Hosèa 7 - Am Bìoball Iomraidh Gàidhlig 1880 1992

1 Chronaicheadh sluagh Israeil airson am peacaidhean. 11 Bha fearg air Dia nan aghaidh airson an cealgaireachd.

¹ Nuair a b’àill leamsa Israel a leigheas, an sin leigeadh ris aingidheachd Ephraim agus euceart Shamaria: oir tha iad a’ cur an gnìomh ceilge: seadh, tha an gadaiche a’ dol a‑steach; tha a’ cheathairne ri creach a‑muigh.

² Agus chan eil iad a’ toirt fa‑near nan cridhe gur cuimhne leamsa an uile aingidheachd: a‑nis chuartaich an gnìomharan fhèin iad air gach taobh; tha iad fa chomhair m’aghaidh‐sa.

³ Len aingidheachd tha iad a’ dèanamh an rìgh ait, agus nan uachdaran lem breugan.

⁴ Is adhaltranaich iad uile; mar àmhainn air a teasachadh leis an fhuineadair, nuair a sguireas fear‐obrachaidh na taoise de a fuineadh gus am bi i air a gortachadh.

⁵ Air là fèill ar rìgh, nuair a bha na prionnsachan air an teasachadh le fìon, shìn esan a‑mach a làmh le luchd‐fanaid.

⁶ Oir dh’ullaich iad an cridhe mar àmhainn, am feadh a tha iad ri feall‐fhalach: fad na h‑oidhche tha am fuineadair a’ cadal; anns a’ mhadainn tha i a’ losgadh mar theine lasrach.

⁷ Theasaich iad uile iad fhèin mar àmhainn, agus shluig iad am britheamhan; tha an rìghrean uile air tuiteam; chan eil aon nam measg a tha a’ gairm ormsa.

⁸ Ephraim, mheasg esan e fhèin leis na cinnich; is aran nach deachaidh a thionndadh Ephraim.

⁹ Shluig coigrich suas a neart, agus chan eil fhios aige air: seadh, tha fuilteanan liatha air, an siud agus an seo, gidheadh chan eil fhios aige air.

¹⁰ Agus tha uabhar Israeil a’ tabhairt fianais fa chomhair a shùl: gidheadh chan eil iad a’ tilleadh ris an Tighearna an Dia, no ga iarraidh airson seo uile.

¹¹ Tha Ephraim fòs mar chalaman amaideach, gun eòlas: tha iad a’ glaodhaich ris an Eiphit, tha iad a’ triall gu Asiria.

¹² Nuair a thriallas iad, sgaoilidh mise mo lìon thairis orra; mar eunlaith an adhair bheir mi a‑nuas iad; smachdaichidh mi iad nuair a dh’èisdeas iad rin coitheanal.

¹³ Mo thruaighe iad, oir theich iad uamsa! Lèirsgrios dhaibh, oir chiontaich iad am aghaidh‐sa! Ged shaor mi iad, gidheadh labhair iad breugan am aghaidh.

¹⁴ Agus cha do ghlaodh iad riumsa len cridhe; ged rinn iad donnalaich air an leapaichean airson arbhair agus fìona; tha iad a’ cruinneachadh an ceann a chèile, tha iad ag èirigh suas am aghaidh‐sa.

¹⁵ Seadh, smachdaich mi iad; neartaich mi fòs an gàirdeanan; gidheadh tha iad a’ dealbh aimhleis am aghaidh.

¹⁶ Tha iad a’ tionndadh an dèidh nì gun bhuannachd: tha iad mar bhogha cealgach: tuitidh an uachdarain leis a’ chlaidheamh, airson nimh an teangaidh: seo cùis am maslaidh ann an tìr na h‑Eiphit.