Amos 6 - Am Bìoball Iomraidh Gàidhlig 1880 1992

1 Smachdaichear Israeil airson an neo‐gheamnaidheachd, 10 agus airson am peacaidhean.

¹ Is truagh dhaibhsan a tha gu suaimhneach ann an Sion, agus ag earbsa à sliabh Shamaria; a tha gan ainmeachadh fhèin air tùs nan cinneach, gus a bheil imeachd taigh Israeil.

² Siùbhlaibh thairis gu Calneh, agus faicibh; agus rachaibh as a sin gu Hamat mòr: an sin rachaibh sìos gu Gat nam Philisteach: an fheàrr iadsan na na rìoghachdan seo? No a bheil an crìochan nas mò na ur crìoch‐se?

³ Is truagh dhaibhsan a tha a’ cur an droch là fad uapa, agus a’ toirt am fagas àite‐suidhe an fhòirneirt:

⁴ A tha a’ laighe air leapaichean deud‐chnàmh, agus gan sìneadh fhèin air an uirighean; a tha ag ithe uain an treud, agus nan laogh à meadhon an taigh‐bhiadhaidh:

⁵ A tha a’ seinn do fhuaim na clàrsaich; a tha cosmhail ri Daibhidh, a’ dealbh dhaibh fhèin innealan‐ciùil:

⁶ A tha ag òl fìona ann an cuachan, agus gan ungadh fhèin le tagha gach ola: ach nach eil duilich airson àmhghar Iòseiph.

⁷ Air an adhbhar sin a‑nis thèid iad ann am bruid leis a’ chiad chuid a dh’fhalbhas ann am braighdeanas; agus bheirear air falbh cuirm na muinntir a bha gan sìneadh fhèin.

⁸ Mhionnaich an Tighearna Iehòbhah air fhèin, tha Iehòbhah, Dia nan sluagh ag ràdh, Is gràin leam òirdheirceas Iàcoib, agus is fuath leam a lùchairtean: uime sin bheir mi seachad am baile, agus gach nì a tha ann.

⁹ Agus tàrlaidh, ma dh’fhanas deichnear fhear ann an aon taigh, gum faigh iad bàs.

¹⁰ Agus togaidh caraid duine suas e, agus esan a loisgeas e, a‑chum na cnàmhan a thoirt a‑mach as an taigh; agus their e ris‐san a tha a‑staigh anns an taigh, A bheil aon neach fhathast leat? Agus their esan, Chan eil. An sin their e, Bi ad thosd. A chionn nach eil iad a’ toirt luaidh air ainm Iehòbhah.

¹¹ Oir feuch, àithnidh an Tighearna, agus buailidh e an taigh mòr le beàrnan, agus an taigh beag le sgoltaidhean.

¹² An ruith eich air carraig? An treabhar i le daimh? Oir thionndaidh sibh breitheanas gu domblas, agus toradh an ionracais gu iteodha.

¹³ Sibhse a tha ri gàirdeachas ann an nì as neoni; a tha ag ràdh, Nach do ghabh sinn dar n‑ionnsaigh uachdaranachd le ar neart fhèin?

¹⁴ Agus, feuch, dùisgidh mise suas cinneach nur n‑aghaidh, O thaigh Israeil, tha Iehòbhah, Dia nan sluagh ag ràdh; agus sàraichidh iad sibh o dhol a‑steach Hamait, gu ruig abhainn an fhàsaich.