Ecsodus 27 - Am Bìoball Iomraidh Gàidhlig 1880 1992

1 Altair na h‑ìobairt‐loisgte, agus a soithichean. 9 Cùirt a’ phàillean. 20 Oladh fhìor‐ghlan a’ chroinn‐olaidh air a toirt airson solais.

¹ Agus nì thu altair de fhiodh sitim; còig làmhan‐coille air fad, agus còig làmhan‐coille air leud; bidh an altair ceithir‐cheàrnach, agus a h‑àirde trì làmhan‐coille.

² Agus nì thu a h‑adhaircean air a ceithir oisnean: bidh a h‑adhaircean den nì cheudna; agus còmhdaichidh tu thairis i le umha.

³ Agus nì thu a h‑aighnean a ghabhail a luatha, agus a sluasaidean, agus a cuachan, agus a greimichean, agus a h‑aighnean‐teine: a soithichean uile nì thu de umha.

⁴ Agus nì thu dhi cliath de lìon‐obair umha: agus nì thu air an lìon ceithir failbheagan umha air a cheithir oisnean.

⁵ Agus cuiridh tu e fo chuairt na h‑altarach gu h‑ìosal, agus bidh an lìon gu ruig meadhon na h‑altarach.

⁶ Agus nì thu bataichean don altair, bataichean de fhiodh sitim, agus còmhdaichidh tu thairis iad le umha.

⁷ Agus cuirear na bataichean anns na failbheagan, agus bidh na bataichean air dà thaobh na h‑altarach ga giùlan.

⁸ Fàs le bùird nì thu i; mar a nochdadh dhut anns an t‑sliabh, mar sin nìthear i.

⁹ Agus nì thu cùirt a’ phàillein air an taobh deas, ri deas: bidh cùirteanan airson na cùirte de anart grinn toinnte; ceud làmh‐choille am fad, air aon taobh.

¹⁰ Agus bidh a fichead post, agus am fichead bonn, de umha: bidh cromagan nam post, agus an cuairteagan, de airgead.

¹¹ Agus mar an ceudna air an taobh tuath air fad, bidh cùirteanan ceud làmh‐choille air fad, agus a fichead post, agus am fichead bonn de umha; cromagan nam post, agus an cuairteagan, de airgead.

¹² Agus air leud na cùirte air an taobh an iar, bidh cùirteanan de leth‐cheud làmh‐choille: am puist deich, agus am buinn deich.

¹³ Agus bidh leud na cùirte air an taobh an ear, ris an àird an ear, leth‐cheud làmh‐choille.

¹⁴ Agus bidh na cùirteanan air aon taobh còig làmhan‐coille deug: am puist trì, agus am buinn trì.

¹⁵ Agus air an taobh eile bidh a cùirteanan còig làmhan‐coille deug: am puist trì, agus am buinn trì.

¹⁶ Agus airson geata na cùirte bidh brat de fhichead làmh‐choille, de ghorm, agus de chorcar, agus de sgàrlaid, agus de anart grinn toinnte, obraichte le obair shnàthaide: am puist ceithir, agus am buinn ceithir.

¹⁷ Bidh na puist uile timcheall na cùirte air an ceangal mun cuairt le airgead: bidh an cromagan de airgead, agus am buinn de umha.

¹⁸ Fad na cùirte ceud làmh‐choille, agus a leud leth‐cheud làmh‐choille anns gach àite, agus a h‑àirde còig làmhan‐coille, de anart grinn toinnte; agus am buinn de umha.

¹⁹ Bidh uile shoithichean a’ phàillein, na sheirbhis uile, agus a phinneachan uile, agus pinneachan na cùirte uile, de umha.

²⁰ Agus àithnidh tu do chloinn Israeil, gun toir iad ad ionnsaigh ola fhìorghlan a’ chroinn‐ola, brùite airson an t‑solais, a thoirt air an lòchran lasadh an còmhnaidh.

²¹ Ann am bùth a’ choitheanail an taobh a‑muigh den bhrat, a tha fa chomhair na Fianais, òrdaichidh Aaron e, agus a mhic, o fheasgar gu madainn an làthair an Tighearna: bidh e na reachd sìorraidh dan ginealaichean, as leth chloinn Israeil.