Ecsodus 31 - Am Bìoball Iomraidh Gàidhlig 1880 1992

1 Besaleel agus Aholiab air an gairm a dh’ionnsaidh obrach a’ phàillean. 12 An t‑sàbaid gu bhith air a coimhead naomh. 18 Dà chlàr na Fianais air an tabhairt do Mhaois.

¹ Agus labhair an Tighearna ri Maois, ag ràdh,

² Feuch, ghairm mi air a ainm Besalil mac Uri, mhic Hur, de threubh Iùdah;

³ Agus lìon mi e le spiorad Dhè, ann an gliocas, agus ann an tuigse, agus ann an eòlas, agus anns gach uile ghnè obrach,

⁴ A dhealbhadh obrach ealanta, a dh’obrachadh ann an òr, agus ann an airgead, agus ann an umha,

⁵ Agus ann an gearradh chlach a‑chum an ceangal, agus ann an gearradh fiodha, a dh’obrachadh anns gach uile ghnè obrach.

⁶ Agus mise, feuch, thug mi seachad maille ris Aholiab mac Ahisamaich, de threubh Dhain; agus ann an cridhe gach neach a tha glic‐chridheach chuir mi gliocas, agus nì iad gach nì a dh’àithn mi dhut;

⁷ Pàillean a’ choitheanail, agus àirc na Fianais, agus a’ chathair‐thròcair a tha oirre, agus uile uidheam a’ phàillein,

⁸ Agus am bòrd agus a uidheam, agus an coinnleir fìorghlan le a uidheam uile, agus altair na tùise,

⁹ Agus altair na h‑ìobairt‐loisgte le a h‑uidheam uile, agus an soitheach‐ionnlaid agus a chas,

¹⁰ Agus èideadh na seirbhis, agus èideadh naomh airson Aaroin an sagart, agus èideadh a chuid mac, gu frithealadh ann an dreuchd an t‑sagairt,

¹¹ Agus an ola‑ungaidh, agus tùis chùbhraidh airson an ionaid naoimh; a rèir nan uile nithean a dh’àithn mi dhut, nì iad.

¹² Agus labhair an Tighearna ri Maois, ag ràdh,

¹³ Labhair thusa mar an ceudna ri cloinn Israeil, ag ràdh, Gu deimhinn coimheadaidh sibh mo shàbaidean: oir is comharradh sin eadar mise agus sibhse, air feadh ur ginealaichean; a‑chum is gum bi fhios agaibh gur mise an Tighearna a naomhaicheas sibh.

¹⁴ Coimheadaidh sibh uime sin an t‑sàbaid; oir tha i naomh dhuibh. Esan a thruailleas i, cuirear gu cinnteach gu bàs e; oir gach neach a nì obair oirre, gearrar an t‑anam sin as o mheasg a shluaigh.

¹⁵ Sia làithean faodar obair a dhèanamh, ach anns an t‑seachdamh tha sàbaid fhois, naomh don Tighearna: gach neach a nì obair air là na sàbaid, cuirear gu cinnteach gu bàs e.

¹⁶ Uime sin coimheadaidh clann Israeil an t‑sàbaid, a ghleidheadh na sàbaid air feadh an ginealaichean, mar choicheangal sìorraidh.

¹⁷ Eadar mise agus clann Israeil is comharradh i a‑chaoidh; oir ann an sia làithean rinn an Tighearna na nèamhan agus an talamh, agus air an t‑seachdamh là sguir e, agus ghabh e fois.

¹⁸ Agus thug e do Mhaois, nuair a sguir e de labhairt ris air sliabh Shinài, dà chlàr na Fianais, clàir chloiche, sgrìobhte le meur Dhè.