Àireamh 2 - Am Bìoball Iomraidh Gàidhlig 1880 1992

Suidheachadh nan treubh nam bùthan.

¹ Agus labhair an Tighearna ri Maois, agus ri Aaron, ag ràdh,

² Suidhichidh gach duine de chloinn Israeil làimh ra bhrataich fhèin, maille ri suaicheantas taigh an athraichean: fad as mun cuairt air pàillean a’ choitheanail suidhichidh iad.

³ Agus air taobh na h‑àird an ear, leth ri èirigh na grèine, suidhichidh luchd‐brataich camp Iùdah, a rèir an armailtean: agus bidh Nahson mac Aminadaib na cheannard air cloinn Iùdah.

⁴ Agus b’iad a armailt‐san, eadhon iadsan a chaidh àireamh dhiubh, trì‐fichead agus ceithir‐mìle‐deug agus sia ceud.

⁵ Agus am fagas dha suidhichidh treubh Isachair: agus bidh Nataneel mac Shuair na cheannard air cloinn Isachair.

⁶ Agus b’iad a armailt‐san, agus iadsan a chaidh àireamh dhith, leth‐cheud agus ceithir mìle agus ceithir cheud.

⁷ An sin treubh Shebuluin: agus bidh Eliab mac Heloin na cheannard air cloinn Shebuluin.

⁸ Agus b’iad a armailt‐san, agus iadsan a chaidh àireamh dhith, leth‐cheud agus seachd mìle agus ceithir cheud.

⁹ Na h‑uile a chaidh àireamh ann an camp Iùdah, b’iad ceud mìle agus ceithir‐fichead mìle agus sia mìle agus ceithir cheud, a rèir an armailtean: thèid iad seo a‑mach air thùs.

¹⁰ Air taobh na h‑àird a deas bidh bratach camp Reubein, a rèir an armailtean: agus na cheannard air cloinn Reubein bidh Elisur mac Shedeuir.

¹¹ Agus b’iad a armailt‐san, agus iadsan a chaidh àireamh dhith, dà‑fhichead agus sia mìle agus còig ceud.

¹² Agus làimh ris suidhichidh treubh Shimeoin; agus bidh Selumiel mac Shurisadai na cheannard air cloinn Shimeoin.

¹³ Agus b’iad a armailt‐san, agus iadsan a chaidh àireamh dhith, leth‐cheud agus naoi mìle agus trì cheud.

¹⁴ An sin treubh Ghad: agus na cheannard air mic Ghad, bidh Eliasaph mac Reueil.

¹⁵ Agus b’iad a armailt‐san, agus iadsan a chaidh àireamh dhiubh, dà‑fhichead agus còig mìle agus sia ceud agus leth‐cheud.

¹⁶ Na h‑uile a chaidh àireamh ann an camp Reubein, b’iad ceud mìle, agus leth‐cheud agus aon mhìle, agus ceithir cheud agus leth‐cheud, a rèir an armailtean: agus thèid iadsan a‑mach anns an dara òrdagh.

¹⁷ An sin thèid pàillean a’ choitheanail air aghaidh, maille ri camp nan Lèbhitheach am meadhon a’ champa: mar a champaicheas iad, mar sin thèid iad air an aghaidh, gach duine na àite fhèin, làimh rim brataichean.

¹⁸ Air taobh na h‑àird an iar bidh bratach camp Ephraim, a rèir an armailtean: agus bidh Elisama mac Amihuid na cheannard air mic Ephraim.

¹⁹ Agus b’iad a armailt‐san, agus iadsan a chaidh àireamh dhiubh, dà‑fhichead mìle agus còig ceud.

²⁰ Agus làimh ris‐san bidh treubh Mhanaseh: agus bidh Gameliel mac Phedahsuir na cheannard air cloinn Mhanaseh.

²¹ Agus b’iad a armailt‐san, agus iadsan a chaidh àireamh dhiubh, dà‑mhìle‐dheug ar fhichead agus dà cheud.

²² An sin treubh Bheniàmin: agus bidh Abidan mac Ghideoni na cheannard air mic Bheniàmin.

²³ Agus b’iad a armailt‐san agus iadsan a chaidh àireamh dhiubh, còig‐mìle‐deug ar fhichead agus ceithir cheud.

²⁴ B’iadsan uile a dh’àirmheadh de champ Ephraim, ceud mìle, agus ochd mìle agus ceud, a rèir an armailtean: agus thèid iadsan air an aghaidh anns an treas òrdagh.

²⁵ Bidh bratach camp Dhan air taobh na h‑àird a tuath a rèir an armailtean: agus bidh Ahieser mac Amisadai na cheannard air cloinn Dhan.

²⁶ Agus b’iad a armailt‐san, agus iadsan a chaidh àireamh dhiubh, trì‐fichead agus dà mhìle agus seachd ceud.

²⁷ Agus làimh ris campaichidh treubh Aseir; agus bidh Pagiel mac Ocrain na cheannard air cloinn Aseir.

²⁸ Agus b’iad a armailt‐san, agus iadsan a chaidh àireamh dhiubh, dà‑fhichead agus aon mhìle agus còig ceud.

²⁹ An sin treubh Naphtali: agus bidh Ahira mac Enain na cheannard air cloinn Naphtali.

³⁰ Agus b’iad a armailt‐san, agus iadsan a chaidh àireamh dhiubh, leth‐cheud agus trì mìle agus ceithir cheud.

³¹ B’iadsan uile a chaidh àireamh ann an camp Dhan, ceud mìle agus leth‐cheud agus seachd mìle agus sia ceud: imichidh iadsan fa dheireadh lem brataichean.

³² Is iad sin iadsan a dh’àirmheadh de chloinn Israeil, a rèir taighean an athraichean: b’iadsan uile a chaidh àireamh de na campannan, a rèir an armailtean, sia ceud mìle agus trì mìle agus còig ceud agus leth‐cheud.

³³ Ach cha d’àirmheadh na Lèbhithich am measg chloinn Israeil, mar a dh’àithn an Tighearna do Mhaois.

³⁴ Agus rinn clann Israeil a rèir gach nì a dh’àithn an Tighearna do Mhaois: mar sin champaich iad làimh rim brataichean, agus mar sin chaidh iad air an aghaidh, gach aon a rèir an teaghlaichean, a rèir taighean an athraichean.