Eabhraidhich 1 - Am Bìoball Iomraidh Gàidhlig 1880 1992

1 Tha Crìosd a thàinig on Athair anns na h‑àmannan deireannach seo, 4 nas mò na na h‑aingil, araon a‑thaobh a phearsa agus a dhreuchd.

¹ Dia, a labhair o shean gu minig, agus air iomadh dòigh ris na h‑athraichean leis na fàidhean,

² Labhair e anns na làithean deireannach seo rinne le a Mhac, a dh’òrdaich e na oighre air na h‑uile nithean, tre an do chruthaich e fòs na saoghail;

³ Neach air a bhith dha na dhealradh a ghlòire‐san, agus na fhìor ìomhaigh a phearsa, agus a’ cumail suas nan uile nithean le facal a chumhachd, nuair a ghlan e ar peacaidhean troimhe fhèin, shuidh e air deas‐làimh na mòrachd anns na h‑àrdan:

⁴ Air dha a bhith air a dhèanamh nas ro‑òirdheirce na na h‑aingil, a mheud is gun d’fhuair e mar oighreachd ainm a bu ro‑fheàrr na iadsan.

⁵ Oir cò de na h‑aingil ris an dubhairt e uair air bith, Is tu mo Mhac‐sa, an‑diugh ghin mi thu? Agus a‑rìs, Bidh mise am Athair dhàsan, agus bidh esan na Mhac dhòmhsa?

⁶ Agus a‑rìs, nuair a tha e a’ tabhairt a’ chiad‐ghin a‑steach don t‑saoghal, tha e ag ràdh, Agus dèanadh uile aingil Dhè adhradh dha.

⁷ Agus a‑thaobh nan aingeal tha e ag ràdh, Neach a tha a’ dèanamh ainglean nan spioradan, agus a mhinistearan nan lasair theine.

⁸ Ach ris a’ Mhac tha e ag ràdh, Tha do rìgh‐chathair, a Dhè, gu saoghal nan saoghal; is slat‐rìoghail ro‑chothromach slat do rìoghachd‐sa:

⁹ Ghràdhaich thu fìreantachd, agus thug thu fuath do aingidheachd; uime sin dh’ung Dia, do Dhia‐sa, thu le ola aoibhneis os cionn do chompanach.

¹⁰ Agus, Leag thusa, a Thighearna, bunaitean na talmhainn air tùs; agus is iad na nèamhan obraichean do làmh:

¹¹ Teirgidh iadsan, ach mairidh tusa: agus fàsaidh iad uile sean mar aodach;

¹² Agus fillidh tu iad mar bhrat, agus caochlaidhear iad: ach is tusa an Tì ceudna, agus chan fhàilnich do bhliadhnachan.

¹³ Ach cò de na h‑ainglean ris an dubhairt e uair air bith, Suidh air mo dheaslàimh, gus an cuir mi do naimhdean nan stòl‐chas fod chasan?

¹⁴ Nach spioradan‐frithealaidh iad uile, air an cur a‑mach a‑chum frithealaidh dhaibhsan a bhios nan oighreachan air slàinte?