goirear Iehòbhah ar Fìreantachd.

¹⁷ Oir mar seo tha Iehòbhah ag ràdh, Cha bhi gu bràth a dh’uireasbhaidh air Daibhidh duine a shuidheas air rìgh‐chathair taigh Israeil;

¹⁸ Cha mhò a bhios na sagartan, na Lèbhithich, gun duine ann am làthair‐sa, a dh’ìobradh thabhartas‐loisgte, agus a losgadh thabhartas‐bìdh, agus a dhèanamh ìobairt an còmhnaidh.

¹⁹ Thàinig facal an Tighearna fòs gu Ieremiah, ag ràdh,

²⁰ Mar seo deir an Tighearna, Ma dh’fhaodar leibh mo choicheangal‐sa ris an là a bhriseadh, agus mo choicheangal ris an oidhche, agus nach bi là no oidhche ann nan àm fhèin;

²¹ An sin fòs faodar mo choicheangal‐sa ri Daibhidh m’òglach a bhriseadh, gun mhac a bhith aige gu riaghladh air a rìgh‐chathair; agus ris na Lèbhithich, na sagartan, mo luchd‐frithealaidh.

²² Mar nach faod feachd nèimh a bhith air àireamh, no gaineamh na fairge a bhith air a tomhas: is amhlaidh a nì mise lìonmhor sliochd Dhaibhidh m’òglach, agus na Lèbhithich a tha a’ frithealadh dhomh.

²³ Os bàrr, thàinig facal an Tighearna gu Ieremiah, ag ràdh,

²⁴ A bheil thu a’ toirt fa‑near ciod a tha an sluagh seo a’ labhairt, ag ràdh, An dà theaghlach a roghnaich an Tighearna, rinn e an tilgeadh uaithe? Agus rinn iad dìmeas air mo shluagh‐sa, air chor is nach eil iad gam meas nas mò mar chinneach.

²⁵ Mar seo tha an Tighearna ag ràdh, Mura eil mo choicheangal‐sa ris an là agus ris an oidhche; reachdan nèimh agus na talmhainn mura do shocraich mi;

²⁶ An sin tilgidh mi uam sliochd Iàcoib, agus Dhaibhidh m’òglach, gun aon de a shliochd a ghabhail, gu bhith nan luchd‐riaghlaidh thar sliochd Abrahàim, Isaaic, agus Iàcoib: oir bheir mi air a h‑ais am bruid, agus nì mi tròcair orra.