Eseciel 42 - Am Bìoball Iomraidh Gàidhlig 1880 1992

1 Seòmraichean nan sagart. 13 Naomhaichear iad don Tighearna. 15 Tomhas na cùirte a‑mach.

¹ An sin thug e a‑mach mi gus a’ chùirt a‑muigh, air slighe na h‑àird a tuath, agus thug e mi don t‑seòmar a bha os cionn an ionaid air leth, agus a bha fa chomhair na h‑aitreibh ris an àird a tuath.

² Fa chomhair fad ceud làmh‐choille bha an doras tuath; agus b’e an leud leth‐cheud làmh‐choille.

³ Fa chomhair dorsan na cùirte a‑staigh, agus fa chomhair an ùrlair a bha airson na cùirte a‑muigh, bha seòmar air aghaidh seòmair air trì ùrlair.

⁴ Agus fa chomhair nan seòmraichean bha àite spaisdearachd deich làmhan‐coille air leud a‑staigh, agus ceud làmh‐choille air fad; agus bha na dorsan ri tuath.

⁵ Agus bha na seòmraichean uachdarach cumhang: oir aca seo chrìochnaich na seòmraichean beaga, a dh’èirich gus a’ chiad agus an dara ùrlar den aitreibh.

⁶ Oir bha iad nan trì ùrlair, ach cha robh pruip aca mar phruip nan cùirtean; uime sin bha an taigh na bu chumhainge na a’ chuid a b’ìochdaraiche agus a bu mheadhonaiche on làr.

⁷ Agus bha am balla a bha a‑muigh fa chomhair nan seòmraichean, leth ris a’ chùirt a b’fhaide a‑muigh air beulaibh nan seòmraichean, leth‐cheud làmh‐choille air fad.

⁸ Oir b’e fad nan seòmraichean a bha anns a’ chùirt a‑muigh leth‐cheud làmh‐choille: agus, feuch, fa chomhair an teampaill bha ceud làmh‐choille.

⁹ Agus fo na seòmraichean seo bha an dol a‑steach air an taobh an ear, mar thèid aon a‑steach annta on chùirt a‑muigh.

¹⁰ Bha na seòmraichean ann an tighead balla na cùirte ris an àird an ear, thall fa chomhair an ionaid air leth, agus thall fa chomhair an taighe.

¹¹ Agus bha an t‑àite spaisdearachd aig an aghaidh cosmhail ris a sin a bha aig seòmraichean na h‑àird a tuath; ionnan ann am fad, agus ionnan ann an leud; agus bha an uile dhol a‑mach araon air an aon dreach, agus fòs an dorsan.

¹² Agus a rèir dorsan nan seòmraichean a bha ris an àird a deas, bha doras ann an ceann na slighe, an t‑slighe dìreach fa chomhair a’ bhalla, ris an àird an ear, mar a thèid aon a‑steach orra.

¹³ An sin thubhairt e rium, Na seòmraichean mu thuath, agus na seòmraichean mu dheas, a tha fa chomhair an ionaid air leth, is seòmraichean naomh iad, far an ith na sagartan a thig dlùth don Tighearna an nithean as ro‑naoimhe: an sin cuiridh iad na nithean as ro‑naoimhe, agus an tabhartas‐bìdh, agus an tabhartas‐peacaidh, agus an tabhartas‐easaontais; oir tha an t‑ionad naomh.

¹⁴ Nuair a thèid na sagartan a‑steach ann, an sin cha tèid iad a‑mach as an ionad naomh gus a’ chùirt a‑muigh, ach an sin cuiridh iad an aodaichean, far a bheil iad a’ frithealadh; oir tha iad naomh: agus cuiridh iad orra aodaichean eile, agus thig iad dlùth do na nithean sin a tha airson a’ phobaill.

¹⁵ A‑nis nuair a chuir e crìoch air tomhas an taighe a‑staigh, thug e a‑mach mi a‑chum a’ gheata, a tha ag amharc ris an àird an ear, agus thomhais e mun cuairt e.

¹⁶ Thomhais e an taobh an ear leis an t‑slait‐thomhais, còig agus ceud slat leis an t‑slait‐thomhais timcheall mun cuairt.

¹⁷ Thomhais e an taobh mu thuath, còig agus ceud slat, leis an t‑slait‐thomhais timcheall mun cuairt.

¹⁸ Thomhais e an taobh a deas, còig agus ceud slat, leis an t‑slait‐thomhais.

¹⁹ Thionndaidh e mun cuairt gus an taobh an iar, agus thomhais e còig agus ceud slat, leis an t‑slait‐thomhais.

²⁰ Thomhais e air na ceithir taobhan e: bha balla aige mun cuairt, còig agus ceud slat air fad, agus còig agus ceud air leud a dhèanamh dealachaidh eadar an t‑ionad naomh agus an t‑àite coitcheann.