Àireamh 8 - Am Bìoball Iomraidh Gàidhlig 1880 1992

1 Mar a lasadh na lòchrain. 5 Coisrigeadh nan Lèbhitheach; 23 an aois agus àm am frithealaidh.

¹ Agus labhair an Tighearna ri Maois, ag ràdh,

² Labhair ri Aaron, agus abair ris, Nuair a lasas tu na lòchrain, bheir na seachd lòchrain solas uapa thall fa chomhair a’ choinnleir.

³ Agus rinn Aaron mar sin; las e a lòchrain thall fa chomhair a’ choinnleir; mar a dh’àithn an Tighearna do Mhaois.

⁴ Agus b’e seo obair a’ choinnleir: bha e de òr buailte gu ruig a chas, gu ruig a bhlàthan bha e de obair bhuailte: a rèir an t‑samhlaidh a nochd an Tighearna do Mhaois, mar sin rinn e an coinnleir.

⁵ Agus labhair an Tighearna ri Maois, ag ràdh,

⁶ Gabh na Lèbhitich o mheasg chloinn Israeil, agus glan iad.

⁷ Agus mar seo nì thu riu, a‑chum an glanadh: crath uisge glanaidh orra, agus thugadh iad ealtainn thar am feòil uile, agus nigheadh iad an aodach, agus mar sin dèanadh iad glan iad fhèin.

⁸ An sin gabhadh iad tarbh òg maille ra thabhartas‐bìdh, eadhon flùr mìn measgte le ola, agus gabhaidh tu tarbh òg eile a‑chum ìobairt‐pheacaidh.

⁹ Agus bheir thu na Lèbhitich air beulaibh pàillean a’ choitheanail: agus cruinnichidh tu coitheanal chloinn Israeil uile an ceann a chèile:

¹⁰ Agus bheir thu na Lèbhitich an làthair an Tighearna, agus cuiridh clann Israeil an làmhan air na Lèbhitich:

¹¹ Agus luaisgidh Aaron na Lèbhitich ann an làthair an Tighearna, mar thabhartas‐luaisgte o chloinn Israeil; a‑chum is gun dèan iad seirbhis an Tighearna.

¹² Agus cuiridh na Lèbhitich an làmhan air cinn nan tarbh; agus ìobraidh tu aon dhiubh mar ìobairt‐pheacaidh, agus am fear eile mar ìobairt‐loisgte don Tighearna, a dhèanamh rèite airson nan Lèbhiteach.

¹³ Agus cuiridh tu na Lèbhitich an làthair Aaroin, agus an làthair a mhac, agus luaisgidh tu iad mar thabhartas‐luaisgte don Tighearna.

¹⁴ Mar seo sgaraidh tu na Lèbhitich o mheasg chloinn Israeil; agus bidh na Lèbhitich leamsa.

¹⁵ Agus na dhèidh sin thèid na Lèbhitich a‑steach a dhèanamh seirbhis pàillean a’ choitheanail; agus glanaidh tu iad, agus luaisgidh tu iad mar thabhartas‐luaisgte:

¹⁶ Oir thugadh dhòmhsa gu h‑iomlan iad o mheasg chloinn Israeil; an àite gach aoin a dh’fhosglas a’ bhrù, eadhon an àite ciad‐ghin chloinn Israeil uile, ghabh mi dhomh fhèin iad.

¹⁷ Oir is leamsa uile chiad‐ghin chloinn Israeil, araon duine agus ainmhidh: anns an là air an do bhuail mi gach ciad‐ghin ann an tìr na h‑Eiphit, naomhaich mi iad dhomh fhèin.

¹⁸ Agus ghabh mi na Lèbhitich an àit uile chiad‐ghin chloinn Israeil.

¹⁹ Agus thug mi na Lèbhitich mar thìodhlac do Aaron, agus da mhic, o mheasg chloinn Israeil, a dhèanamh seirbhis chloinn Israeil ann am pàillean a’ choitheanail, agus a dhèanamh rèite airson chloinn Israeil; a‑chum is nach bi plàigh sam bith am measg chloinn Israeil, nuair a thig clann Israeil am fagas don ionad naomh.

²⁰ Agus rinn Maois agus Aaron, agus co‑chruinneachadh chloinn Israeil uile, ris na Lèbhitich a rèir gach nì a dh’àithn an Tighearna do Mhaois a‑thaobh nan Lèbhiteach, mar sin rinn clann Israeil riu.

²¹ Agus ghlanadh na Lèbhitich, agus nigh iad an aodach: agus thug Aaron suas iad mar thabhartas an làthair an Tighearna; agus rinn Aaron rèite air an son a‑chum an glanadh.

²² Agus an dèidh sin chaidh na Lèbhitich a‑steach, a dhèanamh an seirbhis ann am pàillean a’ choitheanail, an làthair Aaroin agus an làthair a mhac: mar a dh’àithn an Tighearna do Mhaois a‑thaobh nan Lèbhiteach, mar sin rinn iad riu.

²³ Agus labhair an Tighearna ri Maois, ag ràdh,

²⁴ Is e seo an nì a bhuineas do na Lèbhitich: o chòig‐bliadhna‑fichead a dh’aois, agus os a chionn, thèid iad a‑steach a dh’fheitheamh air seirbhis pàillean a’ choitheanail:

²⁵ Agus o aois leth‐cheud bliadhna sguiridh iad a dh’fheitheamh air a sheirbhis, agus cha dèan iad seirbhis nas mò.

²⁶ Ach frithealaidh iad maille rim bràithrean ann am pàillean a’ choitheanail a ghleidheadh a’ chùraim, agus cha dèan iad seirbhis sam bith eile. Mar seo nì thu ris na Lèbhitich a‑thaobh an cùraim.