Genesis 21 - Am Bìoball Iomraidh Gàidhlig 1880 1992

1 Rugadh agus thimcheall‐ghearradh Isaac. 9 Hàgar agus a mac Ismael air an cur air falbh. 22 Coicheangal eadar Abimelech agus Abrahàm.

¹ Agus dh’amhairc an Tighearna air Sàrah mar a thubhairt e, agus rinn an Tighearna do Shàrah mar a labhair e.

² Oir dh’fhàs Sàrah torrach, agus rug i mac do Abrahàm na sheann aois, anns an àm shuidhichte mun do labhair Dia ris.

³ Agus thug Abrahàm Isaac mar ainm air a mhac a rugadh dha, a rug Sàrah dha.

⁴ Agus thimcheall‐gheàrr Abrahàm Isaac a mhac, nuair a bha e ochd làithean a dh’aois, mar a dh’àithn Dia dha.

⁵ Agus bha Abrahàm ceud bliadhna a dh’aois, nuair a rugadh a mhac Isaac dha.

⁶ Agus thubhairt Sàrah, Thug Dia orm gàire a dhèanamh: agus gach neach a chluinneas, nì e gàire maille rium.

⁷ Agus thubhairt i, Cò a theireadh ri Abrahàm gun tugadh Sàrah cìoch do chloinn? Oir rug mi mac dha na sheann aois.

⁸ Agus dh’fhàs an leanabh, agus chuireadh bhàrr na cìche e: agus rinn Abrahàm cuirm mhòr anns an là an do chuireadh Isaac bhàrr na cìche.

⁹ Agus chunnaic Sàrah mac Hàgair a’ bhan‐Èiphiteach, a rug i do Abrahàm, ri fanaid.

¹⁰ Uime sin thubhairt i ri Abrahàm, Tilg a‑mach a’ bhan‐tràill seo, agus a mac: oir cha bhi mac na ban‐tràille seo na oighre maille rim mhac‐sa, eadhon ri Isaac.

¹¹ Agus bha an nì ro‑dhoilgheasach ann an sùilean Abrahàim airson a mhic.

¹² Agus thubhairt Dia ri Abrahàm, Na biodh e doilgheasach ad shùilean airson an òganaich, agus airson do bhan‐tràille; a‑thaobh gach nì a thubhairt Sàrah riut, èisd ra guth; oir is ann an Isaac a dh’ainmichear dhutsa sliochd.

¹³ Agus mar an ceudna de mhac na ban‐tràille nì mise cinneach, do bhrìgh gur e do shliochd‐sa e.

¹⁴ Agus dh’èirich Abrahàm suas gu moch anns a’ mhadainn, agus ghabh e aran agus searrag uisge, agus thug e sin do Hàgar, agus chuir e air a gualainn e, agus an leanabh, agus chuir e air falbh i: agus dh’imich i, agus chaidh i air seachran ann am fàsach Bheer‐sèba.

¹⁵ Agus chaitheadh an t‑uisge on t‑searraig, agus thilg i an leanabh fo aon de na preasan.

¹⁶ Agus dh’fhalbh i, agus shuidh i sìos fa chomhair, urchair saighde: oir thubhairt i, Na faiceam bàs an leinibh. Agus shuidh i fa chomhair, agus thog i suas a guth, agus ghuil i.

¹⁷ Agus chuala Dia guth an òganaich; agus ghairm aingeal Dhè air Hàgar o nèamh agus thubhairt e rithe, Ciod a tha a’ teachd riut, a Hàgar? Na biodh eagal ort; oir chuala Dia guth an òganaich far a bheil e.

¹⁸ Eirich, tog suas an t‑òganach, agus gabh greim ad làimh dheth; oir nì mise na chinneach mòr e.

¹⁹ Agus dh’fhosgail Dia a sùilean, agus chunnaic i tobar uisge; agus chaidh i, agus lìon i an t‑searrag le uisge, agus thug i deoch don òganach.

²⁰ Agus bha Dia leis an òganach; agus dh’fhàs e suas, agus ghabh e còmhnaidh anns an fhàsach, agus bha e na fhear‐bogha.

²¹ Agus ghabh e còmhnaidh ann am fàsach Phàrain: agus ghabh a mhàthair bean dha à tìr na h‑Èiphit.

²² Agus anns an àm sin fhèin labhair Abimelech, agus Phicol, àrd‐cheannard a shluaigh, ri Abrahàm, ag ràdh, Tha Dia leat anns gach nì a tha thu a’ dèanamh.

²³ A‑nis uime sin mionnaich dhòmhsa air Dia nach buin thu gu fealltach riumsa, no rim mhac, no ri mac mo mhic: ach a rèir a’ choibhneis a rinn mi riut, nì thusa riumsa, agus ris an tìr anns an robh thu air chuairt.

²⁴ Agus thubhairt Abrahàm, Bheir mi mo mhionnan.

²⁵ Agus thug Abrahàm achmhasan do Abimelech airson tobar uisge, a thug seirbhisich Abimeleich a‑mach le ainneart.

²⁶ Agus thubhairt Abimelech, Cha b’fhiosrach mise cò a rinn an gnìomh seo: cha d’innis thu fhèin dhomh, agus cha mhò a chuala mi a’ bheag ma thimcheall gus an‑diugh.

²⁷ Agus ghabh Abrahàm caoraich agus crodh, agus thug e iad do Abimelech; agus rinn iad le chèile coicheangal.

²⁸ Agus chuir Abrahàm seachd uain bhoireann den treud air leth leo fhèin.

²⁹ Agus thubhairt Abimelech ri Abrahàm, Ciod iad na seachd uain bhoireann sin a chuir thu air leth leo fhèin?

³⁰ Agus thubhairt e, Oir gabhaidh tu na seachd uain bhoireann sin om làimh, a‑chum gum bi iad nam fianais dhòmhsa gun do chladhaich mi an tobar seo.

³¹ Uime sin, thug e Beer‐sèba mar ainm air an àite sin; do bhrìgh an sin gun tug iad am mionnan le chèile.

³² Mar seo rinn iad coicheangal aig Beer‐sèba: an sin dh’èirich Abimelech suas, agus Phicol, àrd‐cheannard a shluaigh, agus thill iad do thìr nam Philisteach.

³³ Agus shuidhich Abrahàm doire chraobh aig Beer‐sèba, agus ghairm e an sin air ainm an Tighearna, an Dia sìorraidh.

³⁴ Agus bha Abrahàm air chuairt ann an tìr nam Philisteach mòran de làithean.