Britheamhan 18 - Am Bìoball Iomraidh Gàidhlig 1880 1992

1 Chuir na Danaich còigear fhear a dh’iarraidh oighreachd dhaibh fhèin. 27 Ghlac iad Lais.

¹ Anns na làithean sin cha robh rìgh air bith ann an Israel: agus anns na làithean sin dh’iarr treubh nan Danach dhaibh fhèin oighreachd anns an gabhadh iad còmhnaidh; oir gu ruig an là sin cha do thuit an oighreachd uile orra am measg treubhan Israeil.

² Agus chuir clann Dhain còignear den teaghlach on crìochan, daoine treuna, o Shorah agus o Estaol, a ghabhail beachd air an tìr, agus ga rannsachadh a‑mach; agus thubhairt iad riu, Imichibh, rannsaichibh a‑mach an tìr. Agus thàinig iad gu sliabh Ephraim, gu taigh Mhicah, agus dh’fhan iad an sin rè na h‑oidhche.

³ Nuair a bha iad aig taigh Mhicah, dh’aithnich iad guth an òganaich, an Lèbhitheach; agus thionndaidh iad a‑steach an sin, agus thubhairt iad ris, Cò a thug an seo thu? Agus ciod a tha thu a’ dèanamh an seo? Agus ciod a tha agad an seo?

⁴ Agus thubhairt esan riu, Mar seo agus mar seo rinn Micah rium, agus thuarasdalaich e mi, agus tha mi aige am shagart.

⁵ Agus thubhairt iad ris, Iarr comhairle, guidheamaid ort, air Dia, a‑chum gum bi fhios againn an soirbhich leinn nar slighe air a bheil sinn ag imeachd.

⁶ Agus thubhairt an sagart riu, Imichibh ann an sìth: an làthair an Tighearna tha ur slighe air a bheil sibh ag imeachd.

⁷ Agus dh’imich an còignear fhear, agus thàinig iad gu Lais, agus chunnaic iad an sluagh a bha ann, a’ gabhail còmhnaidh gun umhail, a rèir gnàth nan Sìdonach, sàmhach agus neo‐umhaileach; agus cha robh uachdaran air bith anns an tìr a chuireadh gu nàire iad ann an nì air bith: oir bha iad fada o na Sìdonaich, agus cha robh gnothach aca ri duine air bith.

⁸ Agus thàinig iad a dh’ionnsaigh am bràithrean gu Sorah agus Estaol; agus thubhairt am bràithrean riu, Ciod a tha sibh ag ràdh?

⁹ Agus thubhairt iad, Eiribh agus rachamaid suas nan aghaidh; oir chunnaic sinne an tìr, agus, feuch, tha i ro‑mhath; agus a bheil sibhse nur tàmh? Na bithibh leisg gu imeachd, agus gu dol a‑steach a shealbhachadh na tìre.

¹⁰ Nuair a thèid sibh, thig sibh a‑steach a dh’ionnsaigh sluaigh neo‐umhailich, agus do thìr ro‑fharsaing; oir thug Dia thairis dur làimh i; àit anns nach eil uireasbhaidh nì air bith a tha air an talamh.

¹¹ Agus chaidh à sin de theaghlach nan Danach, à Sorah agus à Estaol, sia ceud fear, crioslaichte le innealan cogaidh.

¹² Agus chaidh iad suas, agus champaich iad ann an Ciriat‐iearim, ann an Iùdah: uime sin thugadh Mahaneh‐dan mar ainm air an àite sin gu ruig an là‑an‑diugh; feuch, tha e air cùlaibh Chiriat‐iearim.

¹³ Agus chaidh iad seachad o sin gu sliabh Ephraim, agus thàinig iad gu taigh Mhicah.

¹⁴ An sin fhreagair an còignear fhear a chaidh a ghabhail beachd air tìr Lais, agus thubhairt iad rim bràithrean, A bheil fhios agaibh gu bheil anns na taighean sin èphod, agus teraphim, agus dealbh snaidhte, agus dealbh leaghte? A‑nis, matà, smaoinichibh ciod a nì sibh.

¹⁵ Agus thionndaidh iad gus a sin, agus thàinig iad gu taigh an òganaich, an Lèbhitheach, eadhon gu taigh Mhicah, agus chuir iad fàilte air.

¹⁶ Agus sheas an sia ceud fear crioslaichte le innealan cogaidh, a bha de chloinn Dhain, aig dol a‑steach a’gheata.

¹⁷ Agus chaidh an còignear fhear suas a chaidh a ghabhail beachd air an tìr, agus thàinig iad a‑steach an sin, agus ghabh iad an dealbh snaidhte, agus an èphod, agus an teraphim, agus an dealbh leaghte: agus sheas an sagart aig dol a‑steach a’ gheata, agus an sia ceud fear a bha crioslaichte le innealan cogaidh.

¹⁸ Agus nuair a chaidh iad sin a‑steach do thaigh Mhicah, agus a ghabh iad an dealbh snaidhte, an èphod, agus an teraphim, agus an dealbh leaghte, an sin thubhairt an sagart riu, Ciod a tha sibh a’ dèanamh?

¹⁹ Agus thubhairt iadsan ris, Bi ad thosd, cuir do làmh air do bheul, agus falbh maille rinne, agus bi dhuinn ad athair agus ad shagart: an fheàrr dhut a bhith ad shagart do thaigh aon duine, na thu a bhith ad shagart do threubh agus do theaghlach ann an Israel?

²⁰ Agus bha cridhe an t‑sagairt subhach; agus ghabh e an èphod, agus an teraphim, agus an dealbh snaidhte, agus chaidh e ann am meadhon an t‑sluaigh.

²¹ Agus thionndaidh iad, agus dh’imich iad, agus chuir iad a’ chlann bheag, agus an sprèidh, agus gach nì luachmhor romhpa.

²² Agus nuair a bha iad astar fada o thaigh Mhicah, chruinnich na fir a bha anns na taighean a bha làimh ri taigh Mhicah iad fhèin an ceann a chèile, agus chaidh iad air tòir chloinn Dhain.

²³ Agus ghlaodh iad ri cloinn Dhain; agus thionndaidh iadsan an aghaidh; agus thubhairt iad ri Micah, Ciod a tha a’ teachd riut, gu bheil thu a’ teachd le a leithid seo de chuideachd?

²⁴ Agus thubhairt esan, Mo dhiathan a rinn mi thug sibh leibh, agus an sagart, agus dh’fhalbh sibh romhaibh; agus ciod a tha agamsa tuilleadh? Agus ciod e seo a tha sibh ag ràdh riu, Ciod a tha a’ teachd riut?

²⁵ Agus thubhairt clann Dhain ris, Na cluinnear do ghuth nar measg, air eagal gum buail daoine feargach nan spiorad ort, agus gun caill thu d’anam fhèin, agus anaman do theaghlaich.

²⁶ Agus dh’imich clann Dhain air an slighe; agus nuair a chunnaic Micah gu robh iad tuilleadh is làidir air a shon, thionndaidh e agus thill e da thaigh.

²⁷ Agus ghabh iad na nithean a rinn Micah, agus an sagart a bha aige, agus thàinig iad gu Lais, a dh’ionnsaigh sluaigh a bha sàmhach agus neo‐umhaileach: agus bhuail iad iad le faobhar a’ chlaidheimh, agus loisg iad am baile le teine.

²⁸ Agus cha robh fear‐saoraidh ann, a chionn gu robh e fada o Shìdon, agus nach robh gnothach aca ri duine sam bith: agus bha e anns a’ ghleann a tha làimh ri Bet‐rehob: agus thog iad baile, agus ghabh iad còmhnaidh ann.

²⁹ Agus thug iad Dan mar ainm air a’ bhaile, a rèir ainm Dhain, an athair, a rugadh do Israel: gidheadh b’e Lais ainm a’ bhaile an toiseach.

³⁰ Agus chuir clann Dhain suas dhaibh fhèin an dealbh snaidhte: agus bha Ionatan mac Ghersoim mhic Mhanaseh, e fhèin agus a mhic, nan sagartan do threubh Dhain, gu ruig là braighdeanas na tìre.

³¹ Agus chuir iad suas dhaibh fhèin dealbh snaidhte Mhicah, a rinn e, rè na h‑ùine a bha taigh Dhè ann an Siloh.