Genesis 35 - Am Bìoball Iomraidh Gàidhlig 1880 1992

1 Thàinig Iàcob gu Betel, far an do thog e altair do Dhia. 9 Tha e air a bheannachadh. 16 Bàs Racheil. 23 Mic Iàcoib. 28 Aois Isaaic, a bhàs, agus adhlac.

¹ Agus thubhairt Dia ri Iàcob, Eirich, imich suas gu Betel, agus gabh còmhnaidh an sin; agus dèan an sin altair do Dhia, a dh’fhoillsich e fhèin dhut nuair a theich thu o ghnùis Esau, do bhràthair.

² Agus thubhairt Iàcob ra theaghlach, agus riùsan uile a bha maille ris, Cuiribh uaibh na diathan coimheach a tha nur measg, agus bithibh glan, agus mùthaibh ur n‑aodach:

³ Agus èireamaid, agus rachamaid suas gu Betel; agus nì mise an sin altair do Dhia, a dh’èisd rium ann an là mo chruaidh‐chàis, agus a bha maille rium anns an t‑slighe air an deachaidh mi.

⁴ Agus thug iad do Iàcob na diathan coimheach uile a bha nan làimh, agus an cluas‐fhàinnean a bha nan cluasan; agus dh’fhalaich Iàcob iad fon daraig a bha làimh ri Sechem.

⁵ Agus dh’imich iad: agus bha eagal Dhè air na bailtean a bha mun cuairt orra, agus cha do rinn iad tòireachd air mic Iàcoib.

⁶ Mar sin thàinig Iàcob gu Luds, a tha ann an tìr Chanàain, eadhon Betel, e fhèin agus an sluagh uile a bha maille ris.

⁷ Agus thog e an sin altair, agus thug e El‑betel mar ainm air an àite; do bhrìgh ann an sin gun d’fhoillsich Dia e fhèin dha, nuair a theich e o ghnùis a bhràthar.

⁸ Ach fhuair Deborah, banaltram Rebecah, bàs, agus dh’adhlaiceadh i fo Bhetel, fo dharaig: agus thugadh Alon‐bacut mar ainm air.

⁹ Agus dh’fhoillsich Dia e fhèin do Iàcob a‑rìs, nuair a thàinig e à Padan‐àram; agus bheannaich e e.

¹⁰ Agus thubhairt Dia ris, Is e Iàcob as ainm dhut; cha ghoirear Iàcob dhìot nas mò, ach is e Israel a bhios na ainm ort: agus thug e Israel mar ainm air.

¹¹ Agus thubhairt Dia ris, Is mise an Dia Uile‐chumhachdach; bi sìolmhor agus fàs lìonmhor: thig cinneach agus coitheanal chinneach uat, agus thig rìghrean a‑mach as do leasraidh.

¹² Agus am fearann a thug mi do Abrahàm agus do Isaac, dhutsa bheir mi e; agus dod shliochd ad dhèidh bheir mi am fearann.

¹³ Agus chaidh Dia suas uaithe anns an àit anns an do labhair e ris.

¹⁴ Agus chuir Iàcob suas carragh anns an àit anns an do labhair e ris, carragh cloiche, agus dhòirt e tabhartas‐dibhe air, agus dhòirt e ola air.

¹⁵ Agus thug Iàcob Betel mar ainm air an àite far an do labhair Dia ris.

¹⁶ Agus dh’imich iad o Bhetel, agus cha robh ach astar beag aca ri teachd gu Ephrat: agus thàinig tinneas cloinne air Rachel, agus bha saothair chruaidh oirre.

¹⁷ Agus nuair a bha i ann an cruaidh shaothair, an sin thubhairt a’ bhean‐ghlùine rithe, Na biodh eagal ort, oir bidh am mac seo agad cuideachd.

¹⁸ Agus nuair a bha a h‑anam a’ dealachadh rithe (oir fhuair i bàs), thug i Ben‐oni mar ainm air: ach thug a athair mar ainm air Beniàmin.

¹⁹ Agus fhuair Rachel bàs, agus dh’adhlaiceadh i anns an t‑slighe gu Ephrat, eadhon Betlehem.

²⁰ Agus chuir Iàcob suas carragh air a h‑uaigh: is e seo carragh uaigh Racheil gus an là‑an‑diugh.

²¹ Agus ghabh Israel a thuras, agus shuidhich e a bhùth an taobh thall de thùr Edeir.

²² Agus nuair a bha Israel a chòmhnaidh anns an tìr sin, chaidh Reuben agus laigh e le Bilhah, coileabach a athar: agus chuala Israel sin. A‑nis bha dà‑mhac‐dheug aig Iàcob:

²³ Mic Lèah: Reuben ciad‐ghin Iàcoib, agus Simeon, agus Lèbhi, agus Iùdah, agus Isachar, agus Sebulun;

²⁴ Mic Racheil: Iòseph agus Beniàmin;

²⁵ Agus mic Bhilhah, banoglach Racheil: Dan agus Naphtali:

²⁶ Agus mic Shilpah, banoglach Lèah: Gad agus Aser. Is iad sin mic Iàcoib, a rugadh dha ann am Padan‐àram.

²⁷ Agus thàinig Iàcob a‑chum Isaaic, a athair, do Mhamre, gu baile Arbah, eadhon Hebron, far an robh Abrahàm agus Isaac air chuairt.

²⁸ Agus b’iad làithean Isaaic ceud bliadhna is ceithir‐fichead.

²⁹ Agus thug Isaac suas an deò, agus dh’eug e, agus chruinnicheadh e a‑chum a mhuinntir fhèin, agus e na sheann duine agus làn de làithean. Agus dh’adhlaic a mhic Esau agus Iàcob e.