2 Peadar 1 - Am Bìoball Iomraidh Gàidhlig 1880 1992

1 A‑chum luchd‐aidmheil a’ chreidimh a dhaingneachadh ann an dòchas meudachaidh gràis Dhè, 5 chuir Peadar impidh orra le creideamh agus deagh obraichean, an gairm a dhèanamh cinnteach: 12 bha e cùramach mu seo a chur an cuimhne dhaibh, do bhrìgh gu robh fios aige gun robh a bhàs am fagas.

¹ Sìmon Peadar, seirbhiseach agus abstol Iosa Crìosd, dhaibhsan a fhuair an creideamh luachmhor ceudna rinne, tre fhìreantachd ar Dè agus ar Slànaighir, Iosa Crìosd:

² Gu robh gràs agus sìth air am meudachadh dhuibh, tre eòlas Dhè, agus Iosa ar Tighearna,

³ A rèir mar a dheònaich a chumhachd diadhaidh‐san dhuinn na nithean sin uile a bhuineas do bheatha agus do dhiadhachd, tre eòlas an tì sin a ghairm sinn a‑chum glòire, agus deagh‐bheus:

⁴ Tre an tugadh dhuinn geallaidhean ro‑mhòr agus luachmhor, a‑chum den trìdsan gum biodh sibhse air ur dèanamh nur luchd‐compàirt de nàdar na diadhachd, air dhuibh dol as on truaillidheachd a tha anns an t‑saoghal tre ana‑miann.

⁵ Agus a thuilleadh air seo, air dèanamh an uile dhìchill dhuibh, cuiribh ri ur creideamh deagh‐bheus; agus ri deagh‐bheus eòlas;

⁶ Agus ri eòlas stuaim; agus ri stuaim foighidinn; agus ri foighidinn diadhachd;

⁷ Agus ri diadhachd gràdh bràthaireil; agus ri gràdh bràthaireil seirc.

⁸ Oir ma bhios na nithean seo annaibh, agus pailt, bheir iad oirbh gun a bhith leisg, no mì‑thorrach ann an eòlas ar Tighearna, Iosa Crìosd.

⁹ Ach an tì aig nach eil na nithean sin, tha e dall, agus geàrr‐sheallach, a’ dìochuimhneachadh gun do ghlanadh e o a sheann pheacaidhean.

¹⁰ Uime sin, a bhràithrean, dèanaibh tuilleadh dìchill a‑chum ur gairm agus ur taghadh a dhèanamh cinnteach: oir ma nì sibh na nithean seo, cha tuit sibh a‑chaoidh:

¹¹ Oir mar sin fritheilear gu pailt dhuibh slighe a‑steach do rìoghachd shìorraidh ar Tighearna agus ar Slànaighir, Iosa Crìosd.

¹² Uime sin cha dearmad mi na nithean seo a ghnàth‐chur an cuimhne dhuibh, ged is aithne dhuibh iad, agus ged tha sibh air ur daingneachadh anns an fhìrinn an làthair.

¹³ Ach tha mi a’ meas gur còir, am feadh a tha mi anns a’ phàillean seo, sibhse a bhrosnachadh le ur cur an cuimhne:

¹⁴ Air dhomh fios a bhith agam gur fagas dhomh àm cur dhìom mo phàillein seo, amhail a dh’fhoillsich ar Tighearna Iosa Crìosd dhomh.

¹⁵ Ach nì mi dìcheall, a‑chum an dèidh dhomh siubhal, gum bi agaibhse gnàth‐chuimhne air na nithean seo.

¹⁶ Oir cha do lean sinne faoin‐sgeulachdan a dhealbhadh gu h‑innleachdach, nuair a chuir sinn an cèill dhuibh cumhachd agus teachd ar Tighearna Iosa Crìosd, ach rinneadh sinn nar sùil‐fhianaisean air a mhòrachd‐san.

¹⁷ Oir fhuair e o Dhia an t‑Athair urram agus glòir, nuair a thàinig a shamhail seo de ghuth da ionnsaigh on ghlòir òirdheirc, Is e seo mo Mhac gràdhach‐sa, anns a bheil mo mhòr‐thlachd.

¹⁸ Agus chuala sinne an guth seo a thàinig o nèamh, nuair a bha sinn maille ris air an t‑sliabh naomh.

¹⁹ Tha againn mar an ceudna facal fàidheadaireachd as cinntiche; dom math a nì sibh aire a thoirt, mar do lòchran a tha a’ toirt solais uaithe ann an ionad dorcha, gus an soillsich an là, agus an èirich an reul‐mhaidne nur cridheachan:

²⁰ Air dhuibh fhios seo a bhith agaibh air tùs, nach eil fàidheadaireachd air bith den sgriobtar o thogradh dhaoine fhèin.

²¹ Oir cha tàinig an fhàidheadaireachd a rèir toil duine o shean: ach labhair daoine naomha Dhè, mar a sheòladh iad leis an Spiorad Naomh.