Eseciel 11 - Am Bìoball Iomraidh Gàidhlig 1880 1992

1 Thaisbeanadh do Eseciel dànachd mhaithean Iùdah: 4 dìolaidh Dia am peacaidhean air an ceann. 13 Bàs Phelatiah. 17 Cruinnichidh Dia a shluagh fhèin as na dùthchannan anns an robh iad air an sgapadh. 22 Chaidh glòir an Tighearna suas à meadhon a’ bhaile.

¹ Agus thog an spiorad suas mi, agus thug e mi gu geata an ear taigh an Tighearna, a tha ag amharc ris an àird an ear; agus, feuch, aig doras a’ gheata, còig fir ar fhichead: agus chunnaic mi nam measg Iaasaniah mac Asuir, agus Pelatiah mac Bhenaiah, uachdarain an t‑sluaigh.

² An sin thubhairt e rium, A mhic an duine, seo na daoine a tha a’ dealbh uilc, agus a’ toirt droch chomhairle anns a’ bhaile seo;

³ A tha ag ràdh, Chan eil e dlùth; togamaid taighean: is e am baile seo an coire, agus sinne an fheòil.

⁴ Air an adhbhar sin, dèan fàistneachd nan aghaidh, dèan fàistneachd, a mhic an duine.

⁵ Agus thuit orm Spiorad an Tighearna, agus thubhairt e rium, Abair, Mar seo tha an Tighearna ag ràdh, Mar seo thubhairt sibh, O thaigh Israeil: oir is aithne dhòmhsa na nithean a tha a’ teachd nur n‑inntinn, gach uile nì dhiubh.

⁶ Mheudaich sibh ur mairbh anns a’ chathair seo, agus lìon sibh a sràidean leòsan a mharbhadh.

⁷ Air an adhbhar sin mar seo tha an Tighearna Dia ag ràdh, Ur mairbh a chuir sibh na meadhon, is iadsan an fheòil, agus is i a’ chathair seo an coire; ach bheir mise sibh a‑mach as a meadhon.

⁸ Bha eagal oirbh ron chlaidheamh; agus bheir mise claidheamh oirbh, deir an Tighearna Dia.

⁹ Agus bheir mi sibh a‑mach as a meadhon, agus bheir mi thairis sibh do làmhan choimheach, agus nì mi breitheanais nur measg.

¹⁰ Tuitidh sibh leis a’ chlaidheamh: bheir mise breitheanas oirbh ann an iomall Israeil, agus bidh fhios agaibh gur mi an Tighearna.

¹¹ Chan i a’ chathair seo a bhios na coire dhuibh, cha mhò a bhios sibhse na meadhon mar fheòil: ann an iomall Israeil bheir mise breith oirbh.

¹² Agus bidh fhios agaibh gur mise an Tighearna; oir cha do ghluais sibh ann am reachdan, cha mhò a rinn sibh mo bhreitheanais, ach rinn sibh a rèir nòs nan cinneach a tha air gach taobh mun cuairt dhuibh.

¹³ Agus thàrladh an tràth a rinn mise fàistneachd gun d’eug Pelatiah mac Bhenaiah: an sin thuit mi sìos air m’aghaidh, agus ghlaodh mi le guth àrd, agus thubhairt mi, Ah! Thighearna Dhia, an dèan thu làn‐chrìoch air iarmad Israeil?

¹⁴ A‑rìs thàinig facal an Tighearna am ionnsaigh, ag ràdh,

¹⁵ A mhic an duine, is iad do bhràithrean, eadhon do bhràithrean, fir do dhìlseachd, agus uile thaigh Israeil gu h‑iomlan, ris an dubhairt luchd‐àiteachaidh Ierusaleim, Imichibh am fad on Tighearna: dhuinne thugadh am fearann seo mar sheilbh.

¹⁶ Air an adhbhar sin abair, Mar seo tha an Tighearna Dia ag ràdh, Ged a thilg mi fada uam iad am measg nan cinneach, agus ged a sgap mi iad am measg nan dùthchannan, gidheadh bidh mi dhaibh ann am naomh‐ionad beag anns na dùthchannan gus an tig iad.

¹⁷ Uime sin abair, Mar seo tha an Tighearna Dia ag ràdh, Nì mi eadhon ur tional o na cinnich, agus ur cruinneachadh as na dùthchannan anns an robh sibh air ur sgapadh, agus bheir mi dhuibh fearann Israeil.

¹⁸ Agus thig iad da ionnsaigh, agus bheir iad uile nithean fuathach agus uile ghràinealachdan air falbh as.

¹⁹ Agus bheir mi dhaibh aon chridhe, agus cuiridh mi spiorad nuadh an taobh a‑staigh dhiubh; agus bheir mi an cridhe cloiche as am feòil, agus bheir mi dhaibh cridhe feòla;

²⁰ A‑chum gun gluais iad ann am reachdan, agus gun coimhead iad m’òrdaighean, agus gun dèan iad iad: agus bidh iad nam poball dhòmhsa, agus bidh mise am Dhia dhaibhsan.

²¹ Ach don taobh‐san a thionndaidheas an cridhe a rèir cridhe an nithean fuathach, agus an gràinealachdan, dìolaidh mise an slighe air an ceann fhèin, deir an Tighearna Dia.

²² An sin thog na ceruban suas an sgiathan, agus na rothan làimh riu; agus bha glòir Dia Israeil tharta os an cionn.

²³ Agus chaidh glòir an Tighearna suas o mheadhon a’ bhaile, agus sheas i air an t‑sliabh a tha air an taobh an ear den bhaile.

²⁴ Na dhèidh sin ghlac an spiorad suas mi, agus thug e mi ann an taisbeanadh le Spiorad Dhè gu Caldèa, a‑chum nam braighdean. Mar sin chaidh an sealladh a chunnaic mi suas uam.

²⁵ An sin labhair mi riùsan a bha anns an daorsa na h‑uile nithean a thaisbein an Tighearna dhomh.