2 Timòteus 3 - Am Bìoball Iomraidh Gàidhlig 1880 1992

1 Thug Pòl rabhadh do Thimòteus mu thimcheall na h‑àmannan ri teachd; 6 dh’innis e cò iad naimhdean na fìrinn; 10 chuir e eisempleir fhèin roimhe, 16 agus mhol e na sgriobtair naomha.

¹ Ach biodh fhios seo agad, gun tig anns na làithean deireannach aimsirean cunnartach.

² Oir bidh daoine fèin‐spèiseil, sanntach, ràiteachail, uaibhreach, toibheumach, eas‐umhail do phàrantan, mì‑thaingeil, mì‑naomha,

³ Gun ghràdh nàdarra, nan luchd‐brisidh coicheangail, tuaileasach, neo‐gheamnaidh, borb, gun ghaol don mhath,

⁴ Fealltach, ceann‐làidir, àrdanach, aig a bheil bàrr gràidh do shàimh na tha aca do Dhia;

⁵ Aig a bheil coslas diadhachd, ach a tha ag àicheadh a cumhachd: on leithidean sin tionndaidh‐sa air falbh.

⁶ Oir is ann dhiubh seo a tha an dream sin a dh’èalaidheas a‑steach do thaighean, agus a bheir leo ann am braighdeanas mnathan suarach air an uallachadh le peacaidhean, air an iomain le iomadh gnè ana‑mianna,

⁷ A’ sìor‐fhòghlam, agus gun chomas dhaibh gu bràth teachd a‑chum eòlas na fìrinn.

⁸ Agus mar a chuir Iannes agus Iambres an aghaidh Mhaois, mar sin tha iadsan a’ cur an aghaidh na fìrinn: daoine aig a bheil inntinn thruaillidh, gun tuigse a‑thaobh a’ chreidimh.

⁹ Ach cha tèid iad nas fhaide air an aghaidh: oir bidh am mì‑chiall follaiseach do na h‑uile dhaoine, mar a bha am mì‑chiall‐san mar an ceudna.

¹⁰ Ach tha làn‐fhios agad air mo theagasg‐sa, mo ghnè beatha, mo rùn, mo chreideamh, m’fhad‐fhulangas, mo sheirc, m’fhoighidinn,

¹¹ Mo gheur‐leanmhainnean, m’fhulangasan a thàinig orm ann an Antioch, ann an Iconium, ann an Listra; ciod e meud nan geur‐leanmhainn a ghiùlain mi: ach asda uile shaor an Tighearna mi.

¹² Seadh, fuilingidh iadsan uile, leis an àill am beatha a chaitheamh gu diadhaidh ann an Iosa Crìosd, geur‐leanmhainn.

¹³ Ach fàsaidh droch dhaoine agus mealltairean nas miosa agus nas miosa, a’ mealladh, agus air am mealladh.

¹⁴ Ach buanaich thusa anns na nithean a dh’fhòghlaim thu, agus air an do rinneadh thu dearbh‐fhiosrach, air dhut fios a bhith agad cia uaithe a dh’fhòghlaim thu iad;

¹⁵ Agus o bha thu ad leanabh gum b’aithne dhut na sgriobtairean naomha, a tha comasach air do dhèanamh glic a‑chum slàinte, tre an chreideamh a tha ann an Iosa Crìosd.

¹⁶ Tha an sgriobtar uile air a dheachdadh le Spiorad Dhè, agus tha e tairbheach a‑chum teagaisg, a‑chum spreigeadh, a‑chum leasachaidh, a‑chum oilein ann am fìreantachd:

¹⁷ A‑chum gum bi òglach Dhè coileanta, làn‐deas a‑chum gach uile dheagh obrach.