Amos 3 - Am Bìoball Iomraidh Gàidhlig 1880 1992

1 Adhbhar nam breitheanas a thug Dia air cloinn Israeil. 13 San là anns an agair Dia lochdan Israeil air, sgriosaidh e altairean Bhàail.

¹ Cluinnibh am facal seo a labhair an Tighearna nur n‑aghaidh, O chlann Israeil, an aghaidh an uile theaghlaich a thug mi a‑nìos o thìr na h‑Eiphit, ag ràdh,

² Is sibhse a‑mhàin air an do ghabh mi eòlas de uile theaghlaichean na talmhainn: uime sin smachdaichidh mi sibh airson ur n‑uile lochdan.

³ Am faod dithis imeachd le chèile, mura bi iad rèidh?

⁴ Am beuc an leòmhann anns a’ choille, nuair nach eil creach air bith aige? An èigh an leòmhann òg as a’ gharaidh, mura do ghlac e aon nì?

⁵ Am faod eun tuiteam ann an lìon air an talamh, far nach eil aon ribe air a shon? An tog neach eangach suas on talamh, agus gun nì air bith a ghlacadh?

⁶ An sèidear an trompaid ann am baile, agus gun eagal a bhith air an t‑sluagh? Am bi dòrainn ann am baile, agus nach e an Tighearna a chuir ann e?

⁷ Gu deimhinn cha dèan an Tighearna Iehòbhah aon nì, gun a rùn‐diamhair fhoillseachadh da sheirbhisich na fàidhean.

⁸ Bheuc an leòmhann; cò air nach bi eagal? Labhair an Tighearna Iehòbhah, cò nach dèanadh fàistneachd?

⁹ Cuiribh an cèill anns na lùchairtean an Asdod, agus anns na tallachan an tìr na h‑Eiphit, agus abraibh, Cruinnichibh sibh fhèin air slèibhtean Shamaria; agus feuchaibh an t‑ioma‑luasgadh mòr a tha na meadhon, agus iadsan a tha air an sàrachadh innte.

¹⁰ Oir chan aithne dhaibh a’ chòir a dhèanamh, tha an Tighearna ag ràdh; tha iad a’ tasgadh suas fòirneirt agus creiche nan lùchairtean.

¹¹ Air an adhbhar sin, mar seo tha an Tighearna Iehòbhah ag ràdh, Bidh eascaraid fòs mun cuairt air an fhearann; agus bheir e a‑nuas do neart uat, agus creachar do lùchairtean.

¹² Mar seo tha an Tighearna ag ràdh, Amhail a spìonas am buachaille a‑mach à beul an leòmhainn dà chois, no mìr de chluais; mar sin bheirear a‑mach clann Israeil, a tha a chòmhnaidh ann an Samaria, ann an cùil leapa; agus ann an Damascas, air uirigh.

¹³ Eisdibh‐se agus togaibh fianais do thaigh Iàcoib, tha an Tighearna Iehòbhah, Dia nan sluagh, ag ràdh,

¹⁴ Anns an là anns an agair mise lochdan Israeil air, gun agair mi fòs air altairean Bheteil; agus gearrar adhaircean na h‑altarach dhith, agus tuitidh iad a‑chum an làir.

¹⁵ Agus buailidh mi an taigh‐geamhraidh maille ris an taigh‐shamhraidh; agus sgriosar na taighean ìbhiridh, agus thig crìoch air na taighean mòra, deir an Tighearna.