2 Samuel 23 - Am Bìoball Iomraidh Gàidhlig 1880 1992

1 Na bhriathran deireannach chuir Daibhidh an cèill sonas an duine ionraic, agus sgrios an aingidh. 8 Ainmean a dhaoine treuna.

¹ A‑nis is iad seo briathran deireannach Dhaibhidh. Thubhairt Daibhidh mac Iese, agus thubhairt an duine a chuireadh suas gu h‑àrd, aon ungte Dia Iàcoib, agus salmadair binn Israeil:

² Labhair spiorad an Tighearna tromhamsa, agus a fhacal air mo theangaidh.

³ Thubhairt Dia Israeil, labhair carraig Israeil riumsa: Bidh esan a riaghlas os cionn dhaoine cearta a’ riaghladh ann an eagal Dhè:

⁴ Agus mar sholas na maidne nuair a dh’èireas a’ ghrian, madainn gun neòil; mar am feur a’ fàs as an talamh le dealradh an dèidh uisge.

⁵ Ged nach eil mo thaigh mar sin aig Dia, gidheadh rinn e coicheangal sìorraidh riumsa, air a shuidheachadh anns gach nì, agus a choimheadar: oir is e seo mo shlàinte uile, agus mo mhiann uile, ged nach eil e a’ toirt air fàs.

⁶ Ach bidh mic Bheliail uile mar dhroigheann a thilgear air falbh, a chionn nach glacar le làimh iad:

⁷ Ach am fear a bheanas riu, dìonar e le iarann, agus le crann sleagha; agus le teine loisgear gu tur iad far am fàs iad.

⁸ Is iad seo ainmean nan daoine treuna a bha aig Daibhidh: Iasobeam, mac Hachmoni, na cheann air triùir; thog esan a shleagh an aghaidh trì cheud, a mharbhadh leis anns an aon àm.

⁹ Agus na dhèidh‐san bha Eleàsar mac Dhodo an t‑Ahohach, aon den triùir dhaoine treuna a bha maille ri Daibhidh, nuair a thug iad dùbhlan do na Philistich a chruinnicheadh an sin gu cath, agus a dh’imich fir Israeil romhpa.

¹⁰ Dh’èirich esan agus bhuail e na Philistich gus an robh a làmh sgìth, agus an do lean a làmh ris a’ chlaidheamh. Agus dh’obraich an Tighearna saorsa mhòr air an là sin; agus thill an sluagh na dhèidh a‑mhàin a dh’fhaobhachadh.

¹¹ Agus na dhèidh‐san bha Samah, mac Agee, an t‑Hararach. Agus chruinnicheadh na Philistich nam buidhinn, far an robh mìr fearainn làn de ghall‐pheasair; agus theich an sluagh ro na Philistich.

¹² Ach sheas esan ann am meadhon an fhearainn, agus dhìon e e, agus bhuail e na Philistich: agus dh’obraich an Tighearna saorsa mhòr.

¹³ Agus chaidh triùir de na deich‐ceannardan‐fichead sìos, agus thàinig iad ann an àm an fhogharaidh a dh’ionnsaigh Dhaibhidh, do uaimh Adullaim: agus champaich buidheann nam Philisteach ann an gleann Rephaim.

¹⁴ Agus bha Daibhidh an sin ann an daingneach, agus bha freiceadan nam Philisteach an sin ann am Betlehem.

¹⁵ Agus mhiannaich Daibhidh, agus thubhairt e, O gun tugadh fear‐eigin dhomh deoch uisge o thobar Bhetlehem, a tha làimh ris a’ gheata!

¹⁶ Agus bhris an triùir dhaoine treuna a‑steach tro fheachd nam Philisteach, agus tharraing iad uisge à tobar Bhetlehem, a bha làimh ris a’ gheata, agus ghabh iad e, agus thug iad leo e a dh’ionnsaigh Dhaibhidh: gidheadh cha b’àill leis òl dheth, ach thaom e a‑mach e don Tighearna.

¹⁷ Agus thubhairt e, Guma fada uamsa, a Thighearna, seo a dhèanamh: an òlainn‐sa fuil nan daoine a chaidh ann an cunnart an anama? Uime sin cha b’àill leis òl dheth. Na nithean sin rinn an triùir dhaoine treuna.

¹⁸ Agus bha Abisai bràthair Ioaib, mac Sheruiah, na cheann air triùir; agus thog e suas a shleagh an aghaidh trì cheud, a mharbh e; agus fhuair e ainm am measg thriùir.

¹⁹ Den triùir nach b’e a b’urramaiche? Uime sin bha e na cheannard orra: gidheadh, cha do ràinig e gu ruig a’ chiad triùir.

²⁰ Agus Benaiah mac Iehoiada, mac duine gaisgeil, o Chabseel, a rinn mòran ghnìomharan, mharbh esan dithis fhear leòmhannta de Mhòab: chaidh e sìos mar an ceudna, agus mharbh e leòmhann ann am meadhon sluic an àm sneachda.

²¹ Agus mharbh e Eiphiteach, duine comharraichte: agus ann an làimh an Eiphitich bha sleagh; ach chaidh esan sìos da ionnsaigh le luirg, agus spìon e an t‑sleagh à làimh an Eiphitich agus mharbh e le a shleagh fhèin e.

²² Na nithean sin rinn Benaiah mac Iehoiada; agus bha ainm aige am measg triùir dhaoine treuna.

²³ Den triùir b’e a b’urramaiche, ach cha do ràinig e gu ruig a’ chiad triùir: agus chuir Daibhidh e os cionn a fhreiceadain.

²⁴ Bha Asahel bràthair Ioaib am measg an deich‐ar‑fichead, Elhanan mac Dhodo, o Bhetlehem,

²⁵ Samah an t‑Harodach, Elica an t‑Harodach,

²⁶ Heles am Paltach, Ira mac Iceis an Tecoach,

²⁷ Abieser an t‑Anetotach, Mebunai an t‑Husatach,

²⁸ Salmon an t‑Ahohach, Maharai an Netophatach,

²⁹ Heleb mac Bhaanah, an Netophatach, Itai mac Ribai o Ghibeah chloinn Bheniàmin.

³⁰ Benaiah am Piratonach, Hidai o shruthan Ghaais,

³¹ Abialbon an t‑Arbatach, Asmabhet am Barhumach,

³² Eliahba na Saalbonach: de mhic Iasein, Ionatan,

³³ Samah an t‑Hararach, Ahiam mac Sharair an t‑Hararach,

³⁴ Eliphelet mac Ahasbai mhic a’ Mhaachataich, Eliam mac Ahitopheil an Gilonach,

³⁵ Hesrai an Carmeleach, Paarai an t‑Arbach,

³⁶ Igal mac Nàtain o Shobah, Bani an Gadach,

³⁷ Selec an t‑Amonach, Naharai am Beerotach, fear‐iomchair arm Ioaib mhic Sheruiah,

³⁸ Ira an t‑Itreach, Gareb an t‑Itreach,

³⁹ Uriah an t‑Hiteach: seachd‐deug ar fhichead uile.