2 Eachdraidh 36 - Am Bìoball Iomraidh Gàidhlig 1880 1992

1 Chuir rìgh na h‑Èiphit Iehoahas o rìoghachadh ann an Ierusalem. 4 Rinneadh Iehoiacim na rìgh na àite. 6 Cheangail Nebuchadnesar Iehoiacim a‑chum a thoirt do Bhàbilon. 14 Sgrios na Caldèanaich Ierusalem. 22 Gairm Chìruis.

¹ Agus ghabh sluagh na tìre Iehoahas mac Iosiah, agus rinn iad na rìgh e an àit a athar ann an Ierusalem.

² Trì‐bliadhna‑fichead a dh’aois bha Iehoahas nuair a thòisich e air rìoghachadh, agus rìghich e trì mìosan ann an Ierusalem.

³ Agus chuir rìgh na h‑Eiphit e o rìoghachadh ann an Ierusalem, agus chuir e ceud tàlann airgid, agus tàlann òir, mar ùnlagh air an tìr.

⁴ Agus rinn rìgh na h‑Eiphit Eliacim a bhràthair na rìgh air Iùdah agus Ierusalem, agus thionndaidh e a ainm gu Iehoiacim. Agus ghabh Necho Iehoahas a bhràthair, agus thug e don Eiphit e.

⁵ Còig‐bliadhna‑fichead a dh’aois bha Iehoiacim nuair a thòisich e air rìoghachadh, agus rìghich e aon‐bhliadhna‑deug ann an Ierusalem: agus rinn e olc ann an sùilean an Tighearna a Dhia.

⁶ Na aghaidh‐san thàinig Nebuchadnesar rìgh Bhàbiloin a‑nìos, agus cheangail e ann an geimhlean umha e, a‑chum a thoirt do Bhàbilon.

⁷ Thug Nebuchadnesar mar an ceudna leis cuid de shoithichean taigh an Tighearna do Bhàbilon, agus chuir e iad na theampall ann am Bàbilon.

⁸ Agus a’ chuid eile de ghnìomharan Iehoiacim, agus a ghràinealachdan a rinn e, agus na fhuaireadh ann, feuch, tha iad sgrìobhte ann an leabhar rìghrean Israeil agus Iùdah. Agus rìghich Iehoiachin a mhac na àite.

⁹ Ochd‐bliadhna‑deug a dh’aois bha Iehoiachin nuair a thòisich e air rìoghachadh, agus rìghich e trì mìosan agus deich làithean ann an Ierusalem: agus rinn e olc ann an sùilean an Tighearna.

¹⁰ Agus aig ceann na bliadhna chuir rìgh Nebuchadnesar daoine uaithe, agus thug e do Bhàbilon e, maille ri soithichean taitneach taigh an Tighearna; agus rinn e Sedeciah a bhràthair na rìgh air Iùdah agus Ierusalem.

¹¹ Bliadhna‑ar‑fhichead a dh’aois bha Sedeciah nuair a thòisich e air rìoghachadh, agus rìghich e aon‐bhliadhna‑deug ann an Ierusalem.

¹² Agus rinn e olc ann an sùilean an Tighearna a Dhia; agus cha d’irioslaich e e fhèin am fianais Ieremiah am fàidh, a labhair o bheul an Tighearna.

¹³ Agus mar an ceudna rinn e ceannairc an aghaidh rìgh Nebuchadnesair, a thug air mionnachadh air Dia: ach ragaich e a mhuineal, agus chruadhaich e a chridhe o thionndadh a dh’ionnsaigh an Tighearna, Dia Israeil.

¹⁴ Mar an ceudna pheacaich iadsan uile a b’àirde de na sagartan agus den t‑sluagh gu ro‑mhòr, a rèir uile ghràinealachdan nan cinneach, agus thruaill iad taigh an Tighearna, a naomhaich e ann an Ierusalem.

¹⁵ Agus chuir an Tighearna, Dia an athraichean, fios dan ionnsaigh le làimh a theachdairean, ag èirigh gu moch, agus a’ cur uaithe; a chionn gu robh truas aige da shluagh, agus da àite‐còmhnaidh.

¹⁶ Ach rinn iadsan fanaid air teachdairean Dhè, agus rinn iad dìmeas air a bhriathran, agus rinn iad tarcais air a fhàidhean, gus an d’èirich fearg an Tighearna an aghaidh a shluaigh air chor is nach robh leigheas ann.

¹⁷ Uime sin thug e orra rìgh nan Caldèanach, a mharbh an daoine òga leis a’ chlaidheamh ann an taigh an ionaid naoimh, agus nach do chaomhain òigfhear no òigh, seann duine no esan a bha air a chromadh leis an aois: thug e thairis iad uile na làimh.

¹⁸ Agus uile shoithichean taigh Dhè, mòr agus beag, agus ionmhasan taigh an Tighearna, agus ionmhasan an rìgh agus a uachdaran, thug e leis uile do Bhàbilon.

¹⁹ Agus loisg iad taigh Dhè, agus bhris iad sìos balla Ierusaleim, agus loisg iad a lùchairtean uile le teine, agus mhill iad a shoithichean taitneach uile.

²⁰ Agus iadsan a chaidh as on chlaidheamh thug e leis do Bhàbilon, far an robh iad nan seirbhisich aige fhèin agus aig a mhic, gus an do rìghich rìgh Phersia:

²¹ A‑chum gum biodh facal an Tighearna le beul Ieremiah air a choileanadh, gus am mealadh an tìr a sàbaidean: rè na h‑ùine a bha i fàs, chùm i a sàbaidean, gus an do choileanadh trì‐fichead agus deich bliadhna.

²² A‑nis ann an ciad bhliadhna Chìruis rìgh Phersia, a‑chum gum biodh facal an Tighearna le beul Ieremiah air a choileanadh, dhùisg an Tighearna suas spiorad Chìruis rìgh Phersia, agus thug e fa‑near gairm a bhith air a tabhairt air feadh a rìoghachd uile, agus a chur mar an ceudna ann an sgrìobhadh, ag ràdh,

²³ Mar seo tha Cìrus rìgh Phersia ag ràdh, Uile rìoghachdan an domhain thug an Tighearna, Dia nan nèamh, dhòmhsa, agus dh’àithn e dhomh taigh a thogail dha ann an Ierusalem, a tha ann an Iùdah: ge bè neach a tha nur measg de a shluagh uile, gu robh an Tighearna a Dhia maille ris, agus rachadh e suas.