2 Rìgh 12 - Am Bìoball Iomraidh Gàidhlig 1880 1992

4 Dh’òrdaich Iehoas do na sagartan taigh an Tighearna a chàradh. 17 Ghlac Hasael Gat, agus chuir e aghaidh ri dol suas gu Ierusalem. 18 Air dha tìodhlac fhaghail thill e air ais. 20 Chuireadh Iehoas gu bàs, agus rìghich Amasiah na àite.

¹ Anns an t‑seachdamh bliadhna de Iehu thòisich Iehoas air rìoghachadh, agus rìghich e dà‑fhichead bliadhna ann an Ierusalem: agus b’e ainm a mhàthar Sibiah o Bheer‐sèba.

² Agus rinn Iehoas an nì a bha ceart ann an sùilean an Tighearna rè a làithean uile, anns an do theagaisg Iehoiada an sagart e.

³ Ach cha tugadh air falbh na h‑àitean àrda: bha an sluagh fhathast ag ìobradh agus a’ losgadh tùis anns na h‑àitean àrda.

⁴ Agus thubhairt Iehoas ris na sagartan, Uile airgead nan nithean coisrigte a bheirear a‑steach do thaigh an Tighearna, airgead gach duine a thèid seachad anns an àireamh, airgead‐meas gach duine, an t‑airgead uile a thig e ann an cridhe duine sam bith a thoirt a‑steach do thaigh an Tighearna,

⁵ Gabhadh na sagartan dan ionnsaigh e, gach duine o a fhear‐eòlais; agus càradh iad briseadh a gheibhear ann.

⁶ Gidheadh, ann an treas‐bliadhna‑fichead rìgh Iehoais, cha do chàraich na sagartan briseadh an taighe.

⁷ An sin ghairm rìgh Iehoas air Iehoiada an sagart, agus air na sagartan eile, agus thubhairt e riu, Carson nach eil sibh a’ càradh briseadh an taighe? A‑nis, matà, na gabhaibh airgead tuilleadh o luchd ur n‑eòlais, ach thugaibh airson briseadh an taighe e.

⁸ Agus dh’aontaich na sagartan gun airgead a ghabhail tuilleadh on t‑sluagh, agus gun briseadh an taighe a chàradh.

⁹ Ach ghabh Iehoiada an sagart ciste, agus rinn e toll na h‑uachdar, agus chuir e i ri taobh na h‑altarach air an làimh dheis, mar a thig duine a‑steach do thaigh an Tighearna: agus ann an sin chuir na sagartan a bha a’ gleidheadh an dorais an t‑airgead uile a thugadh a‑steach do thaigh an Tighearna.

¹⁰ Agus nuair a chunnaic iad gu robh mòran airgid anns a’ chiste, chaidh sgrìobhaiche an rìgh suas, agus an t‑àrd shagart, agus cheangail iad suas, agus ghabh iad suim an airgid a fhuaireadh ann an taigh an Tighearna.

¹¹ Agus thug iad an t‑airgead, nuair a chaidh a shuim a ghabhail, ann an làimh nan daoine a rinn an obair, a chuireadh os cionn taigh an Tighearna; agus thug iadsan a‑mach e do na saoir, agus don luchd‐togail, a rinn obair air taigh an Tighearna.

¹² Agus do chlachairean, agus do luchd‐snaidhidh chlachan snaidhte a chàradh briseadh taigh an Tighearna, agus airson gach nì a chuireadh a‑mach air an taigh ga chàradh.

¹³ Gidheadh cha do rinneadh do thaigh an Tighearna cupain airgid, smàladairean, cuachan, trompaidean, soithichean òir air bith, no soithichean airgid air bith, den airgead a thugadh a‑steach do thaigh an Tighearna:

¹⁴ Ach thug iad e don luchd‐obrach, agus chàraich iad leis taigh an Tighearna.

¹⁵ Os bàrr, cha tug iad air na daoine, an làimh an tug iad an t‑airgead a‑chum a thoirt don luchd‐obrach, cunntas a thoirt seachad: oir rinn iadsan gu fìrinneach.

¹⁶ Cha tugadh an t‑airgead‐easaontais agus an t‑airgead‐peacaidh a‑steach do thaigh an Tighearna: bu leis na sagartan e.

¹⁷ An sin chaidh Hasael rìgh Shiria suas, agus chog e an aghaidh Ghat, agus ghlac e e: agus chuir Hasael a aghaidh ri dol suas gu Ierusalem.

¹⁸ Agus ghabh Iehoas rìgh Iùdah na nithean coisrigte uile a choisrig Iehosaphat, agus Iehoram, agus Ahasiah a athraichean, rìghrean Iùdah, agus a nithean coisrigte fhèin, agus an t‑òr uile a fhuaireadh ann an ionmhasan taigh an Tighearna, agus taigh an rìgh, agus chuir e a dh’ionnsaigh Hasaeil rìgh Shiria e; agus dh’imich e o Ierusalem.

¹⁹ Agus a’ chuid eile de ghnìomharan Iehoais, agus gach nì a rinn e, nach eil iad sgrìobhte ann an leabhar eachdraidh rìghrean Iùdah?

²⁰ Agus dh’èirich a sheirbhisich, agus rinn iad ceannairc, agus bhuail iad Iehoas ann an taigh Mhilo, a tha anns an dol sìos gu Sila:

²¹ Oir bhuail Iosachar mac Shimeat, agus Iehosabad mac Shomair a sheirbhisich, e, agus fhuair e bàs; agus dh’adhlaic iad e maille ra athraichean ann am baile Dhaibhidh: agus rìghich Amasiah a mhac na àite.