2 Samuel 8 - Am Bìoball Iomraidh Gàidhlig 1880 1992

1 Bhuail Daibhidh na Philistich, agus thug e na Moabaich fo chìs. 3 Bhuail e Hadadeser agus na Sirianaich. 9 Chuir Toi a mhac le tìodhlacan da ionnsaigh. 11 Choisrig e iad don Tighearna. 14 Shuidhich e freiceadain ann an Edom.

¹ Agus an dèidh seo bhuail Daibhidh na Philistich, agus cheannsaich e iad: agus ghlac Daibhidh Metegamah à làimh nam Philisteach.

² Agus bhuail e na Mòabaich, agus thomhais e iad le còrd, gan tilgeadh sìos gu làr: eadhon le dà chòrd thomhais e a thabhairt bàis, agus le aon chòrd iomlan a ghleidheadh beò. Agus bha na Mòabaich nan seirbhisich aig Daibhidh, agus thug iad tìodhlacan leo.

³ Bhuail Daibhidh mar an ceudna Hadadeser mac Rehoib, rìgh Shobah, nuair a chaidh e a chosnadh a chrìche air a h‑ais aig abhainn Euphràtes.

⁴ Agus thug Daibhidh uaithe mìle carbad, agus seachd ceud marcaiche, agus fichead mìle coisiche: agus gheàrr Daibhidh speirean eich nan carbad uile, ach dh’fhàg e dhiubh dìol ceud carbad.

⁵ Agus nuair a thàinig Sirianaich Dhamascais a chuideachadh le Hadadeser rìgh Shobah, bhuail Daibhidh de na Sirianaich dà mhìle ar fhichead fear.

⁶ An sin chuir Daibhidh freiceadain ann an Siria Dhamascais: agus bha na Sirianaich nan seirbhisich aig Daibhidh, agus thug iad leo tìodhlacan: agus ghlèidh an Tighearna Daibhidh gach taobh a chaidh e.

⁷ Agus ghabh Daibhidh na sgiathan òir a bha aig seirbhisich Hadadeseir, agus thug e iad gu Ierusalem.

⁸ Agus o Bhetah, agus o Bherotai, bailtean Hadadeseir, thug rìgh Daibhidh ro‑mhòran umha.

⁹ Nuair a chuala Toi rìgh Hamait gun do bhuail Daibhidh sluagh Hadadeseir uile,

¹⁰ An sin chuir Toi a mhac Ioram gu rìgh Daibhidh, a chur fàilte air, agus ga bheannachadh, a chionn gun do chog e ri Hadadeser, agus gun do bhuail e e: (oir bha cogadh aig Hadadeser ri Toi:) agus na làimh bha soithichean airgid, agus soithichean òir, agus soithichean umha.

¹¹ Iad sin mar an ceudna choisrig rìgh Daibhidh don Tighearna, maille ris an airgead agus ris an òr a choisrig e o na h‑uile chinnich a cheannsaich e;

¹² O Shiria, agus o Mhòab, agus o chloinn Amoin, agus o na Philistich, agus o Amalec, agus o chreich Hadadeseir, mhic Rehoib, rìgh Shobah.

¹³ Agus fhuair Daibhidh ainm dha fhèin, nuair a thill e o bhualadh nan Edomach ann an gleann an t‑salainn, ochd‐mìle‐deug fear.

¹⁴ Agus chuir e freiceadain ann an Edom: air feadh Edoim uile chuir e freiceadain; agus bha na h‑Edomaich uile nan seirbhisich aig Daibhidh: agus ghlèidh an Tighearna Daibhidh gach taobh a chaidh e.

¹⁵ Agus rìghich Daibhidh air Israel uile; agus rinn Daibhidh breitheanas agus ceartas da shluagh uile.

¹⁶ Agus bha Ioab mac Sheruiah os cionn na h‑armailte; agus bha Iehosaphat mac Ahiluid na sheanchaidh;

¹⁷ Agus bha Sadoc mac Ahituib, agus Ahimelech mac Abiatair nan sagartan, agus Seraiah na sgrìobhaiche;

¹⁸ Agus bha Benaiah mac Iehoiada os cionn nan Cereteach agus nam Peleteach: agus bha mic Dhaibhidh nan àrd uachdarain.