Gnìomharan 24 - Am Bìoball Iomraidh Gàidhlig 1880 1992

1 Air do Phòl a bhith air a chasaid le Tertullus an teangair, 10 fhreagair e air a shon fhèin a‑thaobh a chaitheamh‐beatha agus a theagaisg: 24 shearmonaich e Crìosd don uachdaran agus da mhnaoi. 26 Bha sùil aigesan ri airgead fhaotainn uaith, ach ann an dìomhain.

¹ Agus an ceann còig làithean na dhèidh sin chaidh Ananias an t‑àrd‐shagart sìos maille ris na seanairean, agus ri Tertullus, fear‐tagraidh àraidh, muinntir a nochd iad fhèin an làthair an uachdarain an aghaidh Phòil.

² Agus nuair a ghairmeadh a‑mach e, thòisich Tertullus air a chasaid, ag ràdh, Do bhrìgh gu bheil sinn tromhadsa a’ mealtainn mòr‐shìth, agus gun do rinneadh iomadh deagh ghnìomh don chinneach seo tre do ghliocas‐sa,

³ Tha sinn a’ gabhail ri seo, anns gach àm agus anns gach àite, Fhelics ro‑òirdheirc, leis gach uile bhuidheachas.

⁴ Ach, a‑chum nach cuirinn mòr‐mhoille ort, guidheam ort, ded shuairceas gun èisd thu rinn gu h‑ath‐ghoirid.

⁵ Oir fhuair sinn am fear seo na phlàigh, agus a’ dùsgadh nan Iùdhach uile gu ceannairc air feadh an domhain, agus na cheann‐feadhna do luchd saobh‐chreideamh nan Nàsarènach.

⁶ Neach mar an ceudna a thogair an teampall a thruailleadh; agus a ghlac sinne, agus b’àill leinn breith a thoirt air a rèir ar lagha fhèin:

⁷ Ach air teachd do Lisias an t‑àrd‐cheannard oirnn, thug e le mòr‐ainneart as ar làmhan e,

⁸ Ag àithneadh da luchd‐casaid teachd ad ionnsaigh‐sa; neach om faod thu, le a cheasnachadh, fios fhaotainn air na h‑uile nithean a tha sinne a’ cur as a leth.

⁹ Agus dh’aontaich na h‑Iùdhaich mar an ceudna, ag ràdh gu robh na nithean seo mar sin.

¹⁰ An sin air don uachdaran smèideadh air Pòl e a labhairt, fhreagair esan, Is mò mo mhisneach gu freagairt air mo shon fhèin, gu bheil fhios agam gu robh thusa rè mòran bhliadhnachan ad bhritheamh air a’ chinneach seo:

¹¹ Oir faodaidh tu fios fhaotainn, nach mò na dà‑là‑dheug o chaidh mi suas gu Ierusalem a dhèanamh adhraidh.

¹² Agus cha d’fhuair iad mi a’ deasbaireachd ri aon neach anns an teampall, no a’ brosnachadh an t‑sluaigh gu ceannairc, aon chuid anns na sionagogan, no anns a’ bhaile:

¹³ Cha mhò as urrainn iad na nithean sin a dhearbhadh a tha iad a’ cur as mo leth.

¹⁴ Ach tha mi ag aideachadh seo dhutsa, gur ann a rèir na slighe sin ris an abair iadsan saobh‐chreideamh, a tha mise a’ dèanamh adhraidh do Dhia m’athraichean, a’ creidsinn nan uile nithean a tha sgrìobhte anns an lagh agus anns na fàidhean:

¹⁵ Agus tha dòchas agam ann an Dia, ris a bheil sùil mar an ceudna aca fhèin, gun tig aiseirigh nam marbh, nam fìrean araon agus nan neo‐fhìrean.

¹⁶ Agus an seo tha mi a’ saothrachadh a‑ghnàth cogais neo‐lochdach a bhith agam a‑thaobh Dhè, agus a‑thaobh dhaoine.

¹⁷ A‑nis an dèidh mòran bhliadhnachan, thàinig mi a thoirt dèirce a‑chum mo chinnich, agus thabhartas.

¹⁸ Air a seo fhuair Iùdhaich àraidh on Asia mi air mo ghlanadh anns an teampall, gun sluagh, agus gun bhuaireas;

¹⁹ Muinntir dom bu chòir a bhith an seo ad làthair‐sa, agus m’agairt, nam biodh nì sam bith aca am aghaidh.

²⁰ No abradh iad seo fhèin, ma fhuair iad eucoir sam bith annam, nuair a sheas mi an làthair na comhairle;

²¹ Mura ann a‑mhàin airson an aon fhacail seo, a ghlaodh mi am sheasamh nam measg, gur ann airson aiseirigh nam marbh a tha mi air mo thoirt gu breitheanas leibhse an‑diugh.

²² Agus nuair a chuala Felics na nithean seo, air dha eòlas na bu choileanta a bhith aige air an t‑slighe sin, chuir e air dàil iad, ag ràdh, Nuair a thig Lisias an t‑àrd‐cheannard a‑nuas, làn‐rannsaichidh mi ur cùis.

²³ Agus dh’àithn e do cheannard‐ceud Pòl a ghleidheadh, agus e a bhith fuasgailte aige, agus gun neach de a mhuinntir fhèin a bhacadh o fhrithealadh dha, no teachd da ionnsaigh.

²⁴ Agus an dèidh làithean àraidh, nuair a thàinig Felics maille ra mhnaoi Drusilla, a bha na ban‐Iùdhaich, chuir e fios air Pòl, agus dh’èisd e ris mu thimcheall a’ chreidimh ann an Crìosd.

²⁵ Agus air dhàsan a bhith a’ reusonachadh mu fhìreantachd, stuaim, agus breitheanas ri teachd, ghabh Felics eagal mòr, agus fhreagair e, Imich romhad an tràth seo; nuair a bhios ùine agam, cuiridh mi fios ort.

²⁶ Bha dùil aige mar an ceudna gu rachadh airgead a thoirt dha le Pòl, a‑chum gum fuasgladh e e: uime sin chuir e fios air na bu trice, agus labhair e ris.

²⁷ Ach air do dhà bhliadhna a bhith air an coileanadh, thàinig Porcius Festus an àite Fhelics; agus air do Fhelics a bhith toileach comain a chur air na h‑Iùdhaich, dh’fhàg e Pòl ceangailte.