Eseciel 29 - Am Bìoball Iomraidh Gàidhlig 1880 1992

1 Breitheanas an aghaidh Phàraoh do bhrìgh gun do bhuin e gu cealgach ri Israel. 8 Cuirear tìr na h‑Èiphit fàs, ach cruinnichear a sluagh a‑rìs dhan dùthaich fhèin an ceann dà‑fhichead bliadhna. 17 Gheibh Nebuchadnesar an Èiphit mar thuarasdal airson a sheirbhis an aghaidh Thìruis.

¹ Anns an deicheamh bliadhna, anns an deicheamh mìos, air an dara‑là‑deug den mhìos, thàinig facal an Tighearna am ionnsaigh, ag ràdh,

² A mhic an duine, cuir do ghnùis an aghaidh Phàraoh rìgh na h‑Eiphit, agus dèan fàistneachd na aghaidh‐san, agus an aghaidh na h‑Eiphit uile.

³ Labhair agus abair, Mar seo tha an Tighearna Dia ag ràdh, Feuch, tha mise ad aghaidh, O Phàraoh, a rìgh na h‑Eiphit, an uabheist mhòr a tha na laighe ann am meadhon a aibhnichean fhèin, a thubhairt, Is leam fhèin m’abhainn, rinn mi air mo shon fhèin i.

⁴ Ach cuiridh mise dubhain ann ad ghiallan, agus bheir mi air iasg d’aibhnichean leantainn rid lannan, agus bheir mi a‑nìos thu à meadhon d’aibhnichean, agus leanaidh uile iasg d’aibhnichean rid lannan.

⁵ Agus trèigidh mise thu anns an fhàsach, thu fhèin agus uile iasg d’aibhnichean: tuitidh tu air na machraichean sgaoilte; cha bhi thu air do thional, no air do chruinneachadh ri chèile; thug mise thu mar bhiadh do bheathaichean na machrach, agus do eunlaith an adhair.

⁶ Agus aithnichidh uile luchd‐àiteachaidh na h‑Eiphit gur mise an Tighearna, a chionn gu robh iad nan luirg chuilce do thaigh Israeil.

⁷ Nuair a ghlac iad thu, bhris thu nan làimh, agus reub thu an gualann uile: agus nuair a leig iad an taice ort, bhris thu, agus dh’fhàg thu an leasraidh uile gun taic.

⁸ Air an adhbhar sin, mar seo tha an Tighearna Dia ag ràdh, Feuch, bheir mise claidheamh ort, agus gearraidh mi a‑mach asad duine agus ainmhidh.

⁹ Agus bidh tìr na h‑Eiphit falamh agus fàs; agus aithnichidh iad gur mise an Tighearna: a chionn gun dubhairt e, Is leamsa an abhainn, agus is mi a rinn i.

¹⁰ Feuch, uime sin, tha mise ann ad aghaidh, agus an aghaidh d’aibhnichean; agus nì mi tìr na h‑Eiphit gu tur fàs agus falamh, o thùr Shiene, eadhon gu iomall Etiopia.

¹¹ Chan imich cas duine sam bith troimhpe, agus chan imich cas ainmhidh troimhpe, cha mhò a bhios i air a h‑àiteachadh rè dà‑fhichead bliadhna.

¹² Agus nì mi tìr na h‑Eiphit fàs ann am meadhon nan dùthchannan a tha fàs, agus bidh a cathraichean, ann am meadhon nan cathraichean a tha falamh, air an dèanamh nam fàsach rè dà‑fhichead bliadhna: agus sgapaidh mi na h‑Eiphitich am measg nan cinneach, agus sgaoilidh mi iad air feadh nan dùthchannan.

¹³ Gidheadh mar seo tha an Tighearna Dia ag ràdh, An ceann dà‑fhichead bliadhna cruinnichidh mise na h‑Eiphitich o na cinnich a‑chum an robh iad air an sgaoileadh.

¹⁴ Agus bheir mi air a h‑ais bruid nan Eiphiteach, agus bheir mi orra tilleadh gu fearann Phatrois, gu dùthaich an còmhnaidh, agus bidh iad an sin nan rìoghachd shuaraich.

¹⁵ Bidh i suarach seach gach rìoghachd, agus chan àrdaich i i fhèin nas mò am measg nan cinneach: oir lùghdaichidh mise iad, air chor is nach riaghail iad nas mò os cionn nan cinneach.

¹⁶ Agus cha bhi i nas fhaide na dòchas aig taigh Israeil, a bheir an easaontas gu cuimhne, nuair a sheallas iad nan dèidh: ach aithnichidh iad gur mise an Tighearna Dia.

¹⁷ Agus thàrladh anns an t‑seachdamh bliadhna fichead, anns a’ chiad mhìos, air a’ chiad là den mhìos, gun tàinig facal an Tighearna am ionnsaigh, ag ràdh,

¹⁸ A mhic an duine, thug Nebuchadnesar rìgh Bhàbiloin air a shluagh seirbhis mhòr a dhèanamh an aghaidh Thìruis: rinneadh gach ceann maol, agus gach gualann lom; gidheach cha robh tuarasdal air bith aige fhèin, no aig a shluagh, airson Thìruis, airson na seirbhis a rinn e na h‑aghaidh.

¹⁹ Air an adhbhar sin, mar seo tha an Tighearna Dia ag ràdh, Feuch, bheir mise tìr na h‑Eiphit do Nebuchadnesar rìgh Bhàbiloin, agus glacaidh e a sluagh, agus glacaidh e a creach, agus glacaidh e a cobhartach, agus bidh sin na thuarasdal aig a shluagh.

²⁰ Thug mise dha tìr na h‑Eiphit airson a shaothrach leis an do shaothraich e na h‑aghaidh; a chionn gun d’obraich iad air mo shon‐sa, deir an Tighearna Dia.

²¹ Anns an là sin bheir mi air adhairc taigh Israeil briseadh a‑mach, agus bheir mi dhutsa fosgladh a’ bheòil nam meadhon; agus aithnichidh iad gur mise an Tighearna.