Eabhraidhich 3 - Am Bìoball Iomraidh Gàidhlig 1880 1992

1 Is mò Crìosd na Maois: 7 uime sin mur creid sinn annsan, bithidh sinn nas toillteanaiche air dìoghaltas na Israel chruaidh‐chridheach.

¹ Uime sin, a bhràithrean naomha, a tha nur luchd‐compàirt den ghairm nèamhaidh, thugaibh fa‑near Iosa Crìosd, Abstol agus Àrd‐shagart ar n‑aidmheil;

² A bha dìleas dhàsan a dh’òrdaich e, amhail a bha Maois mar an ceudna na thaigh‐san uile.

³ Oir mheasadh gum b’airidh an Tì seo air glòir a bu mhò na Maois, a mheud is gu bheil tuilleadh urraim aig an neach a thog an taigh, na aig an taigh fhèin.

⁴ Oir tha gach uile thaigh air a thogail le aon‐eigin; ach an tì a thog na h‑uile nithean, is e Dia.

⁵ Agus gu deimhinn bha Maois dìleas na thaigh‐san uile mar sheirbhiseach, a‑chum fianais air na nithean sin a bha gu bhith air an labhairt an dèidh sin;

⁶ Ach Crìosd mar Mhac os cionn a thaighe fhèin: agus is sinne a thaigh‐san, ma chumas sinn dànachd, agus gàirdeachas an dòchais, gu daingeann gus a’ chrìoch.

⁷ Uime sin, mar a tha an Spiorad Naomh ag ràdh, An‑diugh, ma chluinneas sibh a ghuth,

⁸ Na cruadhaichibh ur cridhe, mar anns a’ bhrosnachadh, ann an là a’ bhuairidh anns an fhàsach:

⁹ Far an do bhuair ur n‑athraichean mi, agus dhearbh iad mi, agus a chunnaic iad m’obraichean rè dà‑fhichead bliadhna.

¹⁰ Uime sin bha diomb orm ris a’ ghinealach sin, agus thubhairt mi, Tha iad a‑ghnàth air seachran nan cridhe; agus cha do ghabh iad eòlas air mo shlighean‐sa.

¹¹ Ionnas gun tug mi mo mhionnan am fheirg, nach tèid iad a‑steach dom shuaimhneas.

¹² Thugaibh an aire, a bhràithrean, air eagal gum bi ann an aon neach agaibh droch cridhe mì‑chreidimh, ann an trèigsinn an Dè bheò.

¹³ Ach earalaichibh a chèile gach là, am feadh a ghoirear An Là‑an‑diugh dheth; air eagal gun cruadhaichear neach air bith agaibh tre mhealltaireachd a’ pheacaidh.

¹⁴ Oir rinneadh sinn nar luchd‐compàirt de Chrìosd, ma chumas sinn toiseach ar muinghinn gu daingeann gus a’ chrìoch;

¹⁵ Am feadh a theirear, An‑diugh, ma chluinneas sibh a ghuth, na cruadhaichibh ur cridhe, mar anns a’ bhrosnachadh.

¹⁶ Oir air do dhream àraidh cluinntinn, bhrosnaich iad: ach cha b’iadsan uile a thàinig a‑mach as an Èiphit le Maois.

¹⁷ Ach cò ris a bha diomb air rè dà‑fhichead bliadhna? Nach ann riùsan a pheacaich, muinntir don do thuit an colainnean anns an fhàsach?

¹⁸ Agus cò iad don tug e a mhionnan nach rachadh iad a‑steach da shuaimhneas, ach dhaibhsan nach do chreid?

¹⁹ Mar seo chì sinn nach b’urrainn iad dol a‑steach airson mì‑chreidimh.