Ecsodus 40 - Am Bìoball Iomraidh Gàidhlig 1880 1992

1 Thugadh àithne do Mhaois gun cuireadh e suas pàillean bùtha a’ choitheanail, agus gun naomhaicheadh e e. 16 Rinn Maois gach nì a dh’àithn an Tighearna dha. 34 Chòmhdaich neul bùth a’ choitheanail.

¹ Agus labhair an Tighearna ri Maois, ag ràdh,

² Air a’ chiad là den chiad mhìos cuiridh tu suas pàillean bùth a’ choitheanail.

³ Agus cuiridh tu ann àirc na Fianais, agus falaichidh tu an àirc leis an roinn‐bhrat.

⁴ Agus bheir thu a‑steach am bòrd, agus cuiridh tu an òrdagh na nithean a tha gu bhith air an cur an òrdagh air; agus bheir thu a‑steach an coinnleir, agus lasaidh tu a lòchrain.

⁵ Agus suidhichidh tu an altair òir a tha a‑chum na tùise fa chomhair àirc na Fianais, agus cuiridh tu brat an dorais ris a’ phàillean.

⁶ Agus suidhichidh tu altair na h‑ìobairt‐loisgte fa chomhair doras pàillean bùth a’ choitheanail.

⁷ Agus suidhichidh tu an soitheach‐ionnlaid eadar bùth a’ choitheanail agus an altair, agus cuiridh tu uisge ann.

⁸ Agus cuiridh tu suas a’ chùirt mun cuairt, agus crochaidh tu suas am brat aig geata na cùirte.

⁹ Agus gabhaidh tu an ola‑ungaidh, agus ungaidh tu am pàillean, agus gach nì a tha ann, agus naomhaichidh tu e, agus a shoithichean uile: agus bidh e naomh.

¹⁰ Agus ungaidh tu altair na h‑ìobairt‐loisgte, agus a soithichean uile: agus bidh an altair ro‑naomh.

¹¹ Agus ungaidh tu an soitheach‐ionnlaid agus a chas, agus naomhaichidh tu e.

¹² Agus bheir thu Aaron agus a mhic gu doras bùth a’ choitheanail, agus ionnlaididh tu iad le uisge.

¹³ Agus cuiridh tu air Aaron an t‑aodach naomh, agus ungaidh tu e, agus naomhaichidh tu e; agus frithealaidh e dhòmhsa ann an dreuchd an t‑sagairt.

¹⁴ Agus bheir thu leat a mhic, agus cuiridh tu còtaichean orra,

¹⁵ Agus ungaidh tu iad, mar a dh’ung thu an athair, agus frithealaidh iad dhòmhsa ann an dreuchd an t‑sagairt; oir bidh gu deimhinn an ungadh‐san dhaibh a‑chum sagartachd shìorraidh air feadh an ginealaichean.

¹⁶ Agus rinn Maois a rèir gach nì a dh’àithn an Tighearna dha: mar sin rinn e.

¹⁷ Agus b’ann anns a’ chiad mhìos, anns an dara bliadhna, air a’ chiad là den mhìos, a chuireadh suas am pàillean.

¹⁸ Agus chuir Maois suas am pàillean agus dhaingnich e a bhuinn, agus chuir e suas a bhùird, agus chuir e a‑steach a chroinn, agus thog e suas a phuist.

¹⁹ Agus sgaoil e a‑mach am bùth os cionn a phàillein, agus chuir e còmhdach a’ bhùtha air os a chionn; mar a’ dh’àithn an Tighearna do Mhaois.

²⁰ Agus ghabh e agus chuir e an Fhianais anns an àirc, agus chuir e na bataichean air an àirc, agus chuir e a’ chathair‐thròcair air an àirc os a cionn.

²¹ Agus thug e an àirc a‑steach don phàillean, agus chuir e suas brat a’ chòmhdaich, agus chòmhdaich e àirc na Fianais, mar a dh’àithn an Tighearna do Mhaois.

²² Agus chuir e am bòrd ann am bùth a’ choitheanail air taobh a’ phàillein mu thuath, an taobh a‑muigh den roinn‐bhrat.

²³ Agus chuir e an t‑aran ann an òrdagh air, ann an làthair an Tighearna, mar a dh’àithn an Tighearna do Mhaois.

²⁴ Agus chuir e an coinnleir ann am bùth a’ choitheanail, thall fa chomhair a’ bhùird, air taobh a’ phàillein ris an àird a deas.

²⁵ Agus las e na lòchrain ann an làthair an Tighearna, mar a dh’àithn an Tighearna do Mhaois.

²⁶ Agus chuir e an altair òir ann am bùth a’ choitheanail, air beulaibh an roinn‐bhrait,

²⁷ Agus loisg e tùis chùbhraidh oirre, mar a dh’àithn an Tighearna do Mhaois.

²⁸ Agus chuir e suas am brat aig doras a’ phàillein.

²⁹ Agus chuir e altair na h‑ìobairt‐loisgte làimh ri doras pàillean bùth a’ choitheanail, agus thug e suas oirre an ìobairt‐loisgte, agus an tabhartas‐bìdh, mar a dh’àithn an Tighearna do Mhaois.

³⁰ Agus chuir e an soitheach‐ionnlaid eadar bùth a’ choitheanail agus an altair, agus chuir e uisge ann, a dh’ionnlad leis.

³¹ Agus dh’ionnlaid Maois, agus Aaron, agus a mhic, an làmhan agus an casan aige.

³² Nuair a bha iad gu dol a‑steach do bhùth a’ choitheanail, agus gu teachd am fagas don altair, dh’ionnlaid iad iad fhèin, mar a dh’àithn an Tighearna do Mhaois.

³³ Agus chuir e suas a’ chùirt timcheall a’ phàillein agus na h‑altarach, agus chuir e suas brat geata na cùirte: mar sin chrìochnaich Maois an obair.

³⁴ An sin chòmhdaich neul bùth a’ choitheanail, agus lìon glòir an Tighearna am pàillean.

³⁵ Agus cha b’urrainn Maois dol a‑steach do bhùth a’ choitheanail, a chionn gun do ghabh an neul còmhnaidh air, agus gun do lìon glòir an Tighearna am pàillean.

³⁶ Agus nuair a dh’èirich an neul suas o mhullach a’ phàillein, chaidh clann Israeil air an aghaidh nan uile thurasan:

³⁷ Ach mura d’èirich an neul suas, an sin cha do thriall iad gus an là anns an d’èirich e suas.

³⁸ Oir bha neul an Tighearna air a’ phàillean anns an là, agus bha teine air anns an oidhche, ann an sealladh taigh Israeil uile, air feadh an uile thurasan.