Genesis 5 - Am Bìoball Iomraidh Gàidhlig 1880 1992

1 Ginealach, beatha, agus bàs nam prìomh‐aithrichean, o Adhamh gu Nòah. 24 Diadhaidheachd Enoich, agus a ghabhail suas do fhlaitheanas.

¹ Is e seo leabhar ginealaichean Adhaimh. Anns an là anns an do chruthaich Dia an duine, ann an coslas Dhè rinn e e;

² Fireannach agus boireannach chruthaich e iad; agus bheannaich e iad, agus thug e Adhamh mar ainm orra, anns an là anns an do chruthaicheadh iad.

³ Agus bha Adhamh beò ceud agus deich‐bliadhna‑fichead, agus ghin e mac na choslas fhèin, a rèir a ìomhaigh fhèin; agus thug e Set mar ainm air:

⁴ Agus b’iad làithean Adhaimh, an dèidh dha Set a ghintinn, ochd ceud bliadhna: agus ghin e mic agus nigheanan:

⁵ Agus b’iad uile làithean Adhaimh a bha e beò naoi ceud agus deich‐bliadhna‑fichead: agus fhuair e bàs.

⁶ Agus bha Set beò ceud agus còig bliadhna, agus ghin e Enos:

⁷ Agus bha Set beò, an dèidh dha Enos a ghintinn, ochd ceud agus seachd bliadhna, agus ghin e mic agus nigheanan:

⁸ Agus b’iad uile làithean Shet naoi ceud agus dà‑bhliadhna‑dheug: agus fhuair e bàs.

⁹ Agus bha Enos beò ceithir‐fichead bliadhna agus a deich, agus ghin e Càinan:

¹⁰ Agus bha Enos beò, an dèidh dha Càinan a ghintinn, ochd ceud agus còig‐bliadhna‑deug, agus ghin e mic agus nigheanan:

¹¹ Agus b’iad uile làithean Enois naoi ceud agus còig bliadhna: agus fhuair e bàs.

¹² Agus bha Càinan beò deich bliadhna agus trì‐fichead, agus ghin e Mahalalil:

¹³ Agus bha Càinan beò, an dèidh dha Mahalalil a ghintinn, ochd ceud agus dà‑fhichead bliadhna, agus ghin e mic agus nigheanan:

¹⁴ Agus b’iad uile làithean Chàinain naoi ceud agus deich bliadhna: agus fhuair e bàs.

¹⁵ Agus bha Mahalalil beò còig bliadhna agus trì‐fichead, agus ghin e Iàred:

¹⁶ Agus bha Mahalalil beò, an dèidh dha Iàred a ghintinn, ochd ceud agus deich‐bliadhna‑fichead, agus ghin e mic agus nigheanan:

¹⁷ Agus b’iad uile làithean Mhahalalil ochd ceud ceithir‐fichead agus còig‐bliadhna‑deug: agus fhuair e bàs.

¹⁸ Agus bha Iàred beò ceud agus trì‐fichead agus dà bhliadhna, agus ghin e Enoch:

¹⁹ Agus bha Iàred beò, an dèidh dha Enoch a ghintinn, ochd ceud bliadhna, agus ghin e mic agus nigheanan:

²⁰ Agus b’iad uile làithean Iàreid naoi ceud trì‐fichead agus dà bhliadhna; agus fhuair e bàs.

²¹ Agus bha Enoch beò trì‐fichead agus còig bliadhna, agus ghin e Metùselah:

²² Agus ghluais Enoch maille ri Dia, an dèidh dha Metùselah a ghintinn, trì cheud bliadhna, agus ghin e mic agus nigheanan:

²³ Agus b’iad uile làithean Enoich trì cheud agus trì‐fichead agus còig bliadhna:

²⁴ Agus ghluais Enoch maille ri Dia: agus cha robh e ann; oir thug Dia leis e.

²⁵ Agus bha Metùselah beò ceud agus ceithir‐fichead agus seachd bliadhna, agus ghin e Làmech:

²⁶ Agus bha Metùselah beò, an dèidh dha Làmech a ghintinn, seachd ceud, ceithir‐fichead agus dà bhliadhna, agus ghin e mic agus nigheanan:

²⁷ Agus b’iad uile làithean Mhetùselah naoi ceud agus trì‐fichead agus naoi bliadhna: agus fhuair e bàs.

²⁸ Agus bha Làmech beò ceud agus ceithir‐fichead agus dà bhliadhna, agus ghin e mac:

²⁹ Agus thug e Nòah mar ainm air, ag ràdh, Bheir an tì seo fhèin sòlas dhuinne a‑thaobh ar n‑obrach agus saothair ar làmh, a‑thaobh na talmhainn a mhallaich an Tighearna.

³⁰ Agus bha Làmech beò, an dèidh dha Nòah a ghintinn, còig cheud, ceithir‐fichead agus còig‐bliadhna‑deug, agus ghin e mic agus nigheanan:

³¹ Agus b’iad uile làithean Làmeich, seachd ceud agus trì‐fichead agus seachd‐bliadhna‑deug: agus fhuair e bàs.

³² Agus bha Nòah còig ceud bliadhna a dh’aois: agus ghin Nòah Sem, Ham, agus Iàphet.