Gnìomharan 12 - Am Bìoball Iomraidh Gàidhlig 1880 1992

1 Rinn Herod geur‐leanmhainn air na Crìosdaidhean, 2 mharbh e Seumas, 3 agus chuir e Peadar ann am prìosan, neach a thugadh a‑mach le aingeal tre ùrnaighean na h‑eaglais: 23 bhuaileadh Herod le aingeal, agus bhàsaich e gu truagh.

¹ A‑nis mun àm sin, shìn Herod an rìgh a làmhan, a dhèanamh uilc air dream àraidh den eaglais.

² Agus mharbh e Seumas bràthair Eòin leis a’ chlaidheamh.

³ Agus nuair a chunnaic e gun do thaitinn sin ris na h‑Iùdhaich, chaidh e air aghaidh a ghlacadh Pheadair mar an ceudna. (Agus b’iad làithean an arain neo‐ghortaichte a bha ann.)

⁴ Agus ghlac e agus chuir e ann am prìosan e, agus thug e e ra ghleidheadh do cheithir cheathrar shaighdearan, fo rùn a thoirt a‑mach don t‑sluagh an dèidh na càisge.

⁵ Air an adhbhar sin ghleidheadh Peadar anns a’ phrìosan: ach bha bith‐ùrnaigh air a dèanamh leis an eaglais ri Dia air a shon.

⁶ Agus nuair a b’àill le Herod a thoirt a‑mach, anns an oidhche sin fhèin bha Peadar na chadal eadar dithis shaighdearan, ceangailte le dà shlabhraidh: agus bha an luchd‐faire fa chomhair an dorais a’ coimhead a’ phrìosain.

⁷ Agus, feuch, thàinig aingeal an Tighearna air, agus dhealraich solas anns a’ phrìosan: agus bhuail e taobh Pheadair, agus dhùisg e e, ag ràdh, Eirich gu grad. Agus thuit a cheanglaichean de a làmhan.

⁸ Agus thubhairt an t‑aingeal ris, Crioslaich thu fhèin, agus ceangail ort do bhonn‐bhrògan: agus rinn e mar sin. Agus thubhairt e ris, Tilg d’fhallaing umad, agus lean mise.

⁹ Agus chaidh e a‑mach, agus lean e e; agus cha robh fhios aige gu robh e fìor, an nì a rinneadh leis an aingeal: ach shaoil e gum bu taisbeanadh a chunnaic e.

¹⁰ Agus air dhaibh dol tron chiad agus an dara faire, thàinig iad a‑chum a’ gheata iarainn a tha a’ treòrachadh don bhaile, a dh’fhosgail dhaibh leis fhèin: agus air dol a‑mach dhaibh, chaidh iad air an aghaidh tro aon sràid, agus air ball dh’fhalbh an t‑aingeal uaithe.

¹¹ Agus nuair a thàinig Peadar da ionnsaigh fhèin, thubhairt e, A‑nis tha fhios agam gu fìrinneach gun do chuir an Tighearna aingeal uaithe, agus gun do shaor e mi o làimh Heroid, agus o uile dhùil poball nan Iùdhach.

¹² Agus nuair a smaoinich e air a’ chùis, thàinig e gu taigh Mhuire, màthair Eòin, don co‑ainm Marcus, far an robh mòran cruinn, agus iad ri ùrnaigh.

¹³ Agus nuair a bha Peadar a’ bualadh doras a’ gheata, thàinig gruagach dom b’ainm Ròda a dh’èisdeachd.

¹⁴ Agus nuair a dh’aithnich i guth Pheadair, tre aoibhneas cha d’fhosgail i an geata, ach ruith i a‑steach, agus dh’innis i gu robh Peadar na sheasamh aig a’ gheata.

¹⁵ Ach thubhairt iad rithe, Tha thu air mhì‐chèill. Ach bha ise a’ toirt dearbh‐chinnte gu robh e mar sin. An sin thubhairt iad, Is e aingeal a tha ann.

¹⁶ Ach bhuanaich Peadar a’ bualadh an dorais: agus nuair a dh’fhosgail iad, agus a chunnaic iad e, bha iad làn uamhais.

¹⁷ Ach air dhàsan smèideadh orra le a làimh iad a bhith nan tosd, chuir e an cèill dhaibh cionnas a thug an Tighearna as a’ phrìosan e. Agus thubhairt e, Innsibh na nithean seo do Sheumas agus do na bràithrean. Agus air dol a‑mach dha, chaidh e gu àit eile.

¹⁸ Agus air teachd don là bha iomairt nach bu bheag am measg nan saighdearan, ciod a thachair do Pheadar.

¹⁹ Agus nuair a dh’iarr Herod e, agus nach d’fhuair e e, cheasnaich e an luchd‐coimhead, agus dh’òrdaich e an toirt air falbh a‑chum peanais. Agus chaidh e sìos o Iudèa gu Cesarèa, agus rinn e còmhnaidh an sin.

²⁰ Agus bha fearg mhòr air Herod ri muinntir Thìruis agus Shìdoin: ach thàinig iadsan a dh’aon inntinn da ionnsaigh, agus air dhaibh Blastus, seòmradair an rìgh, a thoirt air an crann, dh’iarr iad sìth; do bhrìgh gu robh an tìr air a beathachadh le tìr an rìgh.

²¹ Agus air là òrdaichte, air do Herod a bhith air a sgeadachadh le aodach rìoghail, agus na shuidhe air a rìgh‐chathair, labhair e gu deas‐bhriathrach riu.

²² Agus rinn an sluagh iolach, ag ràdh, Is guth dè seo, agus cha ghuth duine.

²³ Agus air ball bhuail aingeal an Tighearna e, do bhrìgh nach tug e a’ ghlòir do Dhia: agus dh’itheadh le cnuimhean e, agus chaidh an deò as.

²⁴ Ach dh’fhàs facal an Tighearna agus mheudaicheadh e.

²⁵ Agus thill Barnabas agus Saul o Ierusalem, air dhaibh am ministrealachd a choileanadh, a’ toirt leo mar an ceudna Eòin, don co‑ainm Marcus.