Galàtianach 6 - Am Bìoball Iomraidh Gàidhlig 1880 1992

1 Dh’iarr Pòl air na Galàtianaich buntainn gu sèimh ri bràthair a thuislich, 2 agus uallach a chèile a ghiùlan, 6 a bhith tabhartach dhan luchd‐teagaisg, 9 agus gun sgìtheachadh de mhaith a dhèanamh: 12 nochd e ciod a tha iadsan a tha a’ searmonachadh an timcheall‐ghearraidh ag iarraidh.

¹ A bhràithrean, ma ghlacar neach ann an coire air bith gu h‑obann, sibhse a tha spioradail togaibh suas a shamhail sin de dhuine ann an spiorad na macantachd; a’ toirt aire dhut fhèin, nach buairear thu mar an ceudna.

² Giùlainibh uallaichean a chèile, agus mar sin coileanaibh lagh Chrìosd.

³ Oir ma shaoileas duine gur nì‑eigin e fhèin, gun a bhith ann ach neoni, tha e ga mhealladh fhèin.

⁴ Ach dearbhadh gach neach a obair fhèin, agus an sin bidh adhbhar gàirdeachais aige da thaobh fhèin a‑mhàin, agus chan ann a‑thaobh neach eile.

⁵ Oir giùlainidh gach neach a uallach fhèin.

⁶ Co‑roinneadh an neach a tha air a theagasg anns an fhacal ris an neach a tha ga theagasg, anns na h‑uile nithean matha.

⁷ Na meallar sibh; cha dèanar fanaid air Dia: oir ge bè nì a shìol‐chuireas duine, an nì ceudna buainidh e.

⁸ Oir an tì a chuireas da fheòil, buainidh e on fheòil truaillidheachd; ach an tì a chuireas don Spiorad, buainidh e on Spiorad a’ bheatha shuthainn.

⁹ Agus na sgìthicheamaid de mhath a dhèanamh: oir ann an àm iomchaidh buainidh sinn, mura fannaich sinn.

¹⁰ Uime sin a rèir mar a tha cothrom againn, dèanamaid math do na h‑uile dhaoine, ach gu h‑àraidh dhaibh‐san a tha de theaghlach a’ chreidimh.

¹¹ Tha sibh a’ faicinn meud na litreach a sgrìobh mi dhuibh lem làimh fhèin.

¹² A mheud lem miann iad fhèin a thaisbeanadh gu sgiamhach anns an fheòil, tha iad gur n‑èigneachadh gu bhith air ur timcheall‐ghearradh; a‑mhàin a‑chum nach dèante geur‐leanmhainn orra airson crann‐ceusaidh Chrìosd.

¹³ Oir chan eil iadsan fhèin a tha air an timcheall‐ghearradh a’ coimhead an lagha: ach is àill leo sibhse a bhith air ur timcheall‐ghearradh, a‑chum is gun dèan iad uaill nur feòil.

¹⁴ Ach nar leigeadh Dia gun dèanainn‐sa uaill ach ann an crann‐ceusaidh ar Tighearna Iosa Crìosd, tre a bheil an saoghal air a cheusadh dhòmhsa, agus mise don t‑saoghal.

¹⁵ Oir ann an Iosa Crìosd chan eil èifeachd air bith ann an timcheall‐ghearradh, no ann an neo‐thimcheall‐ghearradh, ach ann an cruthachadh nuadh.

¹⁶ Agus a mheud is a shiùbhlas a rèir na riaghailt seo, sìth orra, agus tròcair, agus air Israel Dhè.

¹⁷ O seo a‑mach na cuireadh neach sam bith dragh orm; oir tha mi a’ giùlan comharraidhean an Tighearna Iosa ann am chorp.

¹⁸ A bhràithrean, gu robh gràs ar Tighearna Iosa Crìosd maille ri ur spiorad. Amen.