Ephèsianach 6 - Am Bìoball Iomraidh Gàidhlig 1880 1992

1 Dleasdanas cloinne dam pàrantan, 5 agus sheirbhiseach dam maighstirean. 10 Is cogadh ar beatha, 12 chan ann a‑mhàin an aghaidh fala agus feòla, ach mar an ceudna an aghaidh naimhdean spioradail. 13 Airm a’ Chrìosdaidh, 18 agus cionnas is còir an gnàthachadh.

¹ A chlann, bithibh umhail dur pàrantan anns an Tighearna: oir tha seo ceart.

² Thoir urram dod athair agus dod mhàthair (is i seo a’ chiad àithne le gealladh),

³ A‑chum gun èirich gu math dhut, agus gum bi thu fad‐shaoghalach air an talamh.

⁴ Agus athraichean, na brosnaichibh ur clann a‑chum feirge: ach togaibh iad ann an oilean agus ann an teagasg an Tighearna.

⁵ A sheirbhiseacha, bithibh umhail dur maighistirean a rèir na feòla, le eagal agus crith, ann an treibhdhireas ur cridhe, mar do Chrìosd:

⁶ Chan ann le sùil‐sheirbhis, mar dhream a nì toil dhaoine, ach mar sheirbhisich Chrìosd, a’ dèanamh toil Dhè on chridhe;

⁷ Le deagh thoil a’ dèanamh seirbhis, mar don Tighearna, agus chan ann do dhaoine.

⁸ Air dhuibh fios a bhith agaibh, ge bè math air bith a nì aon neach, gum faigh e an nì seo fhèin on Tighearna mas saor no daor e.

⁹ Agus a mhaighistirean, dèanaibh‐se na nithean ceudna dhaibhsan, a’ leigeadh dhibh bagraidh: air dhuibh fios a bhith agaibh gu bheil ur maighistir fhèin air nèamh mar an ceudna, agus nach eil gnùis‐bhreith maille ris.

¹⁰ Fa‑dheòidh, mo bhràithrean, bithibh làidir anns an Tighearna, agus ann an neart a chumhachd‐san.

¹¹ Cuiribh umaibh uile armachd Dhè, a‑chum gum bi sibh comasach air seasamh an aghaidh cuilbheirtean an diabhail.

¹² Oir chan eil sinn a’ gleac ri fuil agus feòil, ach ri uachdaranachdan, ri cumhachdan, ri riaghlairean dorchadas an t‑saoghail seo, ri aingidheachd spioradail ann an ionadan àrda.

¹³ Uime sin glacaibh dur n‑ionnsaigh uile armachd Dhè, a‑chum gum bi sibh comasach air seasamh an aghaidh a’ bhuairidh anns an droch là, agus air dhuibh na h‑uile nithean a dhèanamh a‑chum seasamh.

¹⁴ Seasaibh uime sin, air a bhith dur leasraidh air an crioslachadh le fìrinn, agus uchd‐èideadh na fìreantachd umaibh;

¹⁵ Agus ullachadh soisgeul na sìthe mar bhrògan agaibh air ur casan,

¹⁶ Thar gach uile nì, a’ glacadh dur n‑ionnsaigh sgiath a’ chreidimh, leis am bi sibh comasach air uile shaighdean teinnteach an droch Spioraid a mhùchadh.

¹⁷ Agus glacaibh clogad na slàinte, agus claidheamh an Spioraid, nì as e facal Dhè:

¹⁸ A’ dèanamh ùrnaigh a‑ghnàth leis gach uile ghnè ùrnaigh agus aslachaidh anns an Spiorad, agus a’ dèanamh faire a‑chum an nì seo fhèin maille ris gach uile bhuanachadh, agus ghuidhe airson nan naomh uile;

¹⁹ Agus air mo shon‐sa, a‑chum gun toirear dhomh comas labhairt le fosgladh mo bheòil ann an dànachd, a‑chum gum foillsich mi rùn‐diamhair an t‑soisgeil;

²⁰ Airson a bheil mi am theachdaire ann an gèimhlean: a‑chum gun labhair mi gu dàna uime, mar as còir dhomh labhairt.

²¹ Ach a‑chum gum bi fhios agaibhse mar an ceudna air na nithean a bhuineas dhòmhsa, agus ciod a tha mi a’ dèanamh, foillsichidh Tichicus, bràthair gràdhach agus ministear fìrinneach anns an Tighearna, na h‑uile nithean dhuibh:

²² Neach a chuir mi dur n‑ionnsaigh airson an adhbhair seo fhèin, a‑chum gum biodh fios nan nithean a bhuineas dhuinne agaibh, agus gun tugadh e comhfhurtachd dur cridhe.

²³ Sìth gu robh do na bràithrean, agus gràdh maille ri creideamh, o Dhia an t‑Athair, agus an Tighearna Iosa Crìosd.

²⁴ Gu robh gràs maille riùsan uile a tha a’ gràdhachadh ar Tighearna Iosa Crìosd ann an treibhdhireas. Amen.