Àireamh 29 - Am Bìoball Iomraidh Gàidhlig 1880 1992

1 An ìobairt‐loisgte gu bhith air a toirt seachad air là sèididh nan trompaid, 7 air là cràdhaidh an anaman, 12 agus air ochd làithean fèille nam pàillean.

¹ Agus anns an t‑seachdamh mìos, air a’ chiad là den mhìos, bidh co‑ghairm naomh agaibh; obair thràilleil sam bith cha dèan sibh: is là sèideadh nan trompaid dhuibh e.

² Agus bheir sibh seachad mar ìobairt‐loisgte, a‑chum fàile chùbhraidh don Tighearna, aon tarbh òg, aon reithe, agus seachd uain den chiad bhliadhna gun ghaoid:

³ Agus bidh an tabhartas‐bìdh de fhlùr measgte le ola, trì deicheamh earrannan airson tairbh, agus dà dheicheamh earrann airson reithe,

⁴ Agus aon deicheamh earrann, airson gach uain, air feadh nan seachd uan;

⁵ Agus aon mheann de na gobhair a‑chum ìobairt‐pheacaidh, a dhèanamh rèite air ur son:

⁶ A thuilleadh air ìobairt‐loisgte a’ mhìosa, agus a tabhartas‐bìdh, agus an ìobairt‐loisgte ghnàthaichte, agus a tabhartas‐bìdh, agus an tabhartasan‐dibhe, a rèir an gnàtha, a‑chum fàile chùbhraidh, ìobairt a bheirear suas le teine don Tighearna.

⁷ Agus bidh agaibh air an deicheamh là den t‑seachdamh mìos seo co‑ghairm naomh: agus cràdhaidh sibh ur n‑anaman: obair sam bith cha dèan sibh air.

⁸ Ach bheir sibh seachad a‑chum ìobairt‐loisgte don Tighearna de fhàile cùbhraidh, aon tarbh òg, aon reithe, agus seachd uain den chiad bhliadhna; gun ghaoid bidh iad dhuibh.

⁹ Agus bidh an tabhartas‐bìdh de fhlùr measgte le ola, trì deicheamh earrannan airson gach tairbh, agus dà dheicheamh earrann airson gach reithe,

¹⁰ Deicheamh earrann air leth airson gach uain, air feadh nan seachd uan;

¹¹ Aon mheann de na gobhair a‑chum ìobairt‐pheacaidh, a thuilleadh air ìobairt‐pheacaidh na rèite, agus an ìobairt‐loisgte ghnàthaichte, agus a tabhartas‐bìdh, agus an tabhartasan‐dibhe.

¹² Agus air a’ chòigeamh‐là‑deug den t‑seachdamh mìos, bidh co‑ghairm naomh agaibh; obair thràilleil sam bith cha dèan sibh; agus gleidhidh sibh fèill don Tighearna seachd làithean.

¹³ Agus bheir sibh seachad a‑chum ìobairt‐loisgte, ìobairt a bheirear suas le teine, de fhàile cùbhraidh don Tighearna, trì‐tairbh‐dheug òga, dà reithe, agus ceithir‐uain‐deug den chiad bhliadhna; gun ghaoid bidh iad.

¹⁴ Agus bidh an tabhartas‐bìdh de fhlùr measgte le ola, trì deicheamh earrannan airson gach tairbh de na trì‐tairbh‐dheug, dà dheicheamh earrann airson gach reithe den dà reithe,

¹⁵ Agus deicheamh earrann air leth airson gach uain de na ceithir‐uain‐deug;

¹⁶ Agus aon mheann de na gobhair a‑chum ìobairt‐pheacaidh, a thuilleadh air an ìobairt‐loisgte ghnàthaichte, a tabhartas‐bìdh, agus a tabhartas‐dibhe.

¹⁷ Agus air an dara là bheir sibh seachad dà‑tharbh‐dheug òg, dà reithe, ceithir‐uain‐deug den chiad bhliadhna gun ghaoid:

¹⁸ Agus bidh an tabhartas‐bìdh, agus an tabhartasan‐dibhe airson nan tarbh, airson nan reitheachan, agus airson nan uan, a rèir an àireimh, a rèir a’ ghnàtha;

¹⁹ Agus aon mheann de na gobhair a‑chum ìobairt‐pheacaidh, a thuilleadh air an ìobairt‐loisgte ghnàthaichte, agus a tabhartas‐bìdh, agus a tabhartasan‐dibhe.

²⁰ Agus air an treas là aon‐tarbh‐deug, dà reithe, ceithir‐uain‐deug den chiad bhliadhna gun ghaoid:

²¹ Agus bidh an tabhartas‐bìdh agus an tabhartasan‐dibhe, airson nan tarbh, airson nan reitheachan, agus airson nan uan, a rèir an àireimh, a rèir a’ ghnàtha;

²² Agus aon bhoc‐goibhre a‑chum ìobairt‐pheacaidh, a thuilleadh air an ìobairt‐loisgte ghnàthaichte, agus a tabhartas‐bìdh, agus a tabhartas‐dibhe.

²³ Agus air a’ cheathramh là deich tairbh, dà reithe, agus ceithir‐uain‐deug den chiad bhliadhna gun ghaoid:

²⁴ Bidh an tabhartas‐bìdh agus an tabhartasan‐dibhe, airson nan tarbh, airson nan reitheachan, agus airson nan uan, a rèir an àireimh, a rèir a’ ghnàtha;

²⁵ Agus aon mheann de na gobhair a‑chum ìobairt‐pheacaidh, a thuilleadh air an ìobairt‐loisgte ghnàthaichte, a tabhartas‐bìdh, agus a tabhartas‐dibhe.

²⁶ Agus air a chòigeamh là naoi tairbh, dà reithe, agus ceithir‐uain‐deug den chiad bhliadhna gun ghaoid:

²⁷ Agus bidh an tabhartas‐bìdh, agus an tabhartasan‐dibhe, airson nan tarbh, airson nan reitheachan, agus airson nan uan, a rèir an àireimh, a rèir a’ ghnàtha;

²⁸ Agus aon bhoc‐goibhre a‑chum ìobairt‐pheacaidh, a thuilleadh air an ìobairt‐loisgte ghnàthaichte, agus a tabhartas‐bìdh, agus a tabhartas‐dibhe.

²⁹ Agus air an t‑siathamh là ochd tairbh, dà reithe, agus ceithir‐uain‐deug den chiad bhliadhna gun ghaoid:

³⁰ Agus bidh an tabhartas‐bìdh, agus an tabhartasan‐dibhe, airson nan tarbh, airson nan reitheachan, agus airson nan uan, a rèir an àireimh, a rèir a’ ghnàtha;

³¹ Agus aon bhoc‐goibhre a‑chum ìobairt‐pheacaidh, a thuilleadh air an ìobairt‐loisgte ghnàthaichte, a tabhartas‐bìdh, agus a tabhartas‐dibhe.

³² Agus air an t‑seachdamh là, seachd tairbh, dà reithe, agus ceithir‐uain‐deug den chiad bhliadhna gun ghaoid:

³³ Agus bidh an tabhartas‐bìdh, agus an tabhartasan‐dibhe, airson nan tarbh, airson nan reitheachan, agus airson nan uan, a rèir an àireimh, a rèir a’ ghnàtha;

³⁴ Agus aon bhoc‐goibhre a‑chum ìobairt‐pheacaidh, a thuilleadh air an ìobairt‐loisgte ghnàthaichte, a tabhartas‐bìdh, agus a tabhartas‐dibhe.

³⁵ Agus air an ochdamh là bidh àrd‐choitheanal agaibh: obair thràilleil sam bith cha dèan sibh air:

³⁶ Ach bheir sibh seachad a‑chum ìobairt‐loisgte ìobairt a bheirear suas le teine, de fhàile cùbhraidh don Tighearna, aon tarbh, aon reithe, seachd uain den chiad bhliadhna gun ghaoid:

³⁷ Bidh an tabhartas‐bìdh, agus an tabhartasan‐dibhe, airson an tairbh, airson an reithe, agus airson nan uan, a rèir an àireimh, a rèir a’ ghnàtha;

³⁸ Agus aon bhoc‐goibhre a‑chum ìobairt‐pheacaidh, a thuilleadh air an ìobairt‐loisgte ghnàthaichte, agus a tabhartas‐bìdh, agus a tabhartas‐dibhe.

³⁹ Na nithean sin nì sibh don Tighearna nur fèillean suidhichte; a thuilleadh air ur bòidean, agus ur tabhartasan saor‐thoile, airson ur n‑ìobairtean‐loisgte, agus airson ur tabhartas‐bìdh, agus airson ur tabhartas‐dibhe, agus airson ur tabhartas‐sìthe.

⁴⁰ Agus dh’innis Maois do chloinn Israeil a rèir gach nì a dh’àithn an Tighearna do Mhaois.