Ecsodus 12 - Am Bìoball Iomraidh Gàidhlig 1880 1992

3 A’ chàisg air a h‑àithneadh. 29 Gach ciad‐ghin ann an tìr na h‑Èiphit air a mharbhadh. 31 Na h‑Israelich air am fògradh as an tìr. 43 Òrdagh na càisge.

¹ Agus labhair an Tighearna ri Maois agus ri Aaron ann an tìr na h‑Èiphit, ag ràdh.

² Bidh am mìos seo dhuibh na thoiseach nam mìos: bidh e dhuibh na chiad mhìos na bliadhna.

³ Labhraibh‐se ri coitheanal Israeil uile, ag ràdh, Air an deicheamh là den mhìos seo gabhaidh iad dhaibh fhèin gach duine uan, a rèir taigh an athraichean, uan airson taighe.

⁴ Agus ma bhios an teaghlach ro bheag airson uain, an sin gabhaidh esan agus a choimhearsnach as fhaisge da thaigh e, a rèir àireamh nan anaman; gach duine, a rèir a itheannaich, àirmhear leibh airson an uain.

⁵ Bidh ur n‑uan gun ghaoid, fireann, bliadhna a dh’aois; as na caoraich no as na gobhair gabhaidh sibh e.

⁶ Agus gleidhidh sibh a‑staigh e, gu ruig an ceathramh‐là‑deug den mhìos seo; agus marbhaidh co‑chruinneachadh iomlan chloinn Israeil e anns an fheasgar.

⁷ Agus gabhaidh iad den fhuil, agus cuiridh iad i air an dà ursainn, agus air àrd‐doras nan taighean, anns an ith iad e.

⁸ Agus ithidh iad an fheòil anns an oidhche sin fhèin ròiste le teine, agus aran neo‐ghortaichte; maille ri luibhean searbha ithidh iad e.

⁹ Na ithibh a’ bheag dheth amh, no idir air a bhruitheadh ann an uisge, ach ròiste le teine: a cheann maille ra chasan, agus maille ra ghrealaich.

¹⁰ Agus chan fhàg sibh a’ bheag dheth gu madainn: agus na dh’fhàgar dheth gu madainn, loisgidh sibh le teine.

¹¹ Agus mar seo ithidh sibh e; le ur leasraidh crioslaichte, ur brògan air ur casan, agus ur lorg nur làimh: agus ithidh sibh e le cabhaig; is i càisg an Tighearna a tha ann.

¹² Oir thèid mise tro thìr na h‑Èiphit air an oidhche seo, agus buailidh mi gach ciad‐ghin ann an tìr na h‑Èiphit, araon duine agus ainmhidh: agus an aghaidh diathan nan Èiphiteach uile cuiridh mi breitheanas an gnìomh; is mise an Tighearna.

¹³ Agus bidh an fhuil dhuibh mar chomharradh air na taighean anns a bheil sibh; agus nuair a chì mise an fhuil, thèid mi thairis oirbh, agus cha bhi a’ phlàigh oirbh a‑chum ur milleadh nuair a bhuaileas mi tìr na h‑Èiphit.

¹⁴ Agus bidh an là seo dhuibh mar chuimhneachan; agus gleidhidh sibh e na là‑fèille don Tighearna air feadh ur ginealaichean; le òrdagh sìorraidh gleidhidh sibh e.

¹⁵ Seachd làithean ithidh sibh aran neo‐ghortaichte; air a’ chiad là fhèin cuiridh sibh taois ghoirt a‑mach as ur taighean; oir gach neach a dh’itheas aran gortaichte, on chiad là gus an seachdamh là, gearrar an t‑anam sin as o Israel.

¹⁶ Agus air a’ chiad là bidh agaibh co‑ghairm naomh, agus air an t‑seachdamh là bidh agaibh co‑ghairm naomh: obair sam bith cha dèanar orra, saor o na dh’ithear leis gach neach; sin a‑mhàin nìthear leibh.

¹⁷ Agus cumaidh sibh fèill an arain neo‐ghortaichte; oir air an là sin fhèin thug mise a‑mach ur slòigh à tìr na h‑Èiphit; uime sin coimheadaidh sibh an là seo nur ginealaichean, le òrdagh sìorraidh.

¹⁸ Anns a’ chiad mhìos, air a’ cheathramh‐là‑deug den mhìos anns an fheasgar, ithidh sibh aran neo‐ghortaichte, gu ruig an ciad là ar fhichead den mhìos anns an fheasgar.

¹⁹ Rè seachd làithean chan fhaighear taois ghoirt nur taighean: oir ge bè neach a dh’itheas aran gortaichte, gearrar an t‑anam sin fhèin as o choitheanal Israeil, co‑dhiù as coigreach e, no neach a rugadh anns an tìr.

²⁰ Nì air bith gortaichte chan ith sibh: nur n‑àitean‐còmhnaidh uile ithidh sibh aran neo‐ghortaichte.

²¹ An sin ghairm Maois air seanairean Israeil uile, agus thubhairt e riu, Tàirngibh a‑mach, agus gabhaibh dhuibh fhèin uan, a rèir ur teaghlaichean, agus marbhaibh a’ chàisg.

²² Agus gabhaidh sibh bad hiosoip, agus tumaidh sibh e anns an fhuil a tha anns an t‑soitheach, agus beanaidh sibh don àrd‐doras, agus don dà ursainn, leis an fhuil a tha anns an t‑soitheach: agus cha tèid a h‑aon agaibh a‑mach air doras a thaighe gu ruig a’ mhadainn.

²³ Agus thèid an Tighearna thairis a bhualadh nan Èiphiteach; agus nuair a chì e an fhuil air an àrd‐doras, agus air an dà ursainn, thèid an Tighearna thairis air an doras, agus cha leig e leis a’ mhilltear teachd a‑steach dur taighean gu ur bualadh.

²⁴ Agus gleidhidh sibh an nì seo mar òrdagh dhuibh fhèin agus dur mic gu sìorraidh.

²⁵ Agus tàrlaidh, nuair a thèid sibh a‑steach don fhearann a bheir an Tighearna dhuibh, a rèir mar a gheall e, gun glèidh sibh an t‑seirbhis seo.

²⁶ Agus tàrlaidh, nuair a their ur clann ribh, Ciod as ciall dhuibh leis an t‑seirbhis seo?

²⁷ Gun abair sibh, Seo ìobairt càisg an Tighearna, a chaidh thairis air taighean chloinn Israeil anns an Èiphit, nuair a bhuail e na h‑Èiphitich, agus a shaor e ar taighean‐ne. Agus chrom an sluagh iad fhèin, agus rinn iad adhradh.

²⁸ Agus dh’fhalbh clann Israeil, agus rinn iad mar seo; mar a dh’àithn an Tighearna do Mhaois agus do Aaron, mar sin rinn iad.

²⁹ Agus air meadhon na h‑oidhche sin fhèin bhuail an Tighearna gach ciad‐ghin ann an tìr na h‑Èiphit, o chiad‐ghin Phàraoh a shuidh air a rìgh‐chathair, gu ciad‐ghin a’ chiomaich a bha ann an sloc a’ phrìosain; agus gach ciad‐ghin ainmhidh.

³⁰ Agus dh’èirich Phàraoh anns an oidhche, e fhèin agus a sheirbhisich uile, agus na h‑Èiphitich uile; agus bha èigheach mhòr anns an Èiphit: oir cha robh taigh anns nach robh neach marbh.

³¹ Agus ghairm e air Maois agus air Aaron anns an oidhche, agus thubhairt e, Eiribh, rachaibh a‑mach à meadhon mo shluaigh, araon sibhse agus clann Israeil: agus rachaibh, dèanaibh seirbhis don Tighearna, mar a thubhairt sibh.

³² Thugaibh leibh mar an ceudna ur treudan, agus ur buar, mar a thubhairt sibh, agus imichibh: agus beannaichibh mise mar an ceudna.

³³ Agus thug na h‑Èiphitich dian‐sparradh don t‑sluagh, a‑chum gun cuireadh iad le cabhaig a‑mach as an tìr iad; oir thubhairt iad, Is daoine marbha sinn gu lèir.

³⁴ Agus ghabh an sluagh an taois mun do ghortaicheadh i, an amaran‐fuinidh ceangailte nan aodach air an guaillean.

³⁵ Agus rinn clann Israeil a rèir facal Mhaois: agus dh’iarr iad o na h‑Èiphitich seudan airgid, agus seudan òir, agus aodach.

³⁶ Agus thug an Tighearna deagh‐ghean don t‑sluagh ann an sùilean nan Èiphiteach, agus thug iad an coingheall dhaibh: agus chreach iad na h‑Èiphitich.

³⁷ Agus dh’imich clann Israeil o Rameses gu Sucot, mu thimcheall sia ceud mìle fear dan cois, a thuilleadh air cloinn.

³⁸ Agus mar an ceudna chaidh iomadaidh de shluagh eile suas maille riu, agus treudan, agus buar, ro‑mhòran sprèidhe.

³⁹ Agus dh’fhuin iad den taois a thugadh a‑mach as an Èiphit breacagan neo‐ghortaichte, oir cha do ghortaicheadh i; do bhrìgh gun d’fhuadaicheadh iad a‑mach as an Èiphit, agus nach b’urrainn iad fuireach, agus mar an ceudna nach do dheasaich iad biadh dhaibh fhèin.

⁴⁰ A‑nis b’i aimsir cuairt chloinn Israeil, a bha iad a chòmhnaidh anns an Èiphit, ceithir cheud agus deich‐bliadhna‑fichead.

⁴¹ Agus aig ceann nan ceithir cheud agus nan deich‐bliadhna‑fichead, air an là sin fhèin chaidh slòigh an Tighearna uile a‑mach à tìr na h‑Èiphit.

⁴² Is oidhche seo gu bhith air a coimhead gu h‑àraidh don Tighearna, airson an toirt‐san a‑mach à tìr na h‑Èiphit: seo an oidhche sin gu bhith air a coimhead don Tighearna le cloinn Israeil uile nan ginealaichean.

⁴³ Agus thubhairt an Tighearna ri Maois agus ri Aaron, Seo òrdagh na càisge: Chan ith coigreach sam bith dhith.

⁴⁴ Agus gach seirbhiseach duine, a cheannaicheadh le airgead, nuair a thimcheall‐ghearras tu e, an sin ithidh e dhith.

⁴⁵ Chan ith coigreach no seirbhiseach tuarasdail dhith.

⁴⁶ Ann an aon taigh ithear i: cha ghiùlain thu a’ bheag den fheòil a‑mach as an taigh; cha mhò a bhriseas sibh cnàimh dhith.

⁴⁷ Nì coitheanal Israeil uile sin.

⁴⁸ Agus nuair a bhios coigreach air chuairt maille riut, agus a chumas e a’ chàisg don Tighearna, timcheall‐ghearrar gach fireannach aige, agus an sin thigeadh e am fagas ga cumail, agus bidh e mar neach a rugadh anns an tìr: ach chan ith neach sam bith neo‐thimcheall‐gheàrrte dhith.

⁴⁹ Bidh an t‑aon lagh aigesan a rugadh anns an tìr, agus aig a’ choigreach a tha air chuairt nur measg.

⁵⁰ Mar seo rinn clann Israeil uile; mar a dh’àithn an Tighearna do Mhaois agus do Aaron, mar sin rinn iad.

⁵¹ Agus, air an là sin fhèin, thug an Tighearna a‑mach clann Israeil à tìr na h‑Èiphit, a rèir an slògh.