Esra 10 - Am Bìoball Iomraidh Gàidhlig 1880 1992

1 Thug Sechaniah misneach do Esra, agus chomhairlich e na mnathan coimheach a chur air falbh. 7 Chruinnicheadh an sluagh gu Ierusalem, 9 agus dh’aidich iad am peacaidhean. 18 Àireamh na muinntir a ghabh dhaibh fhèin mnathan coimheach.

¹ A‑nis nuair a rinn Esra ùrnaigh, agus a dh’aidich e, a’ gul, agus ga thilgeadh fhèin sìos fa chomhair taigh Dhè, chruinnich da ionnsaigh à Israel co‑chruinneachadh ro‑mhòr de fhir, agus de mhnathan, agus de chloinn: oir ghuil an sluagh gu mòr.

² Agus labhair Sechaniah mac Iehieil, aon de mhic Elaim, agus thubhairt e ri Esra, Pheacaich sinn an aghaidh ar Dè, agus ghabh sinn dar n‑ionnsaigh mnathan coimheach de shluagh na tìre: ach a‑nis tha dòchas ann an Israel a‑thaobh an nì seo.

³ A‑nis uime sin dèanamaid coicheangal ri ar Dia, na mnathan uile a chur uainn, agus iadsan a rugadh leo, a rèir comhairle mo thighearna, agus na muinntir a chriothnaicheas ri àithne ar Dè, agus dèanar a rèir an lagha.

⁴ Eirich; oir dhutsa buinidh an nì seo, agus bidh sinne maille riut: gabh misneach, agus dèan e.

⁵ Agus dh’èirich Esra, agus thug e air na h‑àrd‐shagartan, na Lèbhithich, agus Israel uile mionnachadh gun dèanadh iad a rèir an fhacail seo; agus mhionnaich iad.

⁶ An sin dh’èirich Esra o làthair taigh Dhè, agus chaidh e do sheòmar Iohanain, mhic Eliasib: agus nuair a thàinig e an sin, cha d’ith e aran, agus cha d’òl e uisge; oir rinn e bròn airson cionta na muinntir a thugadh air falbh.

⁷ Agus thug iad gairm air feadh Iùdah agus Ierusaleim do uile chloinn a’ bhraighdeanais, iad a chruinneachadh ri chèile gu Ierusalem:

⁸ Agus ge bè neach nach tigeadh an ceann trì làithean, a rèir comhairle nan uachdaran agus nan seanair, gun tugte uaithe a mhaoin uile, agus gum biodh e fhèin air a dhealachadh o cho‐chruinneachadh na muinntir a thugadh air falbh.

⁹ Agus chruinnicheadh fir Iùdah agus Bheniàmin uile gu Ierusalem an ceann trì làithean: bha e anns an naoidheamh mìos, air an fhicheadamh là den mhìos: agus shuidh an sluagh uile ann an sràid taigh Dhè, air chrith airson an nì seo, agus airson an uisge mhòir.

¹⁰ Agus dh’èirich Esra an sagart, agus thubhairt e riu, Pheacaich sibh, agus ghabh sibh dhuibh fhèin mnathan coimheach a mheudachadh peacadh Israeil.

¹¹ A‑nis, matà, dèanaibh aidmheil don Tighearna, Dia ur n‑athraichean, agus coileanaibh a thoil; agus dealaichibh sibh fhèin o shluagh na tìre, agus o na mnathan coimheach.

¹² Agus fhreagair an coitheanal uile, agus thubhairt iad le guth àrd, Mar sin, a rèir d’fhacail, tha e ceangailte oirnne a dhèanamh.

¹³ Ach tha an sluagh lìonmhor, agus is àm mòr‐uisge e, agus chan urrainn sinn seasamh a‑muigh, agus chan obair aon là no dà seo: oir tha sinn lìonmhor a pheacaich anns an nì seo.

¹⁴ Seasadh a‑nis ar n‑uachdarain den choitheanal uile, agus, aig àmannan suidhichte, thigeadh iadsan uile nar bailtean a ghabh dhaibh fhèin mnathan coimheach, agus maille riu seanairean gach baile agus a bhritheamhan, gus an tionndaidhear fearg laiste ar Dè uainn a‑thaobh an nì seo.

¹⁵ Sheas a‑mhàin Ionatan mac Asaheil, agus Iahasiah mac Thichbah, airson seo: agus chuidich Mesulam agus Sabetai an Lèbhitheach leo.

¹⁶ Agus rinn clann a’ bhraighdeanais mar sin: agus dhealaicheadh Esra an sagart, agus cinn àraidh nan athraichean a rèir taigh an athraichean, agus iad uile a rèir an ainmean, agus shuidh iad sìos air a’ chiad là den deicheamh mìos a rannsachadh na cùise.

¹⁷ Agus chrìochnaich iad a‑thaobh nan daoine uile a ghabh dhaibh fhèin mnathan coimheach, air a’ chiad là den chiad mhìos.

¹⁸ Agus am measg mic nan sagart fhuaireadh a ghabh dhaibh fhèin mnathan coimheach: De mhic Iesua, mhic Iosadaic, agus a bhràithrean: Maaseiah, agus Elièser, agus Iarib, agus Gedaliah.

¹⁹ Agus thug iad an làmhan gun cuireadh iad uapa am mnathan: agus air dhaibh a bhith ciontach, thug iad reithe den treud airson an cionta.

²⁰ Agus de mhic Imeir: Hanani, agus Sebadiah.

²¹ Agus de mhic Harim: Maaseiah, agus Eliah, agus Semaiah, agus Iehiel, agus Udsiah.

²² Agus de mhic Phasuir: Elioenai, Maaseiah, Ismael, Netaneel, Iosabad, agus Elasah.

²³ Agus de na Lèbhithich: Iosabad, agus Simei, agus Celaiah (is e sin Celita), Petahiah, Iùdah agus Elièser.

²⁴ Agus den luchd‐seinn: Eliasib: agus de na dorsairean; Salum agus Telem, agus Uri.

²⁵ Agus de Israel: De mhic Pharois: Ramaiah, agus Iesiah, agus Malchiah, agus Miamin, agus Eliàser, agus Malchiah, agus Benaiah.

²⁶ Agus de mhic Elaim: Mataniah, Sechariah, agus Iehiel, agus Abdi, agus Ierimot, agus Eliah.

²⁷ Agus de mhic Shatu: Elioenai, Eliasib, Mataniah, agus Ieremot, agus Sabad, agus Asisa.

²⁸ Agus de mhic Bhebai: Iehohanan, Hananiah, Sabai, agus Atlai.

²⁹ Agus de mhic Bhani: Mesulam, Maluch, agus Adaiah, Iasub, agus Seal, agus Ramot.

³⁰ Agus de mhic Phahat‐mhòaib: Adna, agus Chelal, Benaiah, Maaseiah, Mataniah, Besalil, agus Binui, agus Manaseh.

³¹ Agus de mhic Harim: Elièser, Isiah, Malchiah, Semaiah, Simeon,

³² Beniàmin, Maluch, agus Semariah.

³³ De mhic Hasuim: Matenai, Matatah, Sabad, Eliphelet, Ieremai, Manaseh, agus Simei.

³⁴ De mhic Bhani: Maadai, Amram, agus Uel,

³⁵ Benaiah, Bedaiah, Cheluh,

³⁶ Bhaniah, Meremot, Eliasib,

³⁷ Mataniah, Matenai, agus Iaasau,

³⁸ Agus Bani, agus Binui, Simei,

³⁹ Agus Selemiah, agus Nàtan, agus Adaiah,

⁴⁰ Machnadebai, Sasai, Sàrai,

⁴¹ Asareel, agus Selemiah, Samariah,

⁴² Salum, Amariah, agus Iòseph.

⁴³ De mhic Nebo: Ieiel, Matitiah, Sabad, Sebina, Iadau, agus Ioel, Benaiah.

⁴⁴ Ghabh iad sin uile dhaibh fhèin mnathan coimheach: agus aig cuid dhiubh bha mnathan ris an robh clann aca.